នៅវិទ្យាល័យហ៊ុនសែន ស្វាយធំ ស្ថិតក្នុងស្រុកប្រាសាទបាគង នាព្រឹកថ្ងៃទី១៥ ខែវិច្ឆិកា ឆ្នាំ២០១៨នេះ ក្រុមការងារសាខាកាកបាទក្រហមកម្ពុជាខេត្តសៀមរាប បានរៀបចំពិធីប្រគល់រង្វាន់ជ័យលាភី លើផ្ទាំងគំនូរ ក្រោមប្រធានបទ សិទ្ធិជនពិការក្នុងសុវត្ថិភាពចរាចរណ៍និងសង្គម ចំពោះបេក្ខជនជាម្ចាស់គំនូរចំនួន៣ផ្ទាំង ដែលបានជាប់ចំណាត់ថ្នាក់ពីលេខ១ដល់លេខ៣។
បន្ទាប់ពីក្រុមប្រតិបត្តិរបស់សាខាកាកបាទក្រហមកម្ពុជាខេត្តសៀមរាប បានរៀបចំ និងបំផុសគំនិតគូរគំនូរនេះឡើង ក្នុងគោលបំណងបង្កើនស្មារតីយល់ដឹង និងឈានទៅលើកកម្ពស់សិទ្ឋិជនពិការក្នុងការងារសុវត្ថិភាពចរាចរណ៍និងសង្គមក្នុងជួរយុវជនកាកបាទក្រហមកម្ពុជានិងសិស្សានុសិស្សក្នុងខេត្ត ហើយមានយុវជនសាខាកាកបាទក្រហមកម្ពុជាខេត្តសៀមរាប និងសិស្សានុសិស្សមកពីវិទ្យាល័យចំនួន ៨ក្នុងខេត្តសៀមរាប សរុបចំនួន៩២នាក់ បានចូលរួមគូរគំនូរប្រឡងដណ្តើមជ័យលាភី របស់សាខាកាកបាទក្រហមកម្ពុជាខេត្តសៀមរាប តាមប្រធានបទដែលបានកំណត់ ហើយគំនូរនីមួយៗ បានបង្ហាញអំពីគំនិតនិងចំណេះដឹង ទាក់ទងទៅនឹងជនពិការ ដែលបណ្តាលមកពីមូលហេតុផ្សេងៗ និងបញ្ហាប្រឈមរបស់ជនពិការក្នុងការធ្វើដំណើរប្រកបរបរប្រចាំថ្ងៃ។
មានប្រសាសន៍ក្នុងឱកាសនោះ ឯកឧត្តម សម កុសល នាយក នៃនាយកដ្ឋានធនធានមនុស្សកាកបាទក្រហមកម្ពុជា បានសម្ដែងនូវមោទនភាព ចំពោះស្នាដៃគំនូរទាំងអស់នេះ ជាចំណេះដឹងផ្នែកសម្បជញ្ញៈថ្មីមួយ ដែលយល់ពីអារម្មណ៍អ្នកពិការ ទើបផលិតចេញជារូបភាពដ៏គួរឱ្យកោតសរសើរនេះឡើង ជាពិសេសក្មួយៗបានយល់និងស្គាល់អ្វីជាសកម្មភាពមនុស្សធម៌របស់កាកបាទក្រហមកម្ពុជា ហើយសកម្មភាពរបស់ក្មួយៗនេះ បង្ហាញថា ក្មួយៗនឹងចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់សិទ្ឋជនពិការ និងតម្លៃមនុស្សធម៌តាមរយៈគោលការណ៍របស់កាកបាទក្រហមកម្ពុជា ដូច្នេះតាមរយៈនេះ សំណូមពរឱ្យក្មួយៗ យុវជនកាកបាទក្រហមកម្ពុជា ត្រូវប្រកាន់ខ្ជាប់នូវទស្សនៈវិស័យនេះ ដើម្បីធ្វើជាគំរូនៅក្នុងសហគមន៍ តាមរយៈតួនាទីជំនាញសំខាន់មួយ គឺ មិត្តអប់រំមិត្ត ធ្វើយ៉ាងណាជំរុញឱ្យយុទ្ឋសាស្ត្ររបស់កាកបាទក្រហមកម្ពុជាអនុវត្តបានគ្រប់ជ្រុងជ្រោយ និងសម្រេចតាមគោលដៅនៅឆ្នាំ២០២០។
លោកជំទាវ គួយណាលីន អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប មានប្រសាសន៍ថា នេះជាលើកទី១ ដែលសាខាកាកបាទក្រហមកម្ពុជាខេត្តសៀមរាប បានរៀបចំកម្មវិធីនេះឡើង ហើយតាមរយៈស្នាដៃដែលផ្តើមចេញពីការចូលរួមជួយបំផុសគំនិតពីសំណាក់លោកគ្រូអ្នកគ្រូជាទីប្រឹក្សាយុវជនកាកបាទក្រហម និងការស្វែងយល់ពីខ្លឹមសារទាក់ទងទៅនឹងសិទ្ធិជនពិការ ក្នុងសុវត្ថិភាពចរាចរណ៍និងសង្គម របស់ប្អូនៗ បានបង្ហាញឱ្យឃើញពីសកម្មភាពដែលសហគមន៍ជួយដល់ជនពិការក្នុងការធ្វើដំណើរ ការរៀបចំទីជម្រាលតាមសាលារៀន ការចូលរួមក្នុងសកម្មភាពសង្គមជាដើម ពិតជាមានអត្ថន័យល្អ និងជាសារមួយជួយបង្កើនការយល់ដឹងអំពីផលវិបាកនៃគ្រោះថ្នាក់ចរាចរណ៍ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#កាកបាទក្រហម
