លោក ឃឹម ហ្វីណង់ អនុប្រធានសហភាពសហព័ន្ធយុវជនកម្ពុជាខេត្តសៀមរាប បានបញ្ផាក់ថា ឆ្នាំនេះ ជាលើកទី៤ ហើយ ដែលក្រុមគ្រួសារសហភាពសហព័ន្ធយុវជនកម្ពុជាខេត្ត បានចូលរួមរៀបចំព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ដែលប្រារព្ធឡើងនៅខេត្តសៀមរាប ក្នុងគោលបំណងដើម្បីចូលរួមអបអរសាទរ និងបង្កើតកម្មវិធីសប្បាយៗជាច្រើនជូនបងប្អូនជនរួមជាតិដែលបានមកទស្សនានិងចូលរួមពិធីបុណ្យនៅខេត្តសៀមរាប ដូចជាកម្មវិធីជិះទូកកម្សាន្តតាមស្ទឹង , កម្មវិធីតោះៗលេងទឹក , កម្មវិធីប្រដាល់លើអាកាស , កម្មវិធីទាញព្រ័ត្រលើតង់សាប៊ូ , កម្មវិធីកញ្ញាធ្លាក់ទឹក , ពិធីរាំលេងកម្សាន្តជាមួយឌីជេ អមជាមួយការបាញ់ទឹក ព្រមទាំងមានលក់ម្ហូបអាហារឆ្ងាញ់ៗ និងកម្មវិធីមួយចំនួនទៀត ខណៈឆ្នាំ២០១៨នេះ គ្រោងរៀបចំនៅទីតាំងមុខផ្សារអង្គរត្រេដសេនធ័រ ខាងលិចស្ទឹងជិតផ្សារចាស់ ។
លោក ឃឹម ហ្វីណង់ មានប្រសាសន៍យ៉ាងនេះ ក្នុងឱកាសបើកយុទ្ធនាការសំអាតបរិស្ថាន នាព្រឹកថ្ងៃទី២០ ខែវិច្ឆិកា ឆ្នាំ២០១៨នេះ ដើម្បីចូលរួមអបអរសាទរក្នុងឱកាសព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក នៅក្នុងខេត្តសៀមរាប ដែលនឹងប្រព្រឹត្តទៅនៅថ្ងៃទី២១ និង ថ្ងៃទី២២ ខែវិច្ឆិកា ឆ្នាំ២០១៨ ។
លោក ឃឹម ហ្វីណង់ មានប្រសាសន៍ទៀតថា នេះជាលើកទី៩ហើយ ដែលក្រុមគ្រួសារសហភាពសហព័ន្ធយុវជនកម្ពុជាខេត្ត បានធ្វើកម្មវិធីសៀមរាបផ្ទះខ្ញុំ ក្រោមប្រធានបទសម្អាតបរិស្ថាន ក្នុងគោលដៅចម្បងដែលយើងចង់បានទាំងអស់គ្នានោះគឺ ចង់ឲ្យបងប្អូន ប្រជាពលរដ្ឋក្នុងក្រុងសៀមរាប និងប្អូនៗយុវជន បានស្វែងយល់អំពីតម្លៃនៃបរិស្ថាន សោភ័ណភាពស្អាត ការទុកដាក់សំរាម ឬសំណល់នានាឲ្យបានត្រឹមត្រូវ ដើម្បីភាពស្រស់ស្អាត អនាម័យល្អ បរិស្ថានស្អាតរបស់ក្រុងសៀមរាប ដែលចាត់ទុកជាផ្ទះរបស់យើងគ្រប់គ្នា ធ្វើយ៉ាងណាបណ្តុះផ្នត់គំនិតដល់យុវជន ប្អូនៗសិស្សានុសិស្ស ក៏ដូចជាបងប្អូនប្រជាពលរដ្ឋអោយចេះវេចខ្ចប់ និងទុកដាក់សំរាមឲ្យមានរបៀបរៀបរយ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
