សាលារៀនចំនួន២ ក្នុងឃុំព្រះដាក់ ស្រុកបន្ទាយស្រីខេត្តសៀមរាប នឹងទទួលបានគម្រោង ក្រោមកិច្ចសហប្រតិបត្តិការរវាង រដ្ឋបាលស្រុកបន្ទាយស្រី ខេត្តសៀមរាប ចុះហត្ថលេខា ជាមួយក្រុមហ៊ុន Seatel (South East Asia Telecom) ប្រចាំកម្ពុជា។
ពិធីចុះហត្ថលេខានេះ ធ្វើឡើងនៅវិទ្យាល័យបន្ទាយស្រី នារសៀលថ្ងៃទី២៥ ខែឆ្នូ ឆ្នាំ២០១៩ ដោយ លោក ឃឹម ហ្វីណង់ អភិបាលស្រុកបន្ទាយស្រី និងលោក យ៉ាវ អ៊ីជិន នាយកប្រតិបត្តិក្រុមហ៊ុន Seatel ប្រចាំនៅកម្ពុជា។
សាលាគំរូ ដែលនឹងទទួលបានគម្រោងនេះ មានសាលាបឋមសិក្សាតាកុះ និងវិទ្យាល័យបន្ទាយស្រី ជាជំហ៊ានបឋមនៃការឆ្លើយតបចំពោះសំណូមពររបស់សិស្ស និងគ្រូបង្រៀន ក្រុមហ៊ុន Seatel បានជួយឧបត្ថម្ភបំពាក់អំពូលភ្លើង និងកង្ហាជូនគ្រប់ថ្នាក់រៀន។ ជាមួយនោះ សិស្សានុសិស្ស ក៏នឹងទទួលបានគ្រប់ៗគ្នា នូវឯកសណ្ឋានប្រចាំសាលារបស់ខ្លួន និង សំណូមពរជាច្រើនទៀត ដែលក្រុមហ៊ុនទទួលយកទៅដោះស្រាយ។
លោក យ៉ាវ អ៊ីជិន មានប្រសាសន៍ថា ៖ ជាច្រើនឆ្នាំកន្លងមកនេះ វត្តមានរបស់លោក បំពេញធុរកិច្ចនៅក្នុងប្រទេសកម្ពុជា ច្រើនជាងនៅប្រទេសចិនជាស្រុកកំណើត ។ លោកស្រឡាញ់មាតុភូមិ និងប្រជាជនកម្ពុជា ។ សម្រាប់លោកផ្ទាល់ កម្ពុជាប្រៀបបីដូចជាស្រុកកំណើតរបស់លោក ហើយលោកដឹងច្បាស់ថា កម្ពុជាមានភ័ព្វសំណាងដោយមានសម្តេច តេជោ ហ៊ុន សែន ជាប្រមុខនៃរាជរដ្ឋាភិបាលកម្ពុជា និងជាស្ថាបនិកសន្តិភាព។
លោកបានបញ្ជាក់ថា ការចូលរួមចំណែក ទ្រទ្រង់វិស័យអប់រំនៅកម្ពុជា វាគឺជាក្តីស្រមៃតែមួយគត់របស់លោក ព្រោះថាវិស័យអប់រំ គឺជាថ្នាលបណ្តុះបណ្តាលធនធានមនុស្ស សម្រាប់ការអភិវឌ្ឍប្រទេសជាតិ ។ ក្រៅពីខ្លឹមសារនៃលិខិត ដែលត្រូវបានចុះហត្ថលេខា លោកក៏នឹងជួយឧបត្ថម្ភ ដល់សាលាទាំង២នេះ ឆ្ពោះទៅរកគោលដៅ ក្នុងរយៈពេល៥ឆ្នាំផងដែរ ។
មានប្រសាសន៍ក្នុងឱកាសនោះ លោក ឃឹម ហ្វីណង់ លើកឡើងថា កិច្ចសហប្រតិបត្តិការរវាងរដ្ឋបាលស្រុក និងដៃគូអភិវឌ្ឍនាពេលនេះ វានឹងក្លាយជាឧទាហរណ៍មួយ សម្រាប់ឲ្យសាលាដទៃទៀត សប្បុរសជន និងដៃគូឯកជនដទៃផ្សេងៗទៀត នាពេលអនាគត យកគំរូតាម ។
លោកអភិបាលស្រុក បញ្ជាក់បន្ថែមថា កិច្ចសហប្រតិបត្តិការ លើគម្រោងអភិវឌ្ឍសាលារដ្ឋជាសាលាគំរូនាពេលនេះ នៅតែត្រូវការ ការគាំទ្រជាចាំបាច់ពីក្រសួងអប់រំ យុវជន និងកីឡា អ្នកជំនាញ និងធាតុចូលផ្សេងៗជាច្រើនទៀត។
យ៉ាងណាក៏ដោយ នៅក្នុងពិធីចុះហត្ថលេខានោះ វេទិកាស្វែងយល់អំពីសំណូមពរ និងបញ្ហាប្រឈមនានា ត្រូវបានបើកទូលាយដោយការបញ្ចេញមតិពីសំណាក់សិស្ស គ្រូបង្រៀន និងអ្នកគ្រប់គ្រងសាលាផងដែរ ដើម្បីជាការត្រួសត្រាយផ្លូវ សិក្សាអំពីតម្រូវការចាំបាច់ក្នុងជំហានដំបូង ក្នុងការអនុវត្ត គម្រោង ។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
