នាយករដ្ឋមន្ត្រីចិន លោក លី កេឈាំង ( Li Keqiang ) បានធ្វើកិច្ចចរចាជាមួយនាយករដ្ឋមន្ត្រីជប៉ុន លោក ស៊ីន ហ្សូអាបេ ( Shinzo Abe ) កាលពីថ្ងៃពុធ នៅចេងឌូ ខេត្តស៊ីឈួន ប្រទេសចិនភាគនិរតី ។
ដោយកត់សម្គាល់ថា ទំនាក់ទំនងចិន – ជប៉ុន បានថែរក្សានូវកម្លាំងចលករជាវិជ្ជមានមួយនោះ លោក លី បាននិយាយថា ចិនយកចិត្តទុកដាក់ចំពោះចំណងទាក់ទងរបស់ខ្លួនជាមួយជប៉ុន ព្រមទាំងមាន ឆន្ទៈជំរុញការអភិវឌ្ឍដោយឥតប្រែប្រួលនូវទំនាក់ទំនងទ្វេភាគី បន្ទាប់ពីវាបានវិលត្រឡប់ទៅរកផ្លូវត្រឹមត្រូវវិញនោះ ។
លោកបានអំពាវនាវដល់ភាគីទាំងពីរឱ្យធ្វើតាមគោលការណ៍ ដែលបានកំណត់ដោយឯកសារនយោបាយចំនួន៤ រវាងប្រទេសទាំងពីរ ព្រមទាំងស្មារតីនៃការយកប្រវត្តិសាស្ត្រមកធ្វើជាកញ្ចក់មួយ ធ្វើការសិក្សាទៅអនាគត ប្រកាន់យកទស្សនៈមានរយៈពេលយូរមួយ ព្រមទាំងដោះស្រាយឱ្យបានត្រឹមត្រូវបញ្ហាដែល ស្មុគស្មាញ ។
លោកនាយរដ្ឋមន្ត្រីក៏បានសម្តែងសេចក្តីសង្ឃឹមផងដែរថា ជប៉ុននឹងស្រុះស្រួលមតិគ្នាជាមួយចិន ហើយបង្កើតនូវស្ថានភាពដែលគួរឱ្យពេញចិត្តសម្រាប់ការផ្លាស់ប្តូគ្នាថ្នាក់ខ្ពស់ថែមទៀត ។
លោក អាបេ បានសាទរប្រទេសចិន ដែលបានធ្វើជាម្ចាស់ផ្ទះប្រកបដោយជោគជ័យកិច្ចប្រជុំរបស់មេដឹកនាំចិន-ជប៉ុន-កូរ៉េខាងត្បូងលើកទី៨ ព្រមទាំងបាននិយាយថា កិច្ចសហប្រតិបត្តិការក្នុងចំណោមប្រទេសទាំងបី ក្នុងពេល២០ឆ្នាំកន្លងទៅនេះ បានធ្វើឱ្យល្អប្រសើរដល់សុខមាលភាពប្រជាជនប្រទេសទាំងបីនិងថ្នាក់តំបន់ ។
ដោយកត់សម្គាល់ថា ទំនាក់ទំនងទ្វេភាគីបានវិលទៅរកផ្លូវ នៃការអភិវឌ្ឍធម្មតាឡើងវិញនោះ លោក អាបេ បាននិយាយថា ទាំងជប៉ុន និងទាំងចិន នឹងទទួលយកការទទួលខុសត្រូវយ៉ាងសំខាន់ចំពោះសន្តិភាព, ស្ថិរភាព,ការអភិវឌ្ឍនិងវិបុលភាពថ្នាក់តំបន់ និងពិភពលោក ។
ដោយសរសើរដល់ការបើកចំហថែមទៀតរបស់ចិននូវសេវាទីផ្សាររបស់ខ្លួននោះ លោក អាបេ បាននិយាយថា ជប៉ុនមានឆន្ទៈចូលរួមយ៉ាងសកម្មនៅក្នុងដំណើរការនេះ ៕
( ប្រភព ស៊ីនហួ បកប្រែដោយលោក ប៉ិន មឿន)
