ព្រឹត្តិការណ៍ “រត់ដើម្បីជីវិតកុមារនៅកម្ពុជាឆ្នាំ ២០១៩” ដោយ លោក នឹម ឈុន្នី រត់ក្នុងរយៈពេល១០ថ្ងៃ ពីទីរាជធានីភ្នំពេញ ដល់ខេត្ដសៀមរាប ប្រមូលបានថវិកាចំនួន ៥៥,០០០ដុល្លារ ដើម្បីចូលរួមជួយទ្រទ្រង់ដល់មន្ទីរពេទ្យកុមារអង្គរខេត្តសៀមរាប ដែលក្នុង១ឆ្នាំៗ មន្ទីរពេទ្យកុមារមួយនេះ ត្រូវការថវិកាប្រមាណជា ៦លាន ៥សែនដុល្លា សម្រាប់ប្រតិបត្តិការមនុស្សធម៌ ជួយសង្គ្រោះសុខភាព និងជីវិតកុមារកម្ពុជាមកពីគ្រប់ទិសទី។
នៅរសៀលថ្ងៃទី២៥ ខែធ្នូ ឆ្នាំ២០១៩ ក្នុងឱកាសដែល លោក នឹម ឈុន្នី ជាស្ថាបនិកក្រុមហ៊ុនវិបស្សា គ្រូបង្ហាត់សមាធិ និងជាអ្នកនិពន្ធសៀវភៅដ៏ល្បីល្បាញ បានរត់មកដល់ គោលដៅខេត្តសៀមរាបដោយជោគជ័យ លោកត្រូវបាន ម៉ូតូក្បូន បើកនាំផ្លូវមកកាន់មន្ទីរពេទ្យកុមារអង្គរ រួមទាំងមាន ពិធីទទួលរូបលោក និងក្រុមរបស់លោកយ៉ាងឱឡារិកផងដែរ។
លោក នឹម ឈុន្នី បានប្រាប់អ្នកសារព័ត៌មានយើងឲ្យដឹងថា យុទ្ធនាការនេះ ត្រូវបានផ្តួចផ្តើមឡើងដោយរូបលោកផ្ទាល់និងគាំទ្រដោយ មន្ទីរពេទ្យកុមារអង្គរ ដែលបានប្រមូលថវិកាតាមរយៈប្រព័ន្ធអ៉ីនធើណេត និងសប្បុរសជនក្នុង និងក្រៅប្រទេស។ ព្រឹត្តិការណ៍នេះ ក៏បានបង្ហាញ និងទទួលបានការគាំទ្រពីសំណាក់សិល្បៈករល្បីៗក្នុងស្រុក ប្រព័ន្ធផ្សព្វផ្សាយ កីឡាអូឡាំពិកខ្មែរ ក្រុមហ៊ុនឯកជន យុវជននិងប្រព័ន្ធផ្សព្វផ្សាយដទៃទៀត ក្នុងទម្រង់ជាជំនួយហិរញ្ញវត្ថុ ការទំនាក់ទំនង និងការផ្សព្វផ្សាយតាមប្រព័ន្ធផ្សព្វផ្សាយ។
លោក នឹម ឈុន្នី បានបញ្ជាក់ថា ព្រឹត្តិការណ៍ “រត់ដើម្បីជីវិតកុមារនៅកម្ពុជាឆ្នាំ ២០១៩” នឹងនៅតែទទួល ការបរិច្ចាគពីសប្បុរសជននានា រហូតដល់ពាក់កណ្តាលខែមករា ឆ្នាំ២០២០ ដែលគម្រោងនេះ បានកំណត់គោលដៅរហូតដល់១០ម៉ឺនដុល្លារ។
សូមជម្រាបថា ជារៀងរាល់ថ្ងៃមន្ទីរពេទ្យកុមារអង្គរខេត្តសៀមរាប បានផ្តល់សេវាពិនិត្យ ព្យាបាល និងថែទាំសុខភាព ដល់កុមារកម្ពុជាពីគ្រប់ទិសទីយ៉ាងហោចណាស់ ៤០០ នាក់។ សម្រាប់ចុងឆ្នាំ២០១៩នេះ មន្ទីរពេទ្យកុមារអង្គរ នៅខ្វះថវិកាប្រមាណជា ៧ម៉ឺនដុល្លា ដើម្បីទ្រទ្រង់ប្រត្តិបត្តិការរបស់ខ្លួន។
សប្បុរសជននានា ឧបត្ថម្ភប្រាក់ជាង៥ម៉ឺនដុល្លារ តាមរយៈយុទ្ធនាការ
សប្បុរសជននានា ឧបត្ថម្ភប្រាក់ជាង៥ម៉ឺនដុល្លារ តាមរយៈយុទ្ធនាការ រត់ដើម្បីជីវិតកុមារនៅកម្ពុជាឆ្នាំ ២០១៩#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Thursday, December 26, 2019
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
