លោកវរៈសេនីយ៍ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី បានឲ្យដឹងថា នៅវេលាម៉ោង០៨ និង៣០នាទី ព្រឹកថ្ងៃទី៣០ ខែធ្នូ ឆ្នាំ២០១៩នេះ កម្លាំងនគរបាលការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្ត បានឃាត់ខ្លួនជនបរទេសម្នាក់ពាក់ព័ន្ធនឹងករណីលួចស្នាក់នៅខុសច្បាប់ ដែលជនបរទេសរូបនេះមានឈ្មោះ YAN SHAOBING ភេទប្រុស កើតថ្ងៃទី០២ ខែវិច្ឆិកា ឆ្នាំ១៩៩៦ ជាជនជាតិចិន គ្មានលិខិតឆ្លងដែន និងគ្មានមុខរបរគ្មានកន្លែងស្នាក់នៅពិតប្រាកដ ។
លោកវរៈសេនីយ៍ឯក តូច សុគន្ធ បន្ថែមថា ជនបរទេសខាងលើបានចូលមកព្រះរាជាណាចក្រកម្ពុជា កាលពីថ្ងៃទី២២ ខែតុលា ឆ្នាំ២០១៩ តាមច្រកព្រលានយន្តហោះអន្តរជាតិសៀមរាប ដើម្បីស្វែងរកការងារធ្វើ ដោយបានស្នាក់នៅតាមចិញ្ចើមផ្លូវសាធារណៈ ហើយចំពោះការហូបចុក គឺរើសអាហារតាមធុងសម្រាម ។
បើតាមការសាកសួរ ជនបរទេសរូបនេះបានឆ្លើយថា លិខិតឆ្លងដែនរបស់គេត្រូវបានគេលួចយកនៅភ្នំពេញ ឯទិដ្ឋាការស្នាក់នៅបានផុតសុពលភាពតាំងពីថ្ងៃទី២២ ខែវិច្ឆិកា ឆ្នាំ២០១៩ រហូតដល់សព្វថ្ងៃ ។ ហើយក្នុងករណីនេះកម្លាំងសមត្ថកិច្ចបានចាត់បញ្ជូនជនបរទេសរូបនេះទៅស្នាក់ការត្រៀមបណ្តេញចេញប្រចាំខេត្តសៀមរាបចាត់ការបន្ត ៕
ព័ត៌មានជាតិ ថ្មីៗ
អត្ថបទ និង រូបភាព៖ ថាច់ ពិសុទ្ធ
