នាព្រឹកថ្ងៃទី២២ ខែមករា ឆ្នាំ២០២០ នៅក្រុងសៀមរាប អគ្គនាយកដ្ឋានផែនការ នៃក្រសួងផែនការ បានរៀបចំ ពិធីផ្សព្វផ្សាយ ដាក់ឲ្យប្រើប្រាស់ជាផ្លូវការនៅថ្នាក់ក្រោមជាតិ នូវផែនការយុទ្ធសាស្រ្តអភិវឌ្ឍន៍ជាតិ ( ផ.យ.អ.ជ ) ២០១៩-២០២៣ ដែលមានខេត្តចំនួន៨ ចូលរួមមាន សៀមរាប ឧត្តរមានជ័យ បន្ទាយមានជ័យ បាត់ដំបង ប៉ៃលិន ពោធិសាត់ កំពង់ធំ និងព្រះវិហារ។
តាមរយៈចំណារដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្រ្តី នាថ្ងៃទី០២ ខែមករាឆ្នាំ២០១៨ បានផ្តល់សិទ្ធប្រទានដល់ក្រសួងផែនការ ក្នុងការដឹកនាំសម្រេចសម្រួលការរៀបចំ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ។
ផែនការយុទ្ធសាស្រ្តនេះ រៀបចំឡើងដើម្បីសម្រេចគោលដៅធំៗចំនួន៣ ទី១ ដើម្បីវាយតម្លៃអំពីលទ្ធផលរួមនិងបញ្ហាប្រឈមចម្បងៗ ដែលបានកើតឡើងនៅក្នុងការអនុវត្ត ផែនការយុទ្ធសាស្រ្តអភិវឌ្ឍន៍ជាតិ ២០១៤-២០១៨កន្លងទៅ។ ទី២ ដើម្បីកំណត់នូវបណ្តាវិធានការគោលនយោបាយនានា ដល់ក្រសួង-ស្ថាប័នដែលពាក់ព័ន្ធទាំងអស់ សម្រាប់ការអនុវត្តគោលនយោបាយអាទិភាពនានា របស់រាជរដ្ឋាភិបាលកម្ពុជា និងបណ្តារបៀបវារៈសាកល អនុសញ្ញា និងកម្មវិធីអន្តរជាតិនានានៅតាមវិស័យ និងទី៣ ដើម្បីដាក់ចេញនូវប្រព័ន្ធមួយ សម្រាប់តាមដានត្រួតពិនិត្យ និងវាយតម្លៃជាប្រចាំឆ្នាំ នូវការអនុវត្តផែនការទាំងនោះផងដែរ ។
ឯកឧត្តម ទួន ថាវរៈ រដ្ឋលេខាធិការក្រសួងផែនការ មានប្រសាសន៍ក្នុងពិធីនោះថា ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ គឺជាខ្លឺមសារដែលមានចែងនៅក្នុង យុទ្ធសាស្រ្តចតុកោណតំណាក់កាលទី៤។ ដូច្នេះវិធីសាស្រ្តនៃការកំណត់ខ្លឹមសាររបស់ផែនការយុទ្ធសាស្ត្រនេះ ត្រូវបានកែលម្អដោយផ្តោតទៅលើ ទី១ ការផ្សារភា្ជប់នូវសកម្មភាពអាទិភាព ដែលត្រូវបានអនុវត្តដោយក្រសួង-ស្ថាប័ននីមួយៗ ជាមួយនឹងគោលនយោបាយអាទិភាពរបស់រាជរដ្ឋាភិបាលកម្ពុជា។ ទី២ ការកំណត់តម្លៃដែលត្រួវចំណាយលើការអនុវត្តសកម្មភាពទាំងនោះ គឺដោយផ្អែកលើក្របខ័ណ្ឌម៉ាក្រូសេដ្ឋកិច្ច សម្រាប់រយៈពេល៥ឆ្នាំ (២០១៩-២០២៣) និងទី៣ ការប៉ាន់ស្មាននូវបរិមាណធនធានសរុបពីគ្រប់ប្រភពទាំងអស់ ដែលអាចមាន ឬ ដែលចាំបាច់ត្រូវតែធ្វើការកៀរគរ ដើម្បីសម្រេចឲ្យបាន នូវរាល់ចំណុចគោលដៅទាំងឡាយរបស់ផែនការ ។
ចូលរួមក្នុងឱកាសនោះ លោក ង៉ាន់ ភិរុណ អភិបាលរងខេត្តសៀមរាប បានបង្ហាញនូវចំណាប់អារម្មណ៍ថា ផែនការយុទ្ធសាស្រ្តអភិវឌ្ឍន៍ជាតិ (ផ.យ.ក.ជ) ២០១៩- ២០២៣ គឺជាឯកសារដ៏មានសារៈសំខាន់ ដែលត្រូវបានរៀបចំឡើងក្រោមកិច្ចខិតខំប្រឹងប្រែងរួមគ្នារបស់ក្រសួង ស្ថាប័ន នៃរាជរដ្ឋាភិបាលកម្ពុជា និងដោយមាន ការចូលរួមសហការ និងផ្ដល់អនុសាសន៍ពីគ្រប់ភាគីពាក់ព័ន្ធទាំងអស់ តាមរយៈនៃអង្គសិក្ខាសាលា ក៏ដូចជាអង្គប្រជុំនានាច្រើនលើកច្រើនសារនាពេលកន្លងមក ។ ផែនការយុទ្ធសាស្ត្រនេះ បានដើរ តួនាទីយ៉ាងសំខាន់នៅក្នុងការអនុវត្តគោលនយោបាយអាទិភាពនានារបស់រាជរដ្ឋាភិបាល ដែលបានកំណត់នៅក្នុងគោលដៅអាទិភាពនានា ក្នុងយុទ្ធសាស្រ្តចតុកោណដំណាក់កាលទី៤ ដើម្បីឈានទៅសម្រេចបានគោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ២០១៦- ២០៣០ និងចក្ខុវិស័យកម្ពុជា ឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងនៅឆ្នាំ២០៥០ ក្លាយជាប្រទេសអភិវឌ្ឍន៍ ។
គួរបញ្ជាក់ថា ៖ ផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ ក្រសួងផែនការមានគម្រោងធ្វើការផ្សព្វផ្សាយទៅកាន់ថ្នាក់ក្រោមជាតិ ដោយបែងចែកជា៣តំបន់ តាកែវ សៀមរាប និងក្រចេះ។ ខេត្តតាកែវ ជាតំបន់ដំបូងគេ បានផ្សព្វផ្សាយ កាលពីថ្ងៃទី២០ ខែមករា ឆ្នាំ២០២០ កន្លងទៅ ។ នៅតំបន់សៀមរាប គឺជាលើកទី២នៃការផ្សព្វផ្សាយផែនការអភិវឌ្ឍន៍ជាតិ ២០១៩-២០២៣ ដែលមានវត្តមានចូលរួមដោយមន្រ្តីតំណាងរដ្ឋបាលសាលាខេត្ត មន្ទីរជុំវិញខេត្ត សភាពាណិជ្ជកម្មខេត្ត និងអង្គការក្រៅរដ្ឋាភិបាលជាច្រើនរូប ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
