ការងារអប់រំ គឺជាគន្លឹះមួយយ៉ាងសំខាន់ ក្នុងការកសាងធនធានមនុស្សដែលសង្គមជាតិទាំងមូល ត្រូវតែចូលរួមវិនិយោគឲ្យបានខ្លាំងក្លា និងប្រើប្រាស់ពេលវេលាយូរអង្វែង ដែលទាមទារនូវការអត់ធ្មត់ និងស្មារតីទទួលខុសត្រូវខ្ពស់ ។ ការធ្វើកំណែទម្រង់វិស័យអប់រំនៅកម្ពុជា បានធ្វើឲ្យវិស័យនេះ ទទួលបាននូវការគាំទ្រពីសំណាក់ដៃគូអភិវឌ្ឍនានាជាច្រើន និងមានការទទួលស្គាល់ពីសំណាក់មហាជនគ្រប់ស្រទាប់វណ្ណៈ ។ នេះបើតាមលោក ពៅ ពិសិដ្ឋ អភិបាលរងខេត្តសៀមរាប បានលើកឡើងយ៉ាងដូច្នេះនៅសាលាគរុកោសល្យ និងវិក្រឹតការខេត្តសៀមរាប នាព្រឹកថ្ងៃទី០៩ ខែមករា ឆ្នាំ២០២០ នៅក្នុងពិធីចែកទោចក្រយានចំនួន ១ពាន់គ្រឿង ដល់សិស្សកុមារមកពីចំនួន ១០០សាលា ទូទាំងខេត្តសៀមរាប ដែលទោចក្រយានទាំងនេះ គឺជាអំណោយរបស់ រូតារី ក្លឹប នៃប្រទេសសឹង្ហបូរី និងអង្គការសុបិន្តសហគមន៍កម្ពុជា ។
លោកអភិបាលរងខេត្ត បញ្ជាក់ថា ពិធីចែកអំណោយជាទោចក្រយានចំនួន ១ពាន់គ្រឿងនេះ វាគឺជាផ្នែកមួយនៃការចូលរួមរបស់សប្បុរសជន ក្នុងការជួយឲ្យសិស្សានុសិស្ស មានលទ្ធភាពធ្វើដំណើរមកកាន់សាលារៀនបានទាន់ពេលវេលា ជាការលើកទឹកចិត្តដល់សិស្ស និងជួយសម្រាលបន្ទុករបស់មាតាបិតាសិស្ស ផងដែរ ។ អ្វីដែលជាការកត់សម្គាល់នៃការចូលរួមរបស់ដៃគូអភិវឌ្ឍ និងសប្បុរសជនក្នុងវិស័យអប់រំ វាបានជះឥទ្ធិពល ដល់ការរីកចម្រើននៃវិស័យអភិវឌ្ឍធនធានមនុស្សនៅកម្ពុជា ។
លោក អភិបាលរងខេត្តសៀមរាប បញ្ជាក់បន្ថែមថា ក្មួយៗសិស្សនុសិស្សគឺជាទំពាំងស្នងឬស្សី ហើយបេសកកម្មរបស់ទំពាំងស្នងឬស្សី គឺការខិតខំរៀនសូត្រ ជាមួយនឹងការបង្កើតឲ្យមានក្តីស្រម៉ៃរបស់ខ្លួនសម្រាប់អនាគត ហើយត្រូវចេះតស៊ូ មិនបោះបង់ការសិក្សា ជំនះឲ្យបានរាល់ការលំបាកទាំងឡាយដែលជាឧបស័គ្គ ដើម្បីធ្វើឲ្យក្តីស្រម៉ៃខ្លួន បានក្លាយជាការពិត ។ ក្នុងនោះសាលារៀន គឺជាធនាគារវិនិយោគ-សន្សំប្រាក់របស់មាតាបិតាសិស្ស ដើម្បីអនាគតរបស់កូនៗ រាល់ការចំណាយទាំងឡាយរបស់មាតាបិតាសិស្ស ក្នុងរយៈពេលដែលបុត្រ-បុត្រធិតារបស់ខ្លួនកំពុងរៀនសូត្រនៅសាលារៀន វាមិនបាត់បង់ទៅណាទេ វានឹងផ្តល់ផ្លែផ្កាមកវិញទាំងដើមទាំងការ នៅពេលដែលកូនៗ មានការងារធ្វើ ក្រោយពីបានបញ្ជប់ការសិក្សាមួយដ៏ល្អនោះ ។
ព័ត៌មានជាតិ ថ្មីៗ
បើតាមលោកស្រី មេន ជូឡា នាយិកា រ៉ូតារី-ក្លឹប នៃប្រទេសសឹង្ហបូរីមានប្រសាសន៍ឲ្យដឹងថា អស់រយៈពេល ៨ឆ្នាំកន្លងមកហើយ ដែលរ៉ូតារី ក្លឹប សឹង្ហបូរី បានអនុវត្តគម្រោងផ្តល់អំណោយទោចក្រយានដូចដែលបានធ្វើក្នុងថ្ងៃនេះ ។ ៨ឆ្នាំមកនេះ មានកង់ប្រហែលជា ៦ពាន់គ្រឿង ត្រូវបានប្រគល់ជូនផ្ទាល់ ដល់សិស្សសាលាបឋមសិក្សានៅកម្ពុជា ក្នុងនេះមានកង់ប្រមាណជា ជាង៣ពាន់គ្រឿង ដែលសិស្សសាលាបឋមសិក្សានៅខេត្តសៀមរាប ទទួលបាន ។ អំណោយទាំងនេះ វាមិនមែនសម្រាប់សិស្សទូទៅដែលត្រូវទទួលបាននោះទេ ។ ការចែកជូនកង់ទាំងនេះ គឺវាត្រូវបានគិតទៅដល់ល័ក្ខខ័ណ្ឌមួយចំនួនចំនួន ដូចជាសម្រាប់សិស្សដែលមករៀនទៀងទាត់ និងសិស្សពូកែដែលត្រូវលើកទឹកចិត្ត សិស្សពិការ សិស្សដែលរស់នៅក្នុងគ្រួសារមានជីវភាពខ្វះខាត សិស្សដែលមានផ្ទះនៅឆ្ងាយពីសាលារៀន ជាដើម ។
លោកស្រី ចេននី លីប៉ា រំលឹកថា កាលក្នុងឆ្នាំ ២០០៧ គឺ១៣ឆ្នាំមុន លោកស្រីបានមកទស្សនាកម្ពុជា លោកស្រីបានកសាងអណ្តូងទឹកមួយនៅខេត្តសៀមរាប ។ ដោយក្តីស្រឡាញ់កម្ពុជា លោកស្រីគិតថា គួរតែធ្វើអ្វីម្យ៉ាងដើម្បីកសាងអនុស្សាវរីយ៍ជាមួយប្រជាជនកម្ពុជា និងជាប្រយោជន៍សម្រាប់សហគមន៍ ។ អង្គការសុបិន្តសហគមន៍កម្ពុជា ក៏ត្រូវបានបង្កើតឡើង ហើយអ្វីដែលលោកស្រីពេញចិត្តសម្រាប់បេសកកម្មរបស់ខ្លួន គឺវិស័យអប់រំ បរិស្ថាន អនាម័យ និងទឹកស្អាត ។ លោកស្រី ស្រឡាញ់កុមារកម្ពុជាខ្លាំងណាស់ ចង់ឃើញអនាគតដ៏ល្អរបស់កុមារកម្ពុជា សូមឲ្យកុមារកម្ពុជា ខិតខំរៀនសូត្រ ជួបគ្នាឆ្នាំក្រោយ ជាមួយ កង់ ១០០០គ្រឿងថ្មី ផ្សេងទៀត ៕
អត្ថបទ និង រូបភាព៖ ងិន គីមឡេង
