ដំឡូងពីលើឈើខាងក្រោមនេះជាល្បិចជនទុច្ចរឹតព្យាយាមគេចវេសពីច្បាប់ ប៉ុន្តែគេចមិនផុតក្រោមកណ្តាប់ដៃសមត្ថកិច្ចរដ្ឋបាលព្រៃឈើ ក្របួចបានកាលពីរសៀលថ្ងៃទី០១ ខែមករា ឆ្នាំ២០២០ ស្ទាក់ចាប់បានដោយរថយន្តខ្នាតយក្សមួយគ្រឿងនេះ ដឹកដំឡូងពីលើនិងបង្កប់ឈើពីក្រោមនៅចំណុចស្រុកស្វាយលើ ។
លោកម៉ុង ប៊ុនលីម នាយខណ្ឌរដ្ឋបាលព្រៃឈើ ខេត្តសៀមរាប បានអោយអ្នកសាព័ត៌មានយើងដឹងថា រថយន្តដែលបានឃាត់នោះម៉ាកហ៊ីយានដាយធុន(វេអង) ។ ម្ចាស់ឈ្មោះឡុង រដ្ឋា ប្រុសអាយុ៣២ឆ្នាំ ទីលំនៅខេត្តព្រៃវែង បានដឹកដំឡូងហើយបង្កប់ឈើខាងក្រោម ក្នុងនោះរកឃើញឈើប្រភេទលេខ១(ស្រឡៅ)២១៣សន្លឹកស្មើ១១,៣០៣ ម៉ែត្រគូប, ឈើអារលេខ២ ចំនួន១១សន្លឹកស្មើ០,៤១២ ម៉ែត្រគូប និងឈើអារចម្រុះ៣៩សន្លឹកស្មើ១,៦០៥ ម៉ែត្រគូបសរុប=១៣,៣២០ ម៉ែត្រគូប ។ ឈើទាំងនេះបានដឹកចេញពីស្រុកត្រពាំងប្រាសាទ ខេត្តឧត្តរមានជ័យ បម្រុងឆ្ពោះទៅខេត្តព្រៃវែង ។
លោកនាយខណ្ឌបន្តថា ក្រោយពីបាននាំយកមករក្សាទុកនៅសង្កាត់រដ្ឋបាលព្រៃឈើកន្ទួតខ្នារក្រៅ យើងបានផ្តល់ឱកាសអោយម្ចាស់ចូលខ្លួនមកទទួល ពិន័យជាអន្តរកាល ក្នុងរយ:ពេល៣០ថ្ងៃ ។ ក្នុងករណីម្ចាស់មិនចូលខ្លួន នឹងបញ្ជូនសំណុំរឿងទៅតុលាការ អនុវត្តតាមផ្លូវច្បាប់ ៕
ព័ត៌មានជាតិ ថ្មីៗ
អត្ថបទ និងរូបភាព: លោកគឿន វេត
កែសម្រួលដោយ លីវ សុខុន
