បន្ទាប់ពីធនាគារអភិវឌ្ឍន៍អាស៊ី ហៅកាត់ថា ADB បានចេញរបាយការណ៍ព្យាករណ៍ពីការបន្តកើនឡើងនៃសេដ្ឋកិច្ចកម្ពុជានៅឆ្នាំ២០១៦ កម្ពុជានៅតែបន្តសម្រេចបាន ស្ថេរភាពម៉ាក្រូសេដ្ឋកិច្ច និងកំណើនសេដ្ឋកិច្ច ខ្ពស់ជាមធ្យម ក្នុងកម្រិត៧,៧% ក្នុងមួយឆ្នាំ ហើយសេដ្ឋកិច្ចកម្ពុជា ត្រូវបានរំពឹងថា នៅបន្ដកំណើនរឹងមាំ ក្នុងរង្វង់អត្រា៧,២% ក្នុងឆ្នាំ២០១៨។
ទន្ទឹមនឹងនោះ ផលិតផលសរុបក្នុងស្រុក សម្រាប់ប្រជាជនម្នាក់ៗ បានកើនឡើងជាង ៧ដង គឺប្រមាណជាង២០០ដុល្លារអាមេរិក នៅឆ្នាំ១៩៩២ ដល់ជិតប្រមាណ១៥០០ដុល្លារ អាមេរិកនៅ ឆ្នាំ២០១៨ ចំណែកឯអត្រាភាពក្រីក្រ បានធ្លាក់ចុះពីប្រមាណ៥០% ក្នុងឆ្នាំ១៩៩២ មកត្រឹមរង្វង់១៣,៥% ក្នុងឆ្នាំ២០១៤ ទោះបីត្រូវជួបប្រទះនូវបញ្ហាប្រឈម និងហានិភ័យ ពីខាងក្រៅ មួយចំនួនក៏ដោយ។
មានប្រសាសន៍ នាព្រឹកថ្ងៃទី ១៦ ខែ វិច្ឆិកា ឆ្នាំ២០១៨នេះ នៅមន្ទីរផែនការខេត្តសៀមរាប ក្នុងកិច្ចប្រជុំប្រកាសផ្សព្វផ្សាយលទ្ធផលផលិតផលក្នុងស្រុកសរុប (GDP) នៅខេត្តសៀមរាប ឆ្នាំ២០១៧ ឯកឧត្តម ទុយ ចំរើន អនុរដ្ឋលេខាធិការ នៃក្រសួងផែនការ បានបញ្ជាក់ថា វិស័យសំខាន់ៗ ដែលបានជម្រុញឲ្យសេដ្ឋកិច្ចកម្ពុជាមានកំណើន រួមមាន វិស័យ សំណង់ , វាយនភ័ណ្ឌកាត់ដេរសំលៀកបំពាក់ , ទេសចរណ៍ និង វិស័យកសិកម្ម។ ឆ្លើយតបនឹងការរីកចម្រើននេះ រាជរដ្ឋាភិបាលបានផ្តល់អាទិភាពខ្ពស់ ដល់វិស័យអប់រំ , សុខាភិបាល សំណាញ់សុវត្ថិភាព(ប.ស.ស) ជូនដល់មន្ត្រីរាជការ និង វិយោជិតក្នុងវិស័យឯកជន ព្រមទាំងបានការតម្លើងប្រាក់បៀវត្សជូន មន្ត្រីរាជការ ប្រាក់បៀវត្សគោលជូនវិស័យកាត់ដេរ និង កាត់បន្ថយភាពក្រីក្រជាមធ្យម ១%ក្នុងមួយឆ្នាំ។
ឯកឧត្តម ទុយ ចំរើន ក៏បានគូសបញ្ជាក់ថា ក្នុងនីតិកាលទី៦នេះ រាជរដ្ឋាភិបាល ដឹកនាំដោយសម្ដេចអគ្គមហាសេនាបតីតេជោ ហ៊ុន សែន នឹងនៅតែបន្តអនុវត្តយុទ្ធសាស្ត្រចតុកោណ ជំហានទី៤ គឺ សំដៅសម្រេចបានឋានៈជា ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និង ជា ប្រទេសមានប្រាក់ចំណូលខ្ពស់នៅឆ្នាំ២០៥០ ជាមួយនឹងការរក្សាកំណើនសេដ្ឋកិច្ចក្នុងរង្វង់៧% រក្សាស្ថេរភាពថ្លៃ និង អត្រាប្តូរប្រាក់ បង្កើនការងារថ្មីៗ បន្តយកចិត្តទុកដាក់លើវិស័យសង្គមកិច្ច និង កាត់បន្ថយភាពក្រីក្រឲ្យបានជាអតិបរមា។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
