ចាប់ពីថ្ងៃទី២០ ដល់ ២២ខែវិច្ចិកា ឆ្នាំ២០១៨នេះ ខេត្តសៀមរាប នឹងក្លាយជាគោលដៅទេសចរដ៏ពេញនិយម សម្រាប់ភ្ញៀវទេសចរ ចូលរួមកំសាន្តសប្បាយក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ក្នុងនោះភ្ញៀវទេសចរជាតិ ភាគច្រើនធ្វើដំណើរជាលក្ខណៈគ្រួសារ ទន្ទឹមនឹងនោះម្ចាស់ផ្ទះសំណាក់ សណ្ឋាគារមួយចំនួនក្នុងក្រុងសៀមរាប នឹងមានការតម្លើងថ្លៃបន្ទប់ស្នាក់របស់ខ្លួនផងដែរ។
ទាក់ទងនឹងបញ្ហានេះ អាជ្ញាធរខេត្តសៀមរាប ក៏ដូចជាមន្ទីរទេសចរណ៍ខេត្តសៀមរាប បានអំពាវនាវ និងមិនអនុញ្ញាតឲ្យម្ចាស់ផ្ទះសំណាក់ សណ្ឋាគារ តម្លើងថ្លៃបន្ទប់ស្នាក់នៅពេលមានពិធីបុណ្យធំៗនោះឡើយ។ ប៉ុន្តែលោក ងូវ សេងកាក់ប្រធានមន្ទីរទេសចរណ៍ខេត្តសៀមរាប បានទទួលស្គាល់ថាការតម្លើងថ្លៃបន្តិចបន្តួចពិតជាមានខ្លះមែន៖
(((សម្ភាសន៍ លោក ងូវ សេងកាក់ ))) (មាននៅក្នុងវីដេអូ)
ជាការអះអាង របស់ម្ចាស់សណ្ឋាគារខ្នាតតូច ក្នុងក្រុងសៀមរាបមួយចំនួន បញ្ជាក់ថា សណ្ឋាគារពួកគាត់ ពុំបានធ្វើការតម្លើងថ្លៃនោះទេ និង អនុញ្ញាតជូនភ្ញៀវទេសចរជាតិស្នាក់នៅជាលក្ខណៈគ្រួសារដោយពុំគិតថ្លៃចំនួនមនុស្សបន្ថែមឡើយ។
(((សម្ភាសន៍អ្នកចាត់ការទូទៅ))) (មាននៅក្នុងវីដេអូ)
ដោយឡែកម្ចាស់ផ្ទះសំណាក់មួយចំនួន នៅជិតបរិវេណកន្លែងប្រារព្ធពិធីបុណ្យ អាចតម្លើងថ្លៃបន្ទប់របស់ខ្លួន ចាប់៧ ដល់ ១៣ដុល្លារក្នុងមួយយប់ ពីលើតម្លៃថ្ងៃធម្មតា សម្រាប់បន្ទប់ម៉ាស៊ីនត្រជាក់ គ្រែ១ និងគ្រែ២ ប៉ុន្តែភ្ញៀវអាចស្នាក់នៅបានចាប់ពី ៤ ដល់ ៦នាក់ ក្នុងមួយបន្ទប់។ មូលហេតុនៃកាតម្លើងថ្លៃបន្ទប់នេះ ពួកគាត់លើកឡើងថា៖ ភ្ញៀវមកសម្រាកភាគច្រើនជាលក្ខណៈគ្រួសារ អញ្ចឹងហើយ ម្ចាស់ផ្ទះសំណាក់ត្រូវចំណាយសម្ភារប្រើប្រាស់ និងទឹកច្រើន។
តាមរបាយការណ៍មន្ទីរទេសចរណ៍ខេត្តសៀមរាប កាលពីឆ្នាំ២០១៧ ភ្ញៀវទេសចរជាតិអន្តរជាតិ បានមកចូលរួមព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក សរុបប្រមាណ២៥ម៉ឺននាក់ ក្នុងនោះទេសចរអន្តរជាតិ ជាង២២,០០០នាក់ និងទេសចរជាតិប្រមាណជាង២៣០,០០០។ តាមរយៈសន្ទុះ នៃការររីកចម្រើនវិស័យទេសចរណ៍ក្នុងខេត្ត បច្ចុប្បន្នចំនួនបន្ទប់សណ្ឋាគារ ក្នុងខេត្តសៀមរាប ប្រមាណជិត១៥,០០០បន្ទប់ បន្ទប់ផ្ទះសំណាក់មានចំនួនជិត ៦ពាន់បន្ទប់ ដូច្នេះ ចំនួននេះពុំមានជួបបញ្ហាខ្វះបន្ទប់ស្នាក់នៅ ដែលជាហេតុនាំឲ្យមានការតម្លើងថ្លៃបន្ទប់ស្នាក់ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខ្ពស់ហួសហេតុនោះឡើយ។
តាមស្ថិតិនេះ លោកប្រធានមន្ទីរទេសចរណ៍ខេត្តសៀមរាប រំពឹងថានឹងមានភ្ញៀវទេសចរជាតិកើនឡើងជាងឆ្នាំ២០១៧ ព្រោះទម្លាប់ប្រជាជនកម្ពុជា តែងធ្វើដំណើរកំសាន្តជាលក្ខណៈគ្រួសារ និងច្រើនខេត្ត ដូច្នេះអាជ្ញាធរខេត្តសៀមរាប បានរៀបចំកម្មវិធីសាសនា ប្រពៃណី និងកំសាន្តជាច្រើន សម្រាប់ជូនប្រជាពលរដ្ឋក្នុងខេត្ត និងភ្ញៀវទេសចរជាតិអន្តរជាតិ កំសាន្តសប្បាយ។
ជាមួយគ្នានេះ លោកប្រធានមន្ទីរទេសចរណ៍ខេត្ត សំណូមពរដល់ប្រតិបត្តករ សេវាករទេសចរណ៍ទាំងអស់ សូមពង្រឹងគុណភាពសេវាកម្ម ជំនាញបដិសណ្ឋាកិច្ច និងតម្លៃសេវាកម្មសមរម្យ ចៀសវាធ្វើឲ្យសក្ដានុពលទេសចរណ៍ក្នុងខេត្តមួយនេះធ្លាក់ចុះ។
(((សម្ភាសន៍ លោក ងូវ សេងកាក់ សំណូមពរ))) (មាននៅក្នុងវីដេអូ)
