នាព្រឹកថ្ងៃទី១៣ ខែមករា ឆ្នាំ២០២០នេះ នៅសាកលវិទ្យាល័យអង្គរ ខេត្តសៀមរាប មានរៀបចំពិធីបើកបវេសនកាលឆ្នាំសិក្សាថ្មី ២០១៩-២០២០ ក្រោមអធិបតី ឯកឧត្តម សាន វឌ្ឍនា អនុរដ្ឋលេខាធិការ តំណាង ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ទៀ សីហា អភិបាលខេត្តសៀមរាប ឯកឧត្តម មីកាមិ ម៉ាសាហ៊ីរ៉ូ (MKAMI Masahiro) ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា ឯកឧត្តម ណាកាក់ណិ កាស៊ូយូគី (NAKANE Kazuyuk) សមាជិករដ្ឋសភានិងជាអតីតអនុរដ្ឋមន្ត្រីក្រសួងការបរទេសជប៉ុន ឯកឧត្តម ធា គ្រុយ រដ្ឋលេខាធិការក្រសួងសុខាភិបាល និងអ្នកឧកញ៉ា សៀង ណាំ ប្រធានក្រុមប្រឹក្សាសាកលវិទ្យាល័យអង្គរ ព្រមទាំងវត្តមានចូលរួម ពីមន្ត្រីរាជការ សាស្ត្រាចារ្យ និងសិស្សនិស្សិតជាច្រើនរូប។
មានប្រសាសន៍ក្នុងឱកាសនោះ ឯកឧត្តម សាន វឌ្ឍនា បានលើកឡើងថា ក្រសួងអប់រំ យុវជន និងកីឡា បានដាក់ចេញនូវអភិក្រម៤ចំណុច សម្រាប់ការអភិវឌ្ឍវិស័យអប់រំកម្រិតឧត្តមសិក្សា នៅកម្ពុជា៖
– ទី១ ការប្រែក្លាយក្របខណ្ឌកម្មវិធីសិក្សាផ្តោតលើលទ្ឋផលកម្មវិធីសិក្សា និងផ្តោតលើសមត្ថភាព គឹចង់ឱ្យនិស្សិតក្រោយបញ្ចប់ការសិក្សាមានសមត្ថភាពអាចធ្វើអ្វីមួយបាន ហើយការអភិវឌ្ឍកម្មវិធីសិក្សាគឹត្រូវស្របជាមួយការអភិវឌ្ឍវិស័យឧស្សាហកម្ម និងបរិបទសេដ្ឋកិច្ចវប្បធម៌កម្ពុជា។
– ទី២ ការប្រែក្លាយស្ថាប័នឱ្យក្លាយទៅជាមជ្ឈមណ្ឌលសមភាពនៃការវិវត្តលើជំនាញ និងវិស័យជាក់លាក់ណាមួយ ដែលប្អូនៗមិនគ្រាន់តែជាអ្នកសិក្សានោះទេ ប៉ុន្តែបានចូលរួមផ្តល់ដំណោះស្រាយអ្វីមួយជូនដល់សង្គមជាតិ។
– ទី៣ ការកែលម្អ អភិបាលកិច្ចនិងការគ្រប់គ្រងស្ថាប័ន ពិសេសលើផ្នែករដ្ឋបាល សេវានិស្សិតនិងហិរញ្ញវត្ថុ ព្រមទាំងការបោះជំហានទៅកាន់ការអប់រំបែបឌីជីថល ខណៈដែលឆ្នាំនេះ ក្រសួងអប់រំចាត់ទុកជាឆ្នាំការអប់រំបែបឌីជីថល.
– និងទី៤ ការពង្រឹងគុណភាពអប់រំ នៃសាកលវិទ្យាល័យ តាមរយៈការលើកទឹកចិត្តឲ្យមានភាពជាដៃគូរ ការបញ្ជូននិស្សិត និងសាស្ត្រាចារ្យឲ្យកាន់តែច្រើន ធ្វើការផ្លាស់ប្តូរផ្នែកស្រាវជ្រាវ និងការអប់រំរហូតមានការទទួលស្គាល់គុណភាពអប់រំដោយបទដ្ឋានកម្ពុជាមួយ។
ថ្លែងក្នុងនាមក្រុមប្រឹក្សាខេត្ត និងគណៈអភិបាលខេត្តសៀមរាប ឯកឧត្តម ទៀ សីហា បានថ្លែងអំណរគុណចំពោះ គណៈគ្រប់គ្រងសាកលវិទ្យាល័យអង្គរ និងសាស្ត្រាចារ្យ ទាំងអស់ ដែលបានចំណាយពេលវេលា និងកម្លាំងកាយចិត្ត ជួយបណ្តុះបណ្តាលដល់ប្អូនៗ និស្សិតក្នុង និងក្រៅខេត្ត ឲ្យទទួលបាន នូវចំណេះដឹង បញ្ញាស្មារតី និងបានរួមចំណែកជួយលើកកម្ពស់គុណភាពអប់រំ នៅក្នុងខេត្តសៀមរាប។
ព័ត៌មានជាតិ ថ្មីៗ
ឯកឧត្តមអភិបាលខេត្ត លើកឡើងថា ការងារអប់រំកម្រិតឧត្តមសិក្សា គឺជាត្រីវិស័យមួយយ៉ាងសំខាន់បំផុតក្នុងការកសាងធពជាមនុស្ស ដែលខេត្តសៀមរាបទាំងមូល ត្រូវតែចូលរួម វិនិយោគឱ្យបានខ្លាំងក្លា និងទាមទារជាចាំបាច់ និងបន្ទាន់បំផុតនូវការចូលរួមពីគ្រប់មជ្ឈដ្ឋានជាតិ និងអន្តរជាតិ ទាំងក្នុងកម្រិតថ្នាក់ជាតិ ជាក់ក្រោមជាតិ និងដៃគូអភិវឌ្ឍ ដើម្បីជួយឱ្យគោលដៅ នៃការអប់រំកម្រិតឧត្តមសិក្សា នេះសម្រេចបានជោគជ័យ។
អត្ថបទ និង រូបភាព៖ យូ វង្ស
កែសម្រួល ៖ សេង ផល្លី
