អ្នកស្រី ខ្លួន សូនី ជាប្រជាពលរដ្ឋម្នាក់ ក្នុងចំណោមប្រជាពលរដ្ឋ២នាក់ ដែលកំពុងប្រើប្រាស់សម្ភារពីបុរាណសម្រាប់កិនស្រូវផលិតអង្ករ មានទីលំនៅភូមិជប់ ក្នុងឃុំខ្នារពោធិ ស្រុកសូទ្រនិគម បានឱ្យដឹងថា បច្ចុប្បន្ននេះដោយសារប្រទេសមានការរីកចម្រើន ការផលិតអង្ករសម្រាប់ទទួលទានប្រចាំថ្ងៃ ប្រជាពលរដ្ឋភាគច្រើនបំផុតបានប្រើប្រាស់ម៉ាស៊ីនកិនស្រូវ ព្រោះវាមានភាពងាយស្រួល លឿនឆាប់រហ័ស និងចំណេញពេលវេលា ប៉ុន្តែសម្រាប់អ្នកស្រី គឺបានរក្សាទុកសម្ភារប្រើប្រាស់ពីបុរាណសម្រាប់ផលិតអង្ករ មានដូចជាត្បាលកិនស្រូវ និង ក្តឿងសម្រាប់ជាន់អង្ករ ។
អ្នកស្រី ខ្លួន សូនី បានឱ្យដឹងទៀតថា មូលហេតុដែលអ្នកស្រីបន្តប្រើប្រាស់សម្ភារនេះ គឺទី១. ទុកសម្រាប់ផលិតអង្ករសម្រូប និង អង្ករសម្រិត សម្រាប់ហូបខ្លួនឯង និង ទី២ទុកសម្រាប់ឱ្យក្មេងៗជំនាន់ក្រោយបានឃើញ បានស្គាល់ និងបានសិក្សាឈ្វេងយល់ ព្រោះសម្ភារទាំងនេះ បច្ចុប្បន្នមិនសូវមានអ្នកប្រើប្រាស់ ហើយក៏ស្ទើរតែបាត់បង់ដែរ ដែលធ្វើឱ្យយុវជនមួយចំនួនមិនដែលធ្លាប់ស្គាល់នោះទេ ជាពិសេសក្មេងដែលរស់នៅទីក្រុង ហើយចំពោះសម្ភារប្រើប្រាស់ពីបុរាណសម្រាប់ផលិតជាអង្ករនេះ ក៏ទទួលបានការចាប់អារម្មណ៍ជាខ្លាំងពីសំណាក់ភ្ញៀវទេសចរបរទេសផងដែរ ដោយក្នុង១ខែ គាត់អាចទទួលបានចំណូលពីភ្ញៀវទេសចរប្រមាណជា១០០ដុល្លារអាមេរិក ។
លោក ស្នើ សុខុយ ប្រធានសហគមន៍ទេសចរណ៍ វប្បធម៌ធម្មជាតិ ខ្នារពោធិ ស្រុកសូទ្រនិគម ខេត្តសៀមរាប បានឱ្យដឹងថា នៅក្នុងភូមិជប់នេះ មានប្រជាពលរដ្ឋចំនួន២គ្រួសារបានរក្សាទុកសម្ភារប្រើប្រាស់ពីបុរាណសម្រាប់ផលិតអង្ករនេះ ហើយលោកក៏បានទាក់ទាញ់ភ្ញៀវទេសចរឱ្យមកទស្សនា ដើម្បីឱ្យពួកគាត់ទទួលបានចំណូលពីវិស័យទេសចរណ៍ផងដែរ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
