បើតាមការបញ្ជាក់របស់អនុគណៈកម្មការបច្ចេកទេសរៀបចំព្រះរាជពិធីប្រណាំងទូក បានឲ្យដឹងថា ក្នុងឱកាសនៃការអបអរសាទរព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក នៅក្នុងខេត្តសៀមរាប ហើយឆ្លងកាត់ ការប្រកួតប្រជែង នៅវេលាល្ងាចថ្ងៃទី២១ និង វេលាព្រឹកថ្ងៃទី២១ ខែវិច្ឆិកា ឆ្នាំ២០១៨មកនេះ បានរកឃើញទូកផ្នែកនារីចំនួន៤ទូក សម្រាប់ប្រកួតយកចំណាត់ថ្នាក់លេខ១ ក្នុងចំណោមទូកចូលរួមសរុបចំនួន៥ទូក និង ទូកផ្នែកបុរសចំនួន៤ទូក សម្រាប់ប្រកួតយកចំណាត់ថ្នាក់លេខ១ ក្នុងចំណោមទូកចូលរួមសរុបចំនួន២៨ទូក ដែលការប្រកួតផ្ដាច់ព្រ័ត្រនេះ នឹងប្រព្រឹត្តទៅនៅវេលារសៀល ថ្ងៃទី២២ ខែវិច្ឆិកា ឆ្នាំ២០១៨នេះ ។
ឈ្មោះទូកផ្នែកនារី ដែលនឹងប្រកួតយកចំណាត់ថ្នាក់លេខ១ រួមមាន ៖
១. អង្គរជុំសែនជ័យ ជាទូកអុំផ្នែកនារី គាំទ្រដោយរដ្ឋបាលស្រុកអង្គរជុំ ,
២.ទូកឈ្មោះ គង់ជ័យបារមីស្រីខ្ទុម ជាទូកអុំផ្នែកនារី គាំទ្រដោយរដ្ឋបាលស្រុកជីក្រែង ,
៣. ទូកឈ្មោះ យាយទេពសំដែងរឹទ្ធិ ជាទូកអុំផ្នែកនារី គាំទ្រដោយសាលាក្រុងសៀមរាប និង
៤. ទូកឈ្មោះ ហង្សច័ន្ទមានជ័យបារមីមហានគរ ជាទូកអុំផ្នែកនារី គាំទ្រដោយសាខាពន្ធដាខេត្តសៀមរាប ។
ឈ្មោះទូកផ្នែកបុរសដែលនឹងប្រកួតយកចំណាត់ថ្នាក់លេខ១ រួមមាន ៖
១. ទូកឈ្មោះ ពាមសាមគ្គីសែនជ័យ ជាទូកអុំផ្នែកបុរស គាំទ្រដោយមន្ទីរអប់រំយុវជននិងកីឡាខេត្ត និង មន្ទីរសុខាភិបាលខេត្តសៀមរាប ,
២.ទូកឈ្មោះ មហាកោសា ជាទូកអុំផ្នែកបុរស គាំទ្រដោយមន្ទីរសាធារណការនិងដឹកជញ្ជូនខេត្ត វត្តព្រះឥន្ធកោសា ប្រជាពលរដ្ឋភូមិបឹងដូនប៉ា និង សាកលវិទ្យាល័យយូស៊ី ,
៣. ទូកឈ្មោះ សូទ្រនិគមសែនជ័យបារមីតាពេជ្យ ជាទូកអុំផ្នែកបុរស គាំទ្រដោយរដ្ឋបាលស្រុកសូទ្រនិគម និង រដ្ឋបាលស្រុកអង្គរធំ និង
៤. ទូកឈ្មោះ គ្រុឌមាសតេជោសែនជ័យ ជាទូកអុំផ្នែកបុរស គាំទ្រដោយកងរាជអាវុធហត្ថខេត្តសៀមរាប ។
មានប្រសាសន៍ក្នុងឱកាសបើកពិធីប្រណាំងទូក-ងនេះ លោក ពៅ ពិសិដ្ឋ ប្រធានអនុគណៈកម្មការបច្ចេកទេសរៀបចំការប្រណាំងទូក-ង ខេត្តសៀមរាប បានឲ្យដឹងថា គណៈកម្មការរៀបចំពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តសៀមរាប នឹងផ្ដល់រង្វាន់ជ័យលាភី ជូនទូកដែលទទួលបានចំណាត់ថ្នាក់ ក្នុងនោះទូកចំណាត់ថ្នាក់លេខ១ ទទួលបានថវិកាចំនួន ៨ លានរៀល , ទូកចំណាត់ថ្នាក់លេខ២ ទទួលបានថវិកាចំនួន ៥លានរៀល , ទូកចំណាត់ថ្នាក់លេខ៣ ទទួលបានថវិកាចំនួន ៣លានរៀល និង ទូកចំណាត់ថ្នាក់លេខ៤ ទទួលបានថវិកាចំនួន ២លានរៀល រីឯទូកបុរស និងទូកនារី មិនបានទទួលចំណាត់ថ្នាក់ នឹងទទួលបានថវិកាចំនួន ៥០ម៉ឺនរៀល ក្នុងមួយទូកៗ ។
លោក ពៅ ពិសិដ្ឋ មានប្រសាសន៍ទៀតថា សរុបទូក ង ទាំងអស់ ដែលបានចូលរួមប្រណាំងអបអរសាទរពិធីបុណ្យប្រពៃណីជាតិ នាឆ្នាំ២០១៨ នេះ មានចំនួន៣៣ទូក ត្រូវបានបែងចែកជា២ផ្នែក គឺទូកផ្នែកនារី មានចំនួន ០៥ ទូក ដែលមានចំណុះ២២នាក់ និង ទូកផ្នែកបុរស មានចំនួន ២៨ ទូក មានចំណុះ២២នាក់ មានកីឡាករ កីឡាការិនី ប្រណាំងទូកសរុបចំនួន ៦១៦នាក់ ក្នុងនោះនារីមានចំនួន១១០នាក់ ព្រមទាំងមានកីឡាករ កីឡាការិនី បំរុងសរុបចំនួន ១៨៦នាក់ ដែលមានអ្នកដឹកនាំទូកចំនួន ៦២នាក់ ហើយចំពោះទូក-ង ណាដែលមានចំណុះអ្នកអុំលាយគ្នាបុរស និងនារី ក៏ត្រូវបានចាត់ទុកជាទូកបុរសដែរ ព្រមជាមួយគ្នានៅក្នុងឱកាសនេះដែរ គណៈកម្មការបច្ចេកទេស ក៏បានរៀបចំកឡោបិ៍ ចំនួន ១២កឡោបិ៍ ស្មើនឹង០៦គូ និងទូកខ្នាតតូចចំនួន០៤ទូក ស្មើនឹង០២គូ ដែលជាកេរ្ដិ៍ដំណែលសម្បត្តិវប្បធម៌ប្រពៃណីខ្មែរ ជាពិសេសខេត្តសៀមរាបយើង ដើម្បីអុំប្រណាំងជូនទស្សនាកំសាន្ដផងដែរ ៕
អត្ថបទ និង រូបថត ៖ លោក លីវ សាន្ត
#មន្ទីរព័ត៌មានខេត្តសៀមរាប
#អុំទូក
