កាលពីថ្ងៃទី២២ ខែមករា ឆ្នាំ២០២០ នៅរដ្ឋបាលខេត្តសៀមរាប បានរៀបចំកិច្ចប្រជុំបន្ទាន់មួយ ជាមួយនឹងក្រុមហ៊ុនទទួលសាងសង់ផ្លូវ លើកំណាត់ផ្លូវជាតិលេខ៦ ស្ថិតក្នុងភូមិសាស្ត្រស្រុកពួក និងស្រុកក្រឡាញ់ ដើម្បីដោះស្រាយបញ្ហាកកស្ទះចរាចរណ៍ ដែលបានកើតឡើងជារៀងរាល់ថ្ងៃ។
កិច្ចប្រជុំនោះ ដឹកនាំដោយ លោក ចឹក គឹមជុន នាយករដ្ឋបាលសាលាខេត្តស្តីទី និងមានការចូលរួមពី លោកប្រធានមន្ទីរសាធារណការ និងដឹកជញ្ជូន លោកអភិបាលស្រុកពួក លោកនាយការិយាល័យនគរបាលចរាចរណ៍ផ្លូវគោក តំណាងក្រុមហ៊ុនសាសង់ និងអ្នកពាក់ព័ន្ធ។
ទន្ទឹមនោះ អង្គប្រជុំបានណែនាំដល់ក្រុមហ៊ុនត្រូវ សហការជាមួយមន្ទីរសាធារណការ និងដឹកជញ្ជូនខេត្ត អាជ្ញាធរស្រុក និងកម្លំាងសមត្ថកិច្ច ដើម្បីដោះស្រាយការកកស្ទះ និងជួយសម្រួលចរាចរណ៍រហូតដល់បញ្ចប់គម្រោង ដោយត្រូវដាក់កម្លាំងសមត្ថកិច្ច (នគរបាល និងកងរាជអាវុធហត្ថ) រួមទាំងបុគ្គលិករបស់ក្រុមហ៊ុននៅចំណុចដើម កណ្តាល និងចំណុចចុងនៃការដ្ឋាន ដើម្បីជួយសម្រួលចរាចរណ៍ ព្រមទាំងត្រូវគិតគូរខ្ពស់អំពីសណ្តាប់ធា្នប់សាធារណៈទូទៅនៅតាមការដ្ឋាននីមួយៗ។ លើសពីនោះ ក្រុមហ៊ុនត្រូវរៀបចំដាក់ស្លាកសញ្ញាចរាចរណ៍ឲ្យបានត្រឹមត្រូវតាមលក្ខណៈបច្ចេកទេស និងបង្កើនចំនួនស្លាកសញ្ញាចរាចរណ៍ទ្វេដងនៅតាមការដ្ឋាន និងពេលយប់ ដើម្បីបញ្ចៀសនូវគ្រោះថ្នាក់ផ្សេងៗ ក៏ដូចជាការកើតឡើងនូវបញ្ហាផ្សេងៗជាយថាហេតុ។
ជាការឆ្លើយតប របស់តំណាងក្រុមហ៊ុនសាងសង់ផ្លូវ ក្រុមហ៊ុននឹងអនុវត្តន៍ធើ្វការអ៊ុតកៅស៊ូ នៅត្រឹមតែប្រវែង ២០០ម៉ែត្រក្នុងមួយលើក ដើម្បីកាត់បន្ថយការកកស្ទះចរាចរណ៍ និង រៀបចំដាក់ស្លាកសញ្ញាចរាចរណ៍បន្ថែមតាមលក្ខណៈបច្ចេកទេស។
អត្ថបទ និង រូបថត ៖ រដ្ឋបាលខេត្ត
កែសម្រួលអត្ថបទ ៖ លោក សេង ផល្លី
