ថ្លែងនៅក្នុងសន្និសីទអន្តរជាតិលើកទី២ ស្តីពីគណិតវិទ្យាអនុវត្តន៍ និងស្ថិតិ នៅខេត្តសៀមរាប នាព្រឹកថ្ងៃទី១៩ ខែវិច្ឆិកាឆ្នាំ២០១៨នេះ លោកបណ្ឌិត ស៊ាម ង៉ុន អនុប្រធានដេប៉ាតឺម៉ង់គណិតវិទ្យា នៃសាកលវិទ្យាល័យភូមិន្ទភ្នំពេញ បានមានប្រសាសន៍ថា សន្និសីទនេះគឺមានសារៈសំខាន់ណាស់សម្រាប់វិស័យអប់រំនៅកម្ពុជា តាមរយៈការបណ្តុះបណ្តាល និងការស្រាវជ្រាវផ្នែកគណិត វិទ្យានៅសាកលវិទ្យាល័យភូមិន្ទភ្នំពេញ និងជួយដល់លោកគ្រូអ្នកគ្រូនៅថ្នាក់ក្រោមផងដែរ ខណៈដែលសម្រាប់ការជួបពិភាក្សានៅក្នុងសន្និសីទអន្តរជាតិនេះ គឺធ្វើការពិភាក្សាដោយផ្តោតសំខាន់ទៅការស្រាវជ្រាវនៅថ្នាក់ឧត្តមសិក្សា រវាងអ្នកស្រាវជ្រាវកម្ពុជាជាមួយអ្នកស្រាវជ្រាវ មកពីបណ្តាប្រទេសចំនួន១០នៅលើពិភពលោក ដូចជា ជប៉ុន កូរ៉េ អូស្ត្រាលី អាហ្វ្រិក ថៃ ជាដើម។
លោកបានបញ្ជាក់ទៀតថា ការស្រាវជ្រាវគណិតវិទ្យានេះ គឺមានសារៈសំខាន់ណាស់សម្រាប់ការប្រើប្រាស់ទូទៅ ហើយបច្ចុប្បន្ននេះ កម្ពុជាកំពុងមានតម្រូវការធនធានមនុស្សក្នុងការសិក្សាស្រាវ ជ្រាវគណិតវិទ្យាអនុវត្តន៍និងស្ថិតិ ខណៈបច្ចុប្បន្នកម្ពុជា មានធនធានមនុស្សផ្នែកនេះប្រមាណ៥ភាគរយប៉ុណ្ណោះ ហើយបច្ចុប្បន្ននេះដេប៉ាតឺម៉ងគណិតវិទ្យា នៃសាកលវិទ្យាល័យភូមិន្ទភ្នំពេញ បានលើកទឹកចិត្តឱ្យយុវជនចូលរួមក្នុងការផ្នែកស្រាវជ្រាវគណិតវិទ្យានេះ ហើយបើគាត់ពូកែខាងសាកលវិទ្យាល័យ និងបញ្ជូនពួកគាត់ទៅរៀននៅក្រៅប្រទេសដោយរកអាហាររូបករណ៍សម្រាប់ពួកគាត់។
បើតាមប្រសាសន៍របស់លោកបណ្ឌិត ឈុន ហុក សាកលវិទ្យាធិការរងនៃសាកលវិទ្យាល័យភូមិន្ទភ្នំពេញ បានបញ្ជាក់ថា គណិតវិទ្យាគឺមានសារៈសំខាន់សម្រាប់មនុស្សប្រើប្រាស់ទូទៅ និងនៅគ្រប់ទីកន្លែង ដូច្នេះការជួបពិភាក្សាគ្នារបស់អ្នកស្រាវជ្រាវអន្តរជាតិនៅពេលនេះ គឺមានសារៈសំខាន់ណាស់ ហើយក្រោយពីការស្រាវជ្រាវនេះត្រូវបានបញ្ចប់ គេនឹងយកទៅចងក្រងជាសៀវភៅមួយប្រាប់អ្នកឱ្យប្រើប្រាស់ ។
លោកបានបញ្ជាក់ ដើម្បីឱ្យយុវជនមានការចាប់អារម្មណ៍មកសិក្សាស្រាវជ្រាវនៅនេះ សាកលវិទ្យាល័យភូមិន្ទភ្នំពេញ និងបង្តើតឱ្យសញ្ញប័ត្រមួយផ្នែកគណិតវិទ្យា ហើយសញ្ញប័ត្រនេះមានប្រសិទ្ធអាចយកទៅធ្វើការនៅផ្នែកឬជំនាញអ្វីក៍បាន៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#គណិតវិទ្យា
