ដីស្រែ ជាង៣ហិកតា ស្ថិតនៅក្នុងភូមិបន្ទាយឈើ សង្កាត់ទឹកវិល ក្រុងសៀមរាប ជាប់របងព្រលានយន្តហោះអន្តរជាតិខេត្តសៀមរាប ត្រូវបានបុគ្គលពីររូប អះអាងថាជាម្ចាស់ដី ធ្វើការឈូសឆាយ ដើម្បីប្រែក្លាយជាដីភូមិ និងប្រកបអាជីវកម្ម ដែលនេះជាអំពើខុសច្បាប់ នេះបើតាមសម្ដីមន្ត្រីជំនាញអាជ្ញាធរជាតិអប្សរា ។
នាព្រឹកថ្ងៃទី២២ខែមករា ឆ្នាំ២០២០នេះ កម្លាំងជំនាញ របស់អាជ្ញាធរជាតិអប្សរា បានចុះធ្វើការហាមឃាត់ សកម្មភាព ការឈូសឆាយដី ដាំដំណាំមួយចំនួន ព្រមទាំងផ្អាកការសាងសង់សំណង់ផ្សេងៗផងដែរ។
ព័ត៌មានជាតិ ថ្មីៗ
នៅព្រឹកដដែលនោះ លោក កុក ឃន ម្ចាស់ដីទំហំជាងពីរហិកតា ដែលមានគម្រោងសាងសង់ភោជនីយដ្ឋាននៅទីតាំងនោះ បានបញ្ជាក់ថា លោកយល់ថា ដោយសារទីតាំងនេះលោកបានធ្វើស្រែជាយូរឆ្នាំណាស់មកហើយ និងគ្រាន់ដាំកូនដើមឈើ ក៏មិនមានការខុសច្បាប់ដែរ។ លោក ទទួលស្គាល់ថា លោកពិតជាមិនបានសុំច្បាប់ និងបានឈូសឆាយដីរបស់ខ្លួន ដែលស្ថិតនៅក្នុងតំបន់បេតិកភណ្ឌ ដែលគ្រប់គ្រងដោយអាជ្ញាធរអប្សរាពិតប្រាកដមែន។ ជាការសហការ លោកយល់ព្រមឲ្យ អាជ្ញាធរជាតិអប្សរាដកកូនឈើទាំងនោះ ប៉ុន្តែដំណាំផ្សេង ព្រមទាំងរោងនិងគ្រែសុំរក្សាទុក ពី ព្រោះវាជាមុខរបរសម្រាប់លក់ដូរ។
ដោយឡែកដី ជាងមួយហិកតាទៀត ដែលជាកម្មសិទ្ធរបស់ លោកហែម ហាន អនុប្រធានភូមិបន្ទាយឈើ លោកបានបញ្ជាក់ថា លោកបានឈូសដីស្រែរបស់លោក ដើម្បីដាំដើមស្វាយ ដោយមិនបានសុំច្បាប់ពីអាជ្ញាធរជាតិអប្សរាពិតមែន ព្រោះគិតថាមិនខុសច្បាប់។ លោកអនុភូមិ បានបដិសេធថា លោកមិនមានគម្រោងពុះដីឡូត៍សម្រាប់លក់ ដូចការលើកឡើងរបស់ពលរដ្ឋក្នុងមូលដ្ឋាននោះទេ។ ប៉ុន្តែដំណាំដែលបានដាំរួចហើយ លោកមិនយល់ព្រមដកចោលនោះឡើយ។
តាមការលើកឡើងរបស់ មន្ត្រីអាជ្ញាធរជាតិអប្សរា ដែលបានចុះទៅទីតាំងដីនោះ កាលពីម្សិលមិញ លោកអនុប្រធានភូមិបន្ទាយឈើ បានប្រមូលប្រជាពលរដ្ឋ និងប្រជាការពារភូមិ មកទីតាំងដី ក្នុងបំណងរារាំង និងប្រើហឹង្សាទៅលើក្រុមអាជ្ញាធរ។ ប៉ុន្តែលោកអនុភូមិ បដិសេធថា គ្រាន់តែជាការហៅ ពួកគាត់មកស្តាប់ការពន្យល់របស់មន្ត្រីអាជ្ញាធរជាតិអប្សរា តែប៉ុណ្ណោះ។
ជុំវិញករណីខាងលើនេះ លោកឡុង កុសល ប្រធាននាយកដ្ឋានសណ្តាប់ធ្នាប់សហប្រត្តិបត្តិការ និងជាអ្នកនាំពាក្យអង្គភាពអាជ្ញាធរអប្សរា បានថ្លែងថា តំបន់បេតិកភណ្ឌ ដែលគ្រប់គ្រងដោយអាជ្ញាធរអប្សរា មិនអនុញាត ឲ្យបុគ្គលណាម្នាក់ធ្វើការបម្រែដីនោះឡើយ។ ការឈូសឲ្យប្រែក្លាយពីដីស្រែ ទៅជាដីចំការ ឬដីភូមិនៅក្នុងតំបន់បេតិកភណ្ឌ គឺជាអំពើខុសច្បាប់។
លោកបន្តថា អាជ្ញាធរជាតិអប្សរា ចាំបាច់ត្រូវទប់ស្កាត់ ព្រោះករណីនេះ ដំបូងគឺជាដីស្រែ ក្រោយមកប្រែជាដីចំការ ប៉ុន្តែថ្ងៃក្រោយប្រាកដជាកើតភូមិ និងឈានដល់ភោជនីយដ្ឋានជាក់ជាមិនខាន។
អ្នកនាំពាក្យរូបនេះបញ្ជាក់ថា ខាងអាជ្ញាធរ នឹងព្យាយាមសហការជាមួយម្ចាស់ខាងលើ ដកកូនឈើទាំងនោះចេញ។ ប៉ុន្តែបើសិនជាពួកគាត់មិនសហការ យើងនិងសុំគោលការច្បាប់ដើម្បីអនុវត្តវិធានការ បើពុំនោះទេ ព្រៃក្នុងតំបន់បេតិកភណ្ឌ អាចក្លាយជាវាលរហោឋាន ដោយសាតែផ្តើមចេញពីការបម្រែដី៕
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
