សមត្ថកិច្ចនគរបាលជំនាញខេត្តសៀមរាប បានឲ្យដឹងថា ផ្អែកតាមកិច្ចសហការផ្តល់ពត៌មានពីប្រជាពលរដ្ឋ នាវេលាម៉ោង ០៨នាទីព្រឹក ថ្ងៃទី២៦ ខែវិច្ឆិកា ឆ្នាំ២០១៨នេះ កម្លាំងនគរបាលការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋាននគរបាលខេត្ត បានចុះទៅចំណុចវត្តព្រះព្រហ្មរ័ត្នស្ថិតនៅក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ហើយបានអញ្ជើញជនបរទេសម្នាក់មកសាកសួរនៅការិយាល័យជំនាញពាក់ព័ន្ធនឹងករណីលួចស្នាក់នៅខុសច្បាប់។
សមត្ថកិច្ចនគរបាលជំនាញបានឲ្យដឹងថា ជនបរទេសរូបនេះឈ្មោះ SUBHAJIT CHANDRABISANZ ភេទ ប្រុស កើតឆ្នាំ ១៩៨៤ ជនជាតិឥណ្ឌា គ្មានលិខិតឆ្លងដែន ពុំមានការងារធ្វើច្បាស់លាស់ ស្នាក់នៅតាមវត្តអារ៉ាម ហើយជនបរទេសរូបនេះបានលួចឆ្លងដែនចូលមកព្រះរាជាណាចក្រកម្ពុជាកាលពីថ្ងៃទី ១៥ ខែ វិច្ឆិកា ឆ្នាំ ២០១៧ តាមច្រករបៀង(ក្បែរច្រកប៉ោយប៉ែត) រួចបន្តដំណើរមកកាន់ខេត្តសៀមរាប។
កន្លងមកនាអំឡុងខែសីហា ឆ្នាំ ២០១៧ សមត្ថកិច្ចបានឃាត់ខ្លួន និងបណ្តេញជនបរទេសរូបនេះចេញពីព្រះរាជា ណាចក្រកម្ពុជាម្តងរួចហើយ ពាក់ព័ន្ធនឹងករណីលួចស្នាក់នៅខុសច្បាប់ គឺគ្មានលិខិតឆ្លងដែន ខណៈបច្ចុប្បន្នជនបរទេសរូបនេះត្រូវបានបញ្ជូនទៅមណ្ឌលត្រៀមបណ្តេញចេញប្រចាំខេត្តសៀមរាបចាត់ការបន្តតាមនីតិវិធី ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
#ប៉ូលីស
