ការអុំប្រណាំង ក្រឡោ ដោយកុមារា កុមារី ចំនួន៤គូ គឺជាជ្រុងមួយនៃចំណាប់អារម្មណ៍របស់ភ្ញៀវជាតិ-អន្តរជាតិក្នុងពិធីប្រណាំងទូក ង នាដងស្ទឹងសៀមរាប ឆ្នាំ២០១៨ ដែលការអុំប្រណាំងក្រឡោនេះ គឺជាការប្រណាំងគូកិត្តិយស ហើយអនុគណៈកម្មការរៀបចំការប្រណាំងទូក ង ខេត្តសៀមរាប លើកឡើងថា នេះគឺជាការរំលឹកនៃការចងចាំ វត្តមាន ក្រឡោ ដែលជាឧបករណ៍បូរាណមានប្រយោជន៍ប្រើប្រាស់ច្រើនយ៉ាង ក្នុងជីវភាពរស់នៅរបស់ប្រជានេសាទ នៃតំបន់បឹងទន្លេសាប ខេត្តសៀមរាប ហើយការអុំប្រណាំងក្រឡោនេះ មានវត្តមានជារៀងរាល់ឆ្នាំ ក្នុងពិធីអបអរ ព្រះរាជពិធីបុណ្យអ៊ុទូក សំពះព្រះខែ និងអកអំបុកនៅខេត្តសៀមរាប
មន្ត្រីនៃមន្ទីរវប្បធម៌និងវិចិត្រសិល្បៈខេត្តសៀមរាប ដែលបានលើកយកការអុំប្រណាំងក្រឡោនេះ មកដាក់ចូលជាកិត្តិយសក្នុងពិធីប្រណាំងទូក ង ខេត្តសៀមរាបនេះ ពុំបានបញ្ជាក់ច្បាស់លាស់ទេ អំពីកាលសម័យនៃការប្រើប្រាស់ក្រឡោនោះ ប៉ុន្តែគាត់បានឲ្យដឹងថា ក្នុងសម័យកាលយូរណាស់មកហើយដែរ នៅចុងឃ្នៀស នៃតំបន់បឹងទន្លេសាប ប្រជានេសាទបានប្រើប្រាស់ក្រឡោនេះ ជាមធ្យបាយធ្វើដំណើរជិតៗ ពីផ្ទះមួយទៅផ្ទះមួយ ហើយកុមារា កុមារី ក៏មានប្រើក្រឡោនោះ ជាជលយាន ធ្វើដំណើរទៅកាន់សាលារៀនបណ្តែតទឹករបស់ពួកគេផងដែរ ។
ដែលគេកំណត់បានថា ក្រឡោ ជាឧបករណ៍ប្រើប្រាស់បានច្រើនយ៉ាង ព្រោះថា ក្រឡោ ក្រៅពីជាមធ្យោបាយធ្វើដំណើរ ប្រជាជនជំនាន់នោះគេយកក្រឡោនេះ ជាឧបករណ៍សម្រាប់ប្រើប្រាស់ប្រឡាក់ត្រី ឬ ធ្វើប្រហុក ព្រោះក្រឡោធន់នឹងជាតិប្រៃ និងគេក៏អាចប្រើក្រឡោសម្រាប់ដាក់ស្រូវអង្ករ ផងដែរ ។
ក្រឡោ គេធ្វើអំពីបន្ទះឫស្សី ត្បាញដោយដៃ មានអង្កត់ផ្ចិតពី ១ម៉ែត្រ ទៅ ១ម៉ែត្រ២តឹក ក្រោយពីត្បាញរួច គេប្រើជ័រចុង និង ជ័រទឹក លាបទាំងខាងក្នុងនឹងខាងក្រៅ ដើម្បីកុំឲ្យជ្រាបទឹក ។
ដោយការរីកចម្រើនរបស់សង្គម ឧបករណ៍ថ្មីៗទំនើបទាន់សម័យត្រូវបានផលិតចេញមកទៅតាមតម្រូវការទីផ្សារប្រើប្រាស់ ដូចជាចានដែក ចានជ័រធំៗជាដើម ដែលបច្ចុប្បន្ននេះ ក្រឡោ ត្រូវបានគេបំភ្លេចចោលដោយមិនដឹងខ្លួន ប៉ុន្តែទោះជាយ៉ាងណាក៏ដោយ ថ្វីបើហួសសម័យកាលនៃការប្រើប្រាស់ក្រឡោក៏ដោយ តែក៏មិនអាចបំភ្លេចបានគុណប្រយោជន៍នៃក្រឡោ ដែលស្ថិតនៅជាមួយជីវភាពរស់នៅរបស់ប្រជានេសាទ ក្នុងសម័យកាលមុននោះឡើយ ។
សូមបញ្ជាក់ថា លោកតា កៅ ឆន និង លោកយាយ ប៉ាន់ ធូ រស់នៅភូមិកក្រាញ់ សង្កាត់សៀមរាប ក្រុងសៀមរាប ជាអ្នកត្បាញផលិត ក្រឡោ សម្រាប់ការចូលរួមប្រណាំងទូក ង ខេត្តសៀមរាប ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ក្រឡោ
