មានប្រសាសន៍ក្នុងកិច្ចប្រជុំបូកសរុបលទ្ធផលការងារប្រចាំសប្តាហ៍ កាលពីព្រឹកថ្ងៃទី១៥ ខែវិច្ឆិកា ឆ្នាំ២០១៨នេះ លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការនគរបាលខេត្តសៀមរាប បានឲ្យដឹងថា ដើម្បីចូលរួមអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលជាទំនៀមទម្លាប់ វប្បធម៌ និងប្រពៃណីជាតិយើង ហើយដើម្បីធ្វើឲ្យព្រះរាជពិធីបុណ្យនេះ កាន់តែមានភាពអធិកអធម រដ្ឋបាលខេត្តសៀមរាប នឹងរៀបចំការប្រណាំងអុំទូក-ង នៅតាមបណ្ដោយដងស្ទឹងសៀមរាប ចន្លោះពីស្ពានថ្មព្រះរាជដំណាក់ ដល់ស្ពានថ្មវត្តព្រះរាជបូព៌ នាថ្ងៃទី២១ និងថ្ងៃទី២២ ខែវិច្ឆិកា ឆ្នាំ២០១៨នេះ ។
លោកឧត្តមសេនីយ៍ទោ ទិត្យ ណារ៉ុង មានប្រសាសន៍ទៀតថា ដើម្បីឲ្យដំណើរការរៀបចំការប្រណាំងអុំទូក-ងនេះ ប្រព្រឹត្តទៅបានល្អប្រសើរនោះ ភារកិច្ចបន្តនិងចំពោះមុខនេះ សូមឲ្យកម្លាំងនគរបាលយើងទាំងអស់ ចាប់ពីថ្នាក់ខេត្តរហូតដល់ក្រុងស្រុក ឃុំសង្កាត់ ត្រូវបន្តការគ្រប់គ្រង់កម្លាំងក្រោមឱវាទ និង ត្រៀមកម្លាំងជានិច្ច តាមដានត្រួតពិនិត្យរាល់សភាពការណ៍ ព្រមទាំងត្រៀមកម្លាំងក្នុងការការពារ ធានាសន្តិសុខ សុវត្ថិភាព និងសណ្តាប់ធ្នាប់ ជូនថ្នាក់ដឹកនាំប្រតិភូជាតិ អន្តរជាតិ ភ្ញៀវទេសចរណ៍ជាតិ និងអន្តរជាតិ ដែលបានអញ្ជើញមកចូលរួមក្នុងកម្មវិធីនេះ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#នគរបាលខេត្តសៀមរាប
#អុំទូក
