មានប្រសាសន៍ក្នុងឱកាសបើកយុទ្ធនាការសៀមរាបស្អាតជានិច្ច នៅព្រឹកថ្ងៃទី២០ ខែវិច្ឆិកា ឆ្នាំ២០១៨នេះ លោក ទៀ សីហា អភិបាលរងខេត្តសៀមរាប បានបញ្ជាក់ថា គ្មានអ្វីដែលត្រូវខ្មាសចំពោះរឿងរើសសំរាមនេះទេ ក្នុងយុទ្ធនាការយុវជនរើសសំរាមនេះ ហើយខេត្តសៀមរាប គួរក្លាយជាទីក្រុងគំរូដែលគ្មានសំរាមនៅតាមផ្លូវសាធារណ ត្បិតជាក្រុងទេសចរណ៍ដ៏មានសក្កានុពលនៅប្រទេសកម្ពុជា ដូច្នេះពេលត្រឡប់ទៅផ្ទះវិញ យុវជនដែលបានចូលរួមទាំងអស់ ត្រូវជួយផ្សព្វផ្សាយសកម្មភាព ការទុកដាក់សំរាមទៅក្រុមគ្រួសារខ្លួន ទាំងគុណសម្បត្តិ និងគុណវិបត្តិនៃការទុកដាក់សំរាមមិនបានត្រឹមត្រូវ ។
លោក ទៀ សីហា បានបញ្ជាក់ទៀតថា សំរាមគួរតែនៅក្នុងធុងសំរាម មិនគួរពាសវាលពាសកាលទេ ហើយដើម្បីដោះស្រាយបញ្ហានេះ អាជ្ញាធរខេត្តបានត្រៀមធុងសំរាមជិត១ពាន់ធុង ត្រៀមដាក់តាមគោលដៅនានា ក្នុងឱកាសព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក នៅក្នុងខេត្តសៀមរាប ក្នុងឆ្នាំនេះ ដើម្បីបង្កភាពងាយស្រួលដល់ពលរដ្ឋក្នុងការទុកដាក់សំរាមឱ្យបានត្រឹមត្រូវ ។
លោក នួន ពុទ្ធារ៉ា អភិបាលក្រុងសៀមរាប បានឱ្យដឹងថា នៅឆ្នាំនេះរដ្ឋបាលក្រុងសៀមរាប បានរៀបចំសកម្មភាពចំនួន ៣ ត្រៀមដោះស្រាយបញ្ហាសំរាមឱ្យបានប្រសើរជាងរាល់ឆ្នាំ ក្នុងឱកាសបុណ្យអុំទូកនេះ រួមមាន ៖
ទី១. បែងចែកក្រុមហ៊ុនប្រមូលសំរាមចំនួន៣ ដាក់តាមគោលដៅសំខាន់ៗ ដូចជានៅសួនច្បារព្រះរាជដំណាក់ ត្រើយខាងកើត និងខាងលិចស្ទឹងសៀមរាប ,
ទី២. ដាក់ពង្រាយធុងសំរាមជិត ១ពាន់ តាមកន្លែងដែលងាយស្រួលក្នុងការទុកដាក់
ទី៣. ចុះផ្សព្វផ្សាយ អប់រំពលរដ្ឋឱ្យយល់ពីបញ្ហាសំរាម និងឱ្យពួកគេទុកដាក់ឱ្យបានត្រឹមត្រូវផងដែរ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#សំរាម
