នៅព្រឹកថ្ងៃទី២៦ ខែ ធ្នូ ឆ្នាំ២០១៩ រដ្ឋបាលស្រុកស្រុកជីក្រែង បានបើកិច្ចប្រជុំផ្សព្វផ្សាយនូវសេចក្តីជូនដំណឹងរបស់រដ្ឋបាលស្រុកពាក់ព័ន្ធការងារដីធ្លី និងបញ្ហាផ្សេងៗ ដឹកនាំដោយ លោក ធូ ចន្ថុល អភិបាលរងស្រុក តំណាងលោក ពៅ ប៊ុនធឿន អភិបាលស្រុកជីក្រែង។
កិច្ចប្រជុំនោះ មានការចូលរួមពី លោកនាយករដ្ឋបាលស្រុក លោកប្រធានការិយាល័យអន្តរវិស័យ លោក-លោកស្រី ប្រធាន អនុប្រធានចំណុះជំនាញពាក់ព័ន្ធ លោក-លោកស្រី មេឃុំ ស្មៀនឃុំ និង លោក លោកស្រីមេភូមិ ក្នុងដែនសមត្ថកិច្ចស្រុកជីក្រែង សរុបចំនួន១៧៧ រូប។
លោកអភិបាលរងស្រុក បានពិភាក្សាទៅលើ ការផ្សព្វផ្សាយសេចក្ដីជូនដំណឹង ស្ដីពីការចុះវាស់វែងអចលនទ្រព្យមិនទាន់ចុះបញ្ជីនៅតាមបណ្ដាភូមិ-ឃុំ ក្នុងស្រុកជីក្រែង ដែលខុសគោលការណ៍យន្តការច្រកចេញចូលតែមួយ និងលិខិតបទដ្ឋានគតិយុត្តនានា។ វិធានការ ការទប់ស្កាត់ការសាងសង់ស្ថានីយប្រេងឥន្ធនៈ ដែលពុំមានលិខិតអនុញ្ញាតសាងសង់តាមបណ្ដាឃុំទាំង១២ ក្នុងស្រុកជីក្រែង។ និងការរៀបចំសណ្ដាប់ធ្នាប់សាធារណៈក្នុងស្រុកជីក្រែង។
ព័ត៌មានជាតិ ថ្មីៗ
លោកអភិបាលរងស្រុក បានផ្ដល់អនុសាសន៍ដល់ លោក-លោកស្រីមេឃុំទាំង១២ និងលោក លោកស្រី មេភូមិទាំង១៥៥ភូមិ ត្រូវយកចិត្តទុកដាក់ត្រូវយកចិត្តចំពោះការងារដីធ្លី ត្រូវមានការចុះហត្ថលេខាលើលិខិតស្នាមផ្សេងៗ ត្រូវមានសៀវភៅចុះលេខឲ្យបានច្បាស់លាស់ ចៀសវាងកើតមានទំនាស់ដីធ្លីកាន់តែច្រើន និងត្រូវអនុវត្តន៍ តាមលិខិតលេខ១៩៧៤ ដនស/អសដក ចុះថ្ងៃទី១៦ ខែសីហា ឆ្នាំ២០១៨ របស់ក្រសួងរៀបចំដែនដី នគររូបនីយកម្ម និងសំណង់ ស្ដីពីតម្រូវការនៃគំនូសប្លង់ទីតាំងដី សម្រាប់បំពេញបែបបទផ្ទេរសិទ្ធិកាន់កាប់អចលនទ្រព្យមិនទាន់ចុះបញ្ជី និងលិខិតបទដ្ឋានគតិយុត្តនានាផ្សេងៗទៀតដែលផ្តោតទៅលើការងារដីធ្លីនេះ។
លោកអភិបាលរងស្រុក ក៏បានលើកពីបញ្ហា រំលោភយកដីចំណីផ្លូវធ្វើជាកន្លែងប្រកបអាជីវកម្ម ឬសាងសង់សំណង់អាគារផ្សេងៗ ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ និងត្រូវបញ្ឈប់រាល់សកម្មភាពធ្វើអាជីវកម្ម ឬបកអាចម៌ដីដោយអាណាធិបតេយ្យ ដែលពុំមានលិខិតអនុញ្ញាតពីអាជ្ញាធរមានសមត្ថកិច្ច។ និងតម្រូវឲ្យមកសុំច្បាប់អាជ្ញាធរ និងសមត្ថកិច្ចជំនាញផ្សេងៗដែលពាក់ព័ន្ធ និងការងារ។ ក្នុងនោះ ការសាងសង់ស្ថានីយប្រេងឥន្ថនៈគ្រប់ប្រភេទ អាជ្ញាធរ និងសមត្ថកិច្ចជំនាញផ្សេងៗដែលពាក់ព័ន្ធ ចុះពិនិត្យឲ្យបានច្បាសលាស់ និងតម្រូវឲ្យទៅសុំច្បាប់អនុញ្ញាត ដើម្បីបញ្ជាក់សុវត្ថិភាពនៃការប្រើប្រាស់ ជៀសវាងការកើតមានហានិភ័យណាមួយកើតឡើង។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
