ថ្លែងក្នុងឱកាសសម្ពោធបើកឱ្យដំណើរការជាផ្លូវការមជ្ឈមណ្ឌលហេរីថេកវ៉ក (The Heritage Walk)នៅក្នុងក្រុងសៀមរាប នាថ្ងៃទី១៦ ខែវិច្ឆិកា ឆ្នាំ២០១៨ ឯកឧត្តមបណ្ឌិត ឃឹម ប៊ុនសុង អភិបាលខេត្ត បានមានប្រសាសន៍គាំទ្រនិងជម្រុញបន្ថែមដោយបានផ្តល់អនុសាសន៍មួយចំនួន ដល់ផ្នែកឯកជន ដែលកំពុងប្រកបអាជីវកម្ម និងមានការរីកដុះដាលជាបន្តបន្ទាប់ក្នុងខេត្តសៀមរាប ត្រូវពង្រឹងគុណភាពសេវាកម្ម បន្តចូលរួមដល់កិច្ចការពារបរិស្ថាន ដើម្បីនិរន្តរភាពគោលដៅទេសចរណ៍ស្អាត និងបៃតង និងត្រូវចូលរួមដល់ការជម្រុញការប្រើប្រាស់ផលិតផលក្នុងស្រុកផងដែរ។
ឯកឧត្តមអភិបាលខេត្ត បានមានប្រសាសន៍ថា៖ ដោយមានគោលនយោបាយ និងយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ រាជរដ្ឋាភិបាលបានធ្វើការពុះពារជំនះលើឧបសគ្គធំៗ ដឹកនាំជោគវាសនាកម្ពុជាឈានទៅសម្រេចបានសមិទ្ធផលជាច្រើន និងជោគជ័យយ៉ាងត្រចះត្រចង់ ក្នុងកិច្ចអភិវឌ្ឍសេដ្ឋកិច្ចសង្គម ដែលនេះជាបុព្វហេតុធ្វើជីវភាពប្រជាពលរដ្ឋមានភាពល្អប្រសើរ និងកាត់បន្ថយភាពក្រីក្ររបស់ប្រជាពលរដ្ឋជាបន្តបន្ទាប់។
ឯកឧត្តម បញ្ជាក់ថា៖ ការរីកចម្រើនរបស់ខេត្តសៀមរាបលើគ្រប់វិស័យ កំពុងរួមចំណែកកសាងសេដ្ឋកិច្ចសង្គមជាតិ លើកកម្ពស់ជីវភាពជូនប្រជាពលរដ្ឋយើងជាបន្តបន្ទាប់ តាមរយៈការជួយសម្របសម្រួល ការលើកទឹកចិត្ត និងកត្តាជម្រុញផ្សេងៗទៀត។ តាមការសង្កេតសន្ទុះសេដ្ឋកិច្ចរបស់ខេត្ត ក្នុងរយៈពេល១០ឆ្នាំចុងក្រោយនេះ ឃើញថាមានកំណើន ឈានឡើងយ៉ាងខ្លាំង ដែលជាផលវិជ្ជមាន ដល់ជីវភាពរស់នៅរបស់ប្រជាពលរដ្ឋក្នុងខេត្តកាន់តែប្រសើរ សេវាកម្មផ្សេងៗកាន់តែមានប្រសិទ្ធភាព និងសកម្មភាពផុសផុលទ្វេរឡើងជារៀងរាល់ឆ្នាំ។
ឯកឧត្តម ឃឹម ប៊ុនសុង បានថ្លែងវាយតម្លៃខ្ពស់ចំពោះការខិតខំប្រឹងប្រែងរបស់ ម្ចាស់ភាគហ៊ុនទាំងអស់ ក្នុងការវិនិយោគ មជ្ឈមណ្ឌល ហេរីថេកវ៉ក (The Heritage Walk) ដែលវាជាសមិទ្ធផល ដ៏ថ្មីស្រឡាងនៃវិស័យទេសចរណ៍ របស់ខេត្តសៀមរាប ដែលត្រូវបានសាងសង់ឡើងដោយគោរពតាមរចនាបទរបស់ខ្មែរ ស្របពេល ដែលខេត្តសៀមរាបយើង មានតម្រូវការ នូវមជ្ឈមណ្ឌលទំនើប សម្រាប់លក់នូវផលិតផលខ្មែរ និងផលិតផលល្បីៗ នាំចូលពីបរទេសដែលមានគុណភាព ដែលកត្តានេះគឺជាការទាក់ទាញភ្ញៀវទេសចរជាតិ និងអន្តរជាតិ ដែលចូលមកទស្សនាខេត្តសៀមរាប ជាពិសេសបំពេញនូវតម្រូវការ របស់បងប្អូនប្រជាពលរដ្ឋក្នុងខេត្តសៀមរាប ជាមួយនឹងសេវាកម្មផ្សេងៗ ហើយមជ្ឈមណ្ឌលនេះ គឺពិតជាបានរួមចំណែកដល់កិច្ចការអភិវឌ្ឍន៍វិស័យទេសចរណ៍ ដែលរាជរដ្ឋាភិបាលកម្ពុជា ក៏ដូចជាក្រសួងទេសចរណ៍ និងអាជ្ញាធរខេត្ត បាននិងកំពុងយកចិត្តទុកដាក់ ជាពិសេសបានផ្តល់ការងារជូនកម្មករនិយោជិតក្នុងខេត្ត ជាង១០០០នាក់។
បើតាមរបាយការណ៍របស់លោកស្រី ធៀង កតិកា ប្រធានប្រតិបត្តិក្រុមហ៊ុន Metro Lifestyle Development បង្ហាញថា៖
មជ្ឈមណ្ឌល The Heritage Walk ពុំមែនជាផ្សារទំនើបទេ តែជាមជ្ឈមណ្ឌលកម្សាន្តបែបប្រមូលផ្តុំមួយដែលផ្តល់នូវបរិយាកាសដ៏ប្រពៃ និងបរិស្ថានល្អ សម្រាប់ភ្ញៀវទេសចរជាតិ និងអន្តរជាតិ មកលំហែកម្សាន្ត ទទួលទានអាហារ ទស្សនាខ្សែភាពយន្ត ទិញនូវទំនិញផ្សេងៗ ក្នុងនោះដៃគូពាណិជ្ជរបស់យើងសុទ្ធតែមានបទពិសោធន៍ នៅក្នុងទីផ្សារ ក៏ដូចជាម៉ាកល្បីៗ លំដាប់អន្តរជាតិ និងជាមជ្ឈមណ្ឌលមួយចូលរួមចំណែកយ៉ាងសំខាន់ក្នុងការអភិវឌ្ឍន៍វិស័យសេដ្ឋកិច្ចក្នុងខេត្តសៀមរាប។
លោកស្រីបន្ថែមថា៖លើសពីនេះមជ្ឈមណ្ឌល The Heritage Walk មានសក្តានុពលក្នុងការធ្វើឱ្យទេសចរណ៍របស់ខេត្តសៀមរាប កាន់តែសំបូរបែប ជាសមិទ្ធផលថ្មីមួយ ដែលទាក់ទាញឱ្យភ្ញៀវទេសចរជាតិ និងអន្តរជាតិមកទស្សនាតំបន់ទេសចរណ៍ក្នុងខេត្តសៀមរាប កាន់ញឹកញាប់ ហើយចំណាយពេលបន្តស្នាក់នៅកម្សាន្តកាន់តែយូរក្នុងខេត្តសៀមរាប។
សូមបញ្ជាក់ថា៖ មជ្ឈមណ្ឌល The Heritage Walk ស្ថិតនៅ ត្រង់ចំណុចប្រសព្វនៃផ្លូវ ជាតិលេខ៦ និងផ្លូវស៊ីវុត្ថា ក្បែរសួនច្បារព្រះរាជដំណាក់ និងទីតាំងសក្ការៈព្រះអង្គចេកព្រះអង្គចម ខេត្តសៀមរាប ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី