នៅព្រឹកថ្ងៃទី២២ ខែមករា ឆ្នាំ២០២០ មន្ត្រីជំនាញព្រៃឈើ របស់អាជ្ញាធរជាតិអប្សរា បានកាត់ដើមចំបក់មួយដើម មានអង្កត់ផ្ចិតគល់១.១ម៉ែត្រ និងកម្ពស់១៨ម៉ែត្រ នៅចំណុចច្រកចូលប្រាសាទនាគព័ន្ធ ក្នុងតំបន់រមណីយដ្ឋានអង្គរ។
លោក យិន សុវ៉ាត មន្ត្រីជំនាញមកពីនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានបង្ហាញថា ដើមចំបក់មួយដើមនេះ ងាប់ជាយូរមកហើយ មែក និងគល់របស់វាពុកផុយជាអន្លើ ដែលអាចបាក់ធ្លាក់បង្កហានិភ័យចំពោះភ្ញៀវដើរឆ្លងកាត់ចេញចូលមកទស្សនាប្រាសាទនាគព័ន្ធនេះ។
មន្ត្រីជំនាញរូបនេះ បញ្ជាក់ថា ដើម្បីបញ្ចៀសគ្រោះថ្នាក់ផ្សេងៗអំឡុងពេលកាត់ដើមចំបក់នេះ ក្រុមការងារ បានរៀបចំផ្លូវវាង ដើម្បីសម្រួលដល់ភ្ញៀវឆ្លងកាត់។
អាជ្ញាធរជាតិអប្សរា សូមឲ្យភ្ញៀវជាតិ និងអន្តរជាតិទាំងអស់ មានការយោគយល់ អធ្យាស្រ័យ និងចូលរួមសហការ ដើម្បីឱ្យការអនុវត្តការងារបានរលូន និងសុវត្ថិភាពខ្ពស់ទាំងអស់គ្នា។
គួរបញ្ជាក់ថា នេះជាការងារប្រចាំថ្ងៃរបស់អាជ្ញាធរជាតិអប្សរា ដើម្បីថែរក្សាទេសភាពវប្បធម៌ ក៏ដូចជាថែរក្សាបរិស្ថានក្នុងរមណីយដ្ឋានអង្គរ៕
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
