ពលរដ្ឋមួយរូប នៅស្រុកពួក ខេត្ដសៀមរាប បានប្រមូលសម្ភារៈបុរាណ និងគល់ឈើចាស់ៗ ដាក់តាំងនៅកន្លែងស្នាក់នៅបណ្ដោះអាសន្នរបស់អ្នកដំណើរ ឬហៅថា Home Stay ដើម្បីបង្កើតការទាក់ទាញអ្នកទេសចរណ៍ និងដើម្បីអភិរក្សរបស់បុរាណទុកសម្រាប់កូនចៅជំនាន់ក្រោយអោយបានស្គាល់ ខណៈដែលផ្ទះសំណាក់ សណ្ឋាគារនៅទីក្រុងសៀមរាប កំពុងរីកចំរើនសម្ភារៈទំនើបៗដាក់បង្ហាញភ្ញៀវទេសចរណ៍ជាតិ និងអន្ដរជាតិ។
លោក ព្រឹក ព្រហ្មមេត្ដា ដែលជាម្ចាស់ផ្ទះស្នាក់នៅបណ្ដោះអាសន្ន បានឲ្យដឹងថា ផ្ទះស្នាក់ដែលលោកបានរៀបចំនេះ ជារបៀបផ្ទះបុរាណដែលបានបង្កើតឡើងរយៈពេល ២ឆ្នាំមកហើយ ដោយលោកប្រមូលយកសម្ភារៈចាស់ៗរួមមាន ឆ្នាំងស្ពាន់ ក្រឡ កាទិន ក្អម កង់រទេះ និងសម្ភារៈរបស់របរបុរាណជាច្រើនទៀត ដើម្បីអភិរក្សទុកអោយមនុស្សជំនាន់ក្រោយបានស្គាល់ បានដឹងពីសម្ភារៈជំនាន់ដើម ពិសេសក៍ចង់អោយបរទេសស្គាល់ពីវប្បធម៌ប្រើប្រាស់របស់ខ្មែរផងដែរ ។ ជាមួយគ្នានោះ គល់ឈើចាស់ៗដ៍មានតម្លៃ ដែលសល់ពីភ្លើងឆេះ លោកបានយកមករក្សាទុកលម្អរក្នុងផ្ទះស្នាក់ផងដែរ ដើម្បីធ្វើយ៉ាងណាមានការទាក់ទាញពីភ្ញៀវទេសចរណ៍ ។
លោក បានបន្ដថា សម្ភារៈចាស់ៗដែលលោកបានប្រមូលយកមកតាំងនេះ គឺលោកបានដើរសុំពីតាមភូមិផ្សេងៗដែលប្រជាពលរដ្ឋបានរក្សាទុកនៅតាមផ្ទះរបស់ពួកគាត់ ។ ជាមួយគ្នានោះដែរ លោកក៍បានបង្កើតអោយមាននូវសិល្បៈបាញ់ព្រួញ និងមានការរៀបចំស្លៀកពាក់ជារបៀបមេទ័ពពីជំនាន់ដើមផងដែរ ។
ព័ត៌មានជាតិ ថ្មីៗ
បើតាមលោក ព្រឹក ព្រហ្មមេត្ដា បានអោយដឹងទៀតថា ការតុបតែជារបៀបបុរាណនេះ ដោយសារលោកស្រលាញ់វប្បធម៌ប្រពៃណីដូនតារបស់ខ្មែរតាំងដើមមក ។ លោកបានបន្ថែមថា យើងជាកូនខ្មែរ ត្រូវគោរពនិងថែរក្សាវប្បធម៌មួយនេះអោយបានគង់វង់តកូនចៅជំនាន់ក្រោយ ។ ការថែរក្សាវប្បធម៌បាលល្អប្រសើរហើយនោះ ប្រទេសជាតិក៍រីកចំរើនទៅតាមនោះដែរ ជាពិសេសអន្ដរជាតិចូលចិត្ដ និងស្រលាញ់របស់ខ្មែរ ។
លោកបញ្ជាក់ថា ក្នុងពេលបច្ចុប្បន្ន ក៏មានភ្ញៀវទេសចរណ៍អន្ដរជាតិមកស្នាក់នៅផ្ទះរបស់លោកផងដែរ ដោយសារពួកគាត់មានការគោរព និងស្រលាញ់ចូលចិត្ដសម្ភារៈរបស់ខ្មែរដែលលោកបានដាក់អភិរក្សនេះ ជាពិសេសការស្នាក់នៅ ព្រោះផ្ទះជារបៀបបុរាណខ្មែរ ។ ហើយលោកក៍បានអំពាវដល់ពលរដ្ឋខ្មែរគ្រប់រូប ជាពិសេសយុវជន ត្រូវរួមលើកស្ទួយសម្ភារៈបុរាណរបស់ខ្មែរដែលបានបន្សល់ទុកពីជំនាន់ដើម ៕
អត្ថបទ និង រូបភាព៖ បូ សាវី
