នៅថ្ងៃទី ២៦ ខែ ធ្នូ ឆ្នាំ២០១៩ អាជ្ញាធរស្រុកប្រាសាទបាគង កងកម្លាំងប្រដាប់អាវុធទាំង៣ប្រភេទ ព្រះសង្ឃ យុវជនកាកបាទក្រហមកម្ពុជា រួមនិងប្រជាពលរដ្ឋ សរុប ២៥០នាក់ បានចូលរួមដាំ កូនឈើរាំង និងផ្ទោល ចំនួន ១ពាន់ដើម លើផ្ទៃដីតំបន់លិចទឹកជិត ៣០ហិចតា ក្នុងភូមិសាស្រ្តឃុំកណ្តែក ស្រុកប្រាសាទបាគង ខេត្តសៀមរាប។
លោក នឹម សុវណ្ណ អភិបាលស្រុកស្តីទី បានឲ្យដឹងថា ការដាំកូនឈើក្នុងតំបន់លិចទឹកឡើងវិញនាពេលនេះ គឺសម្រាប់ជាជម្រកត្រីពងកូននៅរដូវវស្សា និង ទីជម្រកសត្វស្លាបគ្រប់ប្រភេទស្នាក់នៅ។
លោក អភិបាលស្រុកស្តីទី បានបញ្ជាក់ថា តំបន់លិចទឹក នៅចំណុចទំនប់ចង្អើរ ចំណុចស្បែកខ្លាក់ និង ចំណុចកន្សែងកំបុត ក៏ដូចជាតំបន់មួយចំនួនទៀត ក្នុងភូមិសាស្រ្តស្រុកប្រាសាទបាគង ត្រូវបានរងការកាប់ទន្រ្ទាន ដុត ឈូសឆាយ ដោយក្រុមជនទុច្ចរិតមួយចំនួន។
ព័ត៌មានជាតិ ថ្មីៗ
លោក បានបន្ថែមថា ទីតាំងក្នុងចំណុចភូមិសាស្ត្រខាងលើ ត្រូវបាន អនុលោមតាមច្បាប់ស្ដីពីព្រៃឈើ និង ច្បាប់ស្ដីពីជលផល ជាមួយនោះ អាជ្ញាធរស្រុក ព្រះសង្ឃ និងប្រជាពលរដ្ឋ ក៏បានចូលរួម ក្នុងករណីយកិច្ចទទួលខុលត្រូវ ក្នុងការថែរក្សា ការពារ អភិរក្ស ព្រៃឈើនៅកម្ពុជា។ មួយវិញទៀត ធនធានធម្មជាតិទាំងនេះហើយ ក៏ជាប្រភពចំណូលរបស់ប្រជាពលរដ្ឋនៅតាមមូលដ្ឋាន ក្នុងការទាក់ទាញដល់ភ្ងៀវទេសចរណ៍ជាតិ អន្តរជាតិ ចូលមកទស្សនាកម្សាន្ត ក្រៅពីការដើរកម្សាន្តនៅតាមប្រាសាទផងដែរ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
