កាលពីព្រឹកថ្ងៃទី២៧ ខែវិច្ឆិកា ឆ្នាំ២០១៨នេះ លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប បានបើកកិច្ចប្រជុំមួយជាមួយមន្ត្រីក្រោមឱវាទ ដើម្បីធ្វើការត្រួតពិនិត្យមើលឡើងវិញ លើការងាររក្សាសន្តិសុខ សុវត្ថិភាពនិងសណ្តាប់ធ្នាប់សាធារណៈ របស់កងកម្លាំងនគរបាល ដែលប្រចាំការនៅក្នុងតំបន់ផាប់ស្ទ្រីត ស្ថិតក្នុងក្រុងសៀមរាប ។
ក្នុងឱកាសនោះដែរ លោកឧត្តមសេនីយ៍ទោ ទិត្យ ណារ៉ុង បានក្រើនរំលឹកដល់កងកម្លាំងនគរបាល ដែលប្រចាំការនៅក្នុងតំបន់ផាប់ស្ទ្រីត ត្រូវរៀបចំឥរិយាបទឲ្យសក្ដិសមជាកងកម្លាំងនគរបាលជាតិកម្ពុជា និងទទួលខុសត្រូវ ពង្រឹងនូវកិច្ចប្រតិបត្តិការជំនាញ និងធានាឲ្យបាននូវសន្តិសុខ សុវត្ថិភាពឲ្យបានល្អ ត្រូវធ្វើការល្បាតត្រួតពិនិត្យនូវរាល់សកម្មភាព និងធ្វើការផ្សព្វផ្សាយ អប់រំណែនាំដល់បងប្អូនអាជីវករលក់ដូរក្នុងតំបន់នោះ ឲ្យយល់និងចូលរួមការពារថែរក្សាសន្តិសុខសុវត្ថិភាពនិងសណ្តាប់ធ្នាប់ ចៀសវាងការកកស្ទះចរាចរណ៍ដែលអាចបង្ករឲ្យកើតមានគ្រោះថ្នាក់ចរាចរណ៍ រួមទាំងការរក្សាបរិស្ថានអនាម័យឲ្យបានស្អាតល្អ សក្ដិសមជាទីក្រុងទេសចរណ៍ប្រវតិ្តសាស្ត្រក្នុងការទាក់ទាញភ្ញៀវទេសចរណ៍ជាតិនិងអន្តរជាតិឲ្យចូលមកកំសាន្តកាន់តែច្រើនឡើងថែមទៀត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
