កាលពីរាត្រីថ្ងៃទី១៨ ខែមករា ឆ្នាំ២០២០ នាក្រុងសៀមរាប អង្គការស៊ី ប៊ីយ៉ន បរឌើ (See Beyond Border) បានរៀបចំកម្មវិធីលើកទឹកចិត្តដល់ លោកគ្រូ អ្នកគ្រូឆ្នើម ១២នាក់ មកពីខេត្តសៀមរាប និងបាត់ដំបង ដែលបានបំពេញនូវភារកិច្ចរបស់ខ្លួនបានល្អក្នុងការបង្រៀនលើមុខវិជ្ជាភាសាខ្មែរ និងគណិតវិទ្យា នៅកម្រិតបឋមសិក្សា ។
អង្គការមិនមែនរដ្ឋាភិបាលមួយនេះ បានចូលរួមធ្វើការលើកកម្ពស់ លើផ្នែកវិស័យអប់រំ នៅក្នុងខេត្តសៀមរាប និងបាត់ដំបង តាំងពីឆ្នាំ២០០៩។ ជាមួយនោះ អង្គការនេះ ក៏ត្រូវបានទទួលស្គាល់ដោយក្រសូងអប់រំ របស់ប្រទេសអូស្ដ្រាលី ហើយមានអនុស្សារណៈយោគល់គ្នាជាមួយក្រសួងអប់រំយុវជននិងកីឡាប្រទេសកម្ពុជាផងដែរ។
លោក ភឹង ពៅ ប្រធានអង្គការស៊ី ប៊ីយ៉ន បរឌើ មានប្រសាសន៍ក្នុងឱកាសនោះថា នេះជាលើកទី១ ដែលអង្គការរបស់លោក បានរៀបចំកម្មវិធីផ្ដល់ពានរង្វាន់គ្រូល្អនៅកម្ពុជា។ កម្មវិធីនេះ មានបំណងចង់បង្ហាញពី ពីវីរៈភាពរបស់គ្រូបង្រៀន ដែលគាត់បានប្ដេជ្ញាខ្ពស់ក្នុងការបង្រៀន ដើម្បីធ្វើឲ្យកុមារក្លាយជាធនធានសម្រាប់សង្គម។
លោក ភឹង ពៅ ឲ្យដឹងបន្ថែមទៀតថា កម្មវិធីបែបនេះ ធ្លាប់បានធ្វើនៅប្រទេសអូស្ត្រាលី ក្នុងឱកាសប្រគល់ពានរង្វាន់គ្រូបង្រៀនឆ្នើមនេះ ក៏មានការចូលរួមពីក្រុមគ្រូបង្រៀនអន្ដរជាតិផងដែរ។ ក្នុងចំណោមលោកគ្រូ អ្នកគ្រូឆ្នើម ទាំង១២នាក់ មានស្រី១០នាក់ ពួកគាត់មកពីខេត្ដបាត់ដំបងចំនួន០៦នាក់ និងនៅខេត្ដសៀមរាបចំនួន០៦នាក់។
គួរបញ្ជាក់ថា អង្គការស៊ី ប៊ីយ៉ន បរឌើ កំពុងបំពេញការងារនៅក្នុងប្រទេសកម្ពុជា ក្នុងខេត្តចំនួន២ រួមមានខេត្តសៀមរាប និងបាត់ដំបង និងអនុវត្តន៍ជាមួយសហគមន៍ជនបទ ដែលជាសាលាបឋមសិក្សាជាង៨០សាលា និងមានលោកគ្រូអ្នកគ្រូចូលរួមប្រមាណជាង៤០០នាក់៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
