ក្នុងឱកាសដែលមន្ត្រីសាខាកាំកុងត្រូលខេត្តសៀមរាប សហការជាមួយមន្ត្រីនៃមន្ទីរពាណិជ្ជកម្មខេត្តសៀមរាប បានចុះត្រួតពិនិត្យគុណភាពម្ហូបចំណីអាហារចំនួន១៤មុខ នៅផ្សារសម្តេចតេជោ ហ៊ុន សែន ដើមក្រឡាញ់ ក្នុងក្រុងសៀមរាប នៅព្រឹកថ្ងៃទី២៦ ខែវិច្ឆិកា ឆ្នាំ២០១៨នេះ ដើម្បីធានានូវសុវត្ថិភាព និងគុណភាពចំណីអាហារសម្រាប់អ្នកទទួលទាននោះ មន្ត្រីសាខាកាំកុងត្រូលខេត្ត បានរកឃើញក្នុងចំណោមម្ហូបចំណីទាំង១៤មុខនោះ គឺមាន០១មុខ បានដាក់សារធាតុគីមីនៅក្នុងមឹកដែលជាប្រភេទអាហារសមុទ្រនាំចូលមកពីប្រទេសថៃ មានទម្ងន់ចំនួន៣,៥០ គីឡូក្រាម ហើយ បានធ្វើកំណត់ហេតុដកហូតមឹក ដើម្បីយកទៅកម្ទេចចោល ចំណែកម្ចាស់អ្នកលក់ បានធ្វើកិច្ចសន្យាថា មិនឲ្យមានជាលើកទីពីរទៀតឡើយ។
ជាមួយគ្នានេះដែរ ក្រុមមន្ត្រីជំនាញ ក៏បានធ្វើការណែនាំដល់អាជីវកទាំងអស់ នៅពេលដាក់លក់ផលិតផលផ្សេងៗ ត្រូវពិនិត្យមើលកាលបរិច្ឆេទកំណត់ប្រើប្រាស់ឱ្យបានត្រឹមត្រូវ ជៀសវាងការដាក់លក់ផលិតផលខូចគុណភាព ដែលធ្វើឱ្យប៉ះពាល់ដល់ប្រជាពលរដ្ឋជាអ្នកប្រើប្រាស់។
លោក ព្រៅ ខេមរិន្ទ ប្រធានសាខាកាំកុងត្រូលខេត្តសៀមរាប បានឲ្យដឹងថា ដើម្បីធានាបាននូវសុវត្ថិភាព និងគុណភាពចំណីអាហារសម្រាប់ជូនប្រជាពលរដ្ឋជាអ្នកបរិភោគ កន្លងមកមន្ត្រីជំនាញរបស់លោកតែងតែបានចុះទៅត្រួតពិនិត្យរកសារធាតុគីមីដែលត្រូវហាមឃាត់ដាក់នៅក្នុងបន្លែសាច់ និងចំណីអាហារផ្សេងៗ និងគ្រឿងកំប៉ុង ឬក៏ដបគ្រប់ប្រភេទនៅតាមបណ្តាផ្សារនានា នៅទូទាំងខេត្តជាច្រើនលើកច្រើនសាររួចមកហើយ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ដ
#មន្ទីរព័ត៌មានខេត្តសៀមរាប
#កាំកុងត្រូល
