ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម មានប្រសាសន៍ថា ការដាក់ចេញនូវផែនការសកម្មភាពការងារកម្មសិទ្ធិបញ្ញារបស់ថ្នាក់ដឹកនាំអង្គភាពកម្មសិទ្ធបញ្ញាអាស៊ាន ក្រោមការគាំទ្រពីសំណាក់ដៃគូអភិវឌ្ឍនោះ បានជំរុញឲ្យមានការអភិវឌ្ឍវិស័យកម្មសិទ្ធិបញ្ញាក្នុងតំបន់យ៉ាងទូលំទូលាយ ហើយក្រោមកិច្ចសហប្រតិបត្តិការ រវាងអង្គភាពកម្មសិទ្ធិបញ្ញាអាស៊ានជាមួយដៃគូអភិវឌ្ឍ បានរួមចំណែកដល់ការអភិវឌ្ឍសេដ្ឋកិច្ចជាតិរបស់បណ្តាប្រទេសជាសមាជិក ព្រមទាំងបានជំរុញឲ្យមានការអនុវត្តច្បាប់ក្នុងតំបន់កាន់តែប្រសើរឡើង ហើយអ្វីដែលសំខាន់ជាងនេះ គឺបណ្តាប្រទេសដែលជាសមាជិកកម្មសិទ្ធិបញ្ញាអាស៊ាន បានទទួលផលប្រយោជន៍ពីគ្នាទៅវិញទៅមក ។
ឯកឧត្តម អ៊ុក ប្រជា បានលើកឡើងយ៉ាងដូច្នេះ ក្នុងឱកាសបើកកិច្ចប្រជុំរបស់ក្រុមការងារសហប្រតិបត្តិការកម្មសិទ្ធិបញ្ញាអាស៊ានលើកទី៥៧ នាព្រឹកថ្ងៃទី២៧ ខែវិច្ឆិកា ឆ្នាំ២០១៨ នៅក្រុងសៀមរាប ដែលរៀបចំឡើងដោយក្រសួងពាណិជ្ជកម្មកម្ពុជា និង លេខាធិការដ្ឋានអាស៊ាន ក្រោមការចូលរួមពិភាក្សាគ្នាដោយប្រមុខអង្គភាពកម្មសិទ្ធិបញ្ញាអាស៊ាន និង ដៃគូអភិវឌ្ឍក្នុងវិស័យកម្មសិទ្ធិបញ្ញា រួមមានអង្គភាពប្រកាសនីយបត្រតក្តកម្មជប៉ុន កូរ៉េ អ៊ឺរ៉ុប និង ចក្រភពអង់គ្លេស ។
សូមបញ្ជាក់ថា នេះគឺជាលើកទី៤ហើយ ដែលកម្ពុជាមានកាតព្វកិច្ចធ្វើជាម្ចាស់ផ្ទះរៀបចំកិច្ចប្រជុំនេះ ហើយតាមកម្មវិធីដែលបានគ្រោងទុកនោះ កិច្ចប្រជុំនេះនឹងត្រូវដំណើរការរហូតដល់ថ្ងៃទី៣០ ខែវិច្ឆិកា ឆ្នាំ២០១៨ ដោយលើកយកមកពិភាក្សាលម្អិតបន្ថែម លើផែនការសកម្មភាពការងារកម្មសិទ្ធិបញ្ញាអាស៊ាន ២០១៦-២០២៥ ដើម្បីស្វែរកគោលដៅរួមមួយ សម្រាប់ការអនុវត្តក្នុងតំបន់ និងមានតម្លៃជាសាកលលើពិភពលោក ។
នៅក្នុងកិច្ចប្រជុំលើកនេះដែរ ក៏បានភ្ជាប់ដោយកិច្ចប្រជុំពាក់ព័ន្ធមួយចំនួន ដោយមានជំនួបពិភាក្សាគ្នា ជាមួយដៃគូអភិវឌ្ឍន៍នានា ដើម្បីពង្រឹងនិងពង្រីកកិច្ចសហប្រតិបត្តិការក្នុងវិស័យកម្មសិទ្ធិបញ្ញា ឲ្យបានកាន់តែទូលំទូលាយថែមទៀត ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
