ក្រោយពីគណៈកម្មការរដ្ឋបាលបញ្ចប់នីតិវិធីការចុះបញ្ជីលក្ខណៈជាប្រព័ន្ធរួចមក ក្បាលដីចំនួន៦.៨៥៦ ដែលបានបំពេញនូវលក្ខខ័ណ្ឌគ្រប់គ្រាន់តាមនីតិវិធី ហើយអាចចេញប័ណ្ណកម្មសិទ្ធិក្នុងចំណោមក្បាលដីសរុបទាំងអស់ចំនួន ៨.៣៥៦ ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ត្រូវបានលោក ពិន ប្រាកដ អភិបាលរងខេត្តសៀមរាប ចែកជូនវិញ្ញាបនបត្រសម្គាល់ម្ចាស់អចលនវត្ថុ កាលពីព្រឹកថ្ងៃទី១៩ ខែវិច្ឆិកា ឆ្នាំ២០១៨នេះ ។
លោក ពិន ប្រាកដ មានប្រសាសន៍ថា ជាបទពិសោធន៍ ដើម្បីសំរេចបានដល់ការចេញវិញ្ញាបនប័ត្រសម្គាល់ម្ចាស់អចលនវត្ថុនិមួយៗ គឺមានការងារច្រើនណាស់ ដែលទាមទារនូវការខិតខំប្រឹងប្រែងរបស់មន្ត្រីជំនាញ និងការចូលរួមពីសំណាក់ប្រជាពលរដ្ឋដែលជាម្ចាស់ដី ឬនិង អ្នកកាន់កាប់ដីទាំងអស់ ទាំងដីរដ្ឋ និងដីឯកជន ដូច្នេះតាមរយៈនេះដែរ សូមថ្លែងអំណរគុណដល់បងប្អូនប្រជាពលរដ្ឋជាម្ចាស់ក្បាលដីទាំងអស់ ដែលបានចូលរួមរុះរើរបងបើកផ្លូវ ធ្វើឲ្យការធ្វើដំណើរ និងការប្រកបអាជីវកម្មរបស់បងប្អូនជួបប្រទះតែសុវត្ថិភាព និងចូលរួមធ្វើឲ្យទីក្រុងរបស់យើង មានបណ្តាញផ្លូវកាន់តែធំទូលាយ ព្រមទាំងធ្វើឲ្យមានសុវត្ថិភាព និងសោភ័ណភាពពីមួយថ្ងៃទៅមួយថ្ងៃអត់ឈប់ឈរ។
លោក ពិន ប្រាកដ មានប្រសាសន៍ទៀតថា អាជ្ញាធរខេត្ត បានយកចិត្តទុកដាក់លើការងាររដ្ឋបាលដីធ្លី ដែលជាគន្លឹះដ៏សំខាន់សម្រាប់ឈានទៅរកភាពជោគជ័យ ក្នុងការផ្តល់នូវកម្មសិទ្ធិ និងសិទ្ធិផ្សេងៗទៀតទាំងអស់ ឲ្យបានច្បាស់លាស់ ហើយធ្វើការផ្ទេរសិទ្ធិលើទ្រព្យទាំងនោះជាផ្លូវការ ទប់ស្កាត់ និងដោះស្រាយវិវាទដីធ្លី សំដៅពង្រឹង សុវត្ថិភាពនៃការកាន់កាប់ដីធ្លី ធានាបាននូវទំនុកចិត្ត និងប្រសិទ្ធិភាពនៃទីផ្សារដីធ្លី ព្រមទាំងការគ្រប់គ្រងដីរដ្ឋ ស្របតាមយុទ្ធសាស្ត្រចតុកោណរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា តាមរយៈការដាក់ចេញនូវចក្ខុវិស័យវែងឆ្ងាយដ៏ត្រឹមត្រូវ សម្រាប់ការអភិវឌ្ឍប្រទេសជាតិ រួមជាមួយនឹងគោលនយោបាយ និងយុទ្ធសាស្ត្រ ប្រកបដោយភាពសក្តិសិទ្ធិ ប្រាកដនិយម និងភាពម៉ឹងម៉ាត់ ក្នុងនោះការចុះបញ្ជីដីធ្លីគោរពបាន នូវគោលការណ៍អភិបាលកិច្ចល្អ តម្លាភាព វិមជ្ឈការ និងវិសហមជ្ឈការ និងសមធម៌យេនឌ័រ ដើម្បីបង្កើតបានជាវប្បធម៌នៃការចុះបញ្ជីដីធ្លី និងបង្កើនភាពជឿជាក់លើប្រព័ន្ធចុះបញ្ជីដីធ្លី។
បើតាមការប្រសាសន៍របស់លោក ហ៊ី សាយ ប្រធានមន្ទីររៀបចំដែនដី នគររូបនីយកម្ម សំណង់និងសុរិយោដីខេត្ត បានបញ្ជាក់ថា ចំណែកក្បាលដីមួយចំនួនទៀត ដែលមិនទាន់អាចចេញប័ណ្ណកម្មសិទ្ធិជូនបាននោះ ដោយសារពាក់ព័ន្ធ ៖ ១.ក្បាលដីគ្មានទិន្នន័យ , ២. ជំទាស់តវ៉ាពាក់ព័ន្ធនឹងផ្លូវ ប្រឡាយ , ៣. បណ្តឹងទប់ស្កាត់ និង ៤. ក្បាលដីជាប់បុរាណដ្ឋាន ជាដើម ដូច្នេះចំពោះក្បាលដីជាប់ពាក់ព័ន្ធនឹងទំនាស់នេះ គណៈកម្មការរដ្ឋបាលនឹងបន្តដោះស្រាយជាបន្តបន្ទាប់ទៀត ហើយក្បាលដីពាក់ព័ន្ធនឹងបុរាណដ្ឋាន រដ្ឋបាលខេត្ត បានបន្តសហការជាមួយអាជ្ញាធរជាតិអប្សរា មន្ទីរ និងអង្គភាពពាក់ព័ន្ធ នឹងពិនិត្យដោះស្រាយតាមនីតិវិធីជាបន្ថែមទៀត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#កម្មសិទ្ធិដីធ្លី
