នៅក្នុងឱកាសចុះពិនិត្យមើលកាផ្តល់សេវាសុខភាពនៅមន្ទីរពេទ្យបង្អែកខេត្តសៀមរាប កាលពីរសៀលថ្ងៃទី១៤ ខែវិច្ឆិកា ឆ្នាំ២០១៨ ម្សិលមិញនេះ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា មន្ទីរពេទ្យបង្អែកខេត្តសៀមរាប ជាមន្ទីរពេទ្យមួយដែលមានអ្នកជំងឺច្រើនលើសលុបបានមកទទួលសេវា និងសម្រាកព្យាបាលជំងឺ នៅមន្ទីរពេទ្យនេះ ទាំងអ្នកនៅក្នុងខេត្តសៀមរាប និងបណ្តាខេត្តនានានៅជុំវិញ ដោយសារតែមន្ទីរពេទ្យបង្អែកខេត្តសៀមរាប មានការផ្តល់សេវាមួយចំនួនដែលមន្ទីរពេទ្យបង្អែកខេត្តផ្សេងៗមិនទាន់មាន ដូចជាការលាងឈាម និង ការវះកាត់ធំៗជាដើម ។
ឯកឧត្តមរដ្ឋមន្ត្រី បានបញ្ជាក់ទៀតថា ដោយមើលឃើញពីកំណើនអ្នកជំងឺ មកទទួលសេវានិងសម្រាកព្យាបាលជំងឺច្រើនលើសចំណុះគ្រែដែលមន្ទីរពេទ្យមាននោះ ឯកឧត្តមនឹងផ្តល់គ្រែសម្រាប់អ្នកជំងឺសម្រាកព្យាបាលមកមន្ទីរពេទ្យបង្អែកខេត្តសៀមរាបនេះបន្ថែមមួយចំនួនទៀត ដែលនឹងដឹកមកដល់ឆាប់ៗនេះ ជាពិសេសក្រសួងសុខាភិបាល នឹងត្រូវពង្រីកមន្ទីរពេទ្យបង្អែកខេត្តសៀមរាបនេះ ឱ្យក្លាយទៅជាមន្ទីរពេទ្យទំនើបមួយនៅកម្ពុជា និងបំពេញទៅតាមត្រូវការរបស់ប្រជាពលរដ្ឋ ដូច្នេះនៅពេលឆាប់ៗខាងមុខនេះ អគារធំៗចំនួន២ រួមជាមួយសម្ភារបរិក្ខាពេទ្យទំនើប នឹងត្រូវបានសាងសង់ឡើង ក្រោមជំនួយនៃប្រទេសជប៉ុន និងកូរ៉េ ។
ឯកឧត្តម ម៉ម ប៊ុនហេង បានបញ្ជាក់បន្ថែមទៀតថា នៅមន្ទីរពេទ្យបង្អែកខេត្តសៀមរាប មានការផ្តល់សេវាសុខភាពជូនប្រជាពលរដ្ឋស្មើៗគ្នាទាំងអ្នកមាន និងអ្នកក្រ ជាពិសេសអ្នកក្រ គឺមានមូលនិធិសមធ៌ម សម្រាប់ជួយដល់ពួកគាត់ ប៉ុន្តែប្រការសំខាន់នោះ គឺសូមឱ្យមន្ត្រីពេទ្យទាំងអស់ ត្រូវពង្រឹងសមត្ថភាពបច្ចេកទេសជំនាញ ក្រមសីលធម៌វិជ្ជាជីវៈ និង ត្រូវមានសុជីវធម៌ដល់អ្នកជំងឺជានិច្ច ។
ព័ត៌មានជាតិ ថ្មីៗ
បើតាមប្រសាសន៍របស់លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប បានឱ្យដឹងថា បច្ចុប្បន្ននេះ នៅក្នុងមន្ទីរពេទ្យបង្អែកខេត្តសៀមរាប ក្នុង១ខែៗ មានអ្នកជំងឺមកសម្រាកព្យាបាលចំនួន២.០០០នាក់ , អ្នកមកពិនិត្យពិគ្រោះជំងឺ៦.០០០នាក់ និងផ្នែកវះកាត់ចំនួន៥០០នាក់ ខណៈគ្រែដែលមន្ទីរពេទ្យមានចំនួនតែ៣០០គ្រែប៉ុណ្ណោះ ដូច្នេះអ្នកជំងឺខ្លះត្រូវសម្រាកនៅលើការ៉ូ ហើយយ៉ាងយូររយៈពេល ៣ឆ្នាំទៀត មន្ទីរពេទ្យបង្អែកខេត្តសៀមរាប នឹងក្លាយទៅជាមន្ទីរពេទ្យទំនើបមួយនៅកម្ពុជា ទាំងផ្នែកការព្យាបាលជំងឺទូទៅ និងផ្នែកវះកាត់ ដោយសារតែមន្ទីរពេទ្យមួយនេះមានសម្ភារបរិក្ខាពេទ្យទំនើបៗ ជាពិសេសសម្ភារមកពីជប៉ុន និងកូរ៉េ ៕
អត្ថបទ និង រូបថត ៖ លោក ងិន គឹមឡេង និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#មន្ទីរពេទ្យបង្អែកខេត្តសៀមរាប
