ពិធីបុណ្យទន្លេលើកទី៦ ឆ្នាំ២០២០ខាងមុខនេះ ក្រសួងទេសចរណ៍ បានកំណត់យកខេត្តបាត់ដំបង ជាខេត្តសម្រាប់ប្រារព្ធពិធីបុណ្យទន្លេ ព្រោះខេត្តបាត់ដំបងមានព្រំដែនទឹកបឹងទន្លេសាប ក្នុងចំណោមខេត្តមួយចំនួនទៀតដែល នៅជុំវិញបឹងទន្លេសាបដែរ រួមមានខេត្តកំពង់ឆ្នាំង បន្ទាយមានជ័យ សៀមរាប និងខេត្តកំពង់ធំ ។
នៅក្នុងកិច្ចប្រជុំពិភាក្សាការរៀបចំពិធីបុណ្យទន្លេលើកទី៦ នៅខេត្តបាត់ដំបង នាថ្ងៃពុធ ទី២៥ ខែធ្នូ ឆ្នាំ២០១៩ រដ្ឋលេខាធិការក្រសួងទេសចរណ៍ ឯកឧត្តម ប៉ាក់ សុខុម បានធ្វើការជំរុញដល់រដ្ឋបាលខេត្តបាត់ដំបង នូវកិច្ចសំខាន់ៗចំនួនបី ដើម្បីរៀបចំពីធីបុណ្យទន្លេឲ្យទទួលបានជោគជ័យ និងមានការទាក់ទាញកំណើនភ្ញៀវជាតិ និងអន្តរជាតិមកលេងកម្សាន្តក្នុងពិធីបុណ្យឲ្យបានច្រើនកុះករ ព្រោះថា កន្លងមកការរៀបចំបុណ្យទន្លេ បានរៀបចំឡើងចំនួន៥លើកមកហើយ ដែលបានធ្វើឡើង នៅតាមបណ្ដាខេត្តមួយចំនួនដែលមានទន្លេទទួលបានជោគជ័យ និងមានការទាក់ទាញខ្លាំង សំណាក់ភ្ញៀវទេសចរណ៍ជាតិនិងអន្តរជាតិ ដោយសារតែខេត្តទាំងនោះ បានរៀបចំនូវរបៀបវារៈសំខាន់ជាច្រើន នៅក្នុងពិធីបុណ្យទន្លេនេះ ដូចជា ការសំដែងសិល្បៈ របាំវប្បធម៌ ការតាំងពិព័រណ៍ផលិតផលក្នុងស្រុក និងក្រៅស្រុក ការប្រកួតកីឡា ក៏ដូចជាមានសន្តិសុខសណ្ដាប់ធ្នាប់ល្អជាដើម ។
ឯកឧត្តមរដ្ឋលេខាធិការក្រសួងទេសចរណ៍ បានជំរុញដល់រដ្ឋបាលខេត្តបាត់ដំបង នូវកិច្ចការសំខាន់ៗចំនួនបី ធំៗ ទី១. កន្លែងតាំងពិព័រណ៍ឲ្យមានច្រើនស្ដង់ ពិសេសជ្រើសយកផលិតផលក្នុងខេត្តមានម្ហូបអាហារ នំចំណី របស់ប្រើប្រាស់ដែលជាផលិតផលរបស់ប្រជាពលរដ្ឋ ដែលជាប្រពៃណីទំនៀមទម្លាប់របស់អ្នកស្រុកនៃខេត្តបាត់ដំបង ជាពិសេស មកដាក់តាំងចាប់ពី៤០ទៅ៥០មុខ, ទី២. របាំប្រពៃណីឬរឿងខ្លីៗ និយាយទាក់ទងនឹងខេត្តបាត់ដំបង ដើម្បីសម្ដែងជូនដល់ថ្នាក់ដឹកនាំ និងភ្ញៀវចូលរួមទស្សនាកំសាន្ត និងទី៣. រៀបចំប្រកួតកីឡាប្រចាំខេត្តឲ្យបានច្រើនមុខ ។
អភិបាលខេត្តបាត់ដំបង ឯកឧត្តម ងួន រតនៈ បានចាត់ទុកថា នេះជាព្រឹត្តិការណ៍ធំទី១សម្រាប់ខេត្ត ដែលត្រូវរៀបចំឡើង ដើម្បីទាក់ទាញភ្ញៀវទេសចរណ៍ ខណៈព្រឹត្តិការណ៍សង្ក្រាន្តបាត់ដំបងចំនួន២ដងមកហើយ ដែលរដ្ឋបាលខេត្តបាត់ដំបង សហការជាមួយសហភាពសហព័ន្ធយុវជនកម្ពុជា បានរៀបចំធ្វើឡើង និងទទួលបាននូវភាពជោគជ័យរួមផ្សំជាមួយ បញ្ហាសន្តិសុខសណ្តាប់ធ្នាប់សាធារណៈក៏ត្រូវបានធ្វើពង្រឹងបានយ៉ាងល្អប្រសើរ មិនមានការព្រួយបារម្ភឡើយ អ្វីដែលសំខាន់គឺដោយសារមានការគាំទ្រពីសំណាក់ក្រសួងទេសចរណ៍និងអាជ្ញាធរគ្រប់ជាន់ថ្នាក់ បានខិតខំដកពិសោធន៍ពីបណ្ដាខេត្តដែលបានរៀបចំពិធីបុណ្យទន្លេទទួលបានជោគជ័យកន្លងមក ក្នុងនោះរដ្ឋបាលខេត្តបាត់ដំបង នឹងខិតខំធ្វើការងារទាំងនេះឲ្យបានជោគជ័យ ពិសេសពង្រឹងការងារសន្តិសុខ ការប្រគុំតន្ត្រី រៀបចំភ្លើងពណ៌នៅជុំវិញទីតាំងពិធីបុណ្យ ព្រមទាំងការងារសំខាន់មួយចំនួនទៀតផងដែរ ។
សូមបញ្ជាក់ថា ការរៀបចំពិធីបុណ្យទន្លេលើកទី៦នៅខេត្តបាត់ដំបងនាឆ្នាំ២០២០ខាងមុខនេះ ត្រូវបានធ្វើឡើងរយៈពេល៣ថ្ងៃជាប់ៗគ្នា គឺចាប់ពីថ្ងៃទី១៣ដល់ថ្ងៃទី១៥ ខែមីនា ឆ្នាំ២០២០ខាងមុខ ដោយព្រឹត្តិការណ៍នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នឹងអញ្ជើញជាអធិបតីបើកពិធីបុណ្យនេះ ៕
អត្តបទនិងរូបភាព៖មន្ទីរព័ត៌មានខេត្តបាត់ដំបង
