ថ្លែងក្នុងសន្និសីទសារព័ត៌មានមួយ ស្ដីពីកម្មវិធី ជិះកង់ដើម្បីកុមារ លើកទី១៣ លោកស្រី ម៉ននី រង្សី អនុប្រធានសហភាពសហព័ន្ធយុវជនកម្ពុជាខេត្តសៀមរាប បានមានប្រសាសន៍ថា ឆ្នាំនេះជាលើកទី២ហើយ ដែលសហភាពសហព័ន្ធយុវជនកម្ពុជាខេត្តសៀមរាប បានសហការជាមួយអង្គការមនុស្សធម៌ដើម្បីកុមារនិងស្ត្រី រៀបចំកម្មវិធីជិះកង់ដើម្បីកុមារ លើកទី១៣ នៅលើទឹកដីអង្គរ ដែលនឹងប្រព្រឹត្តទៅនៅថ្ងៃទី០១ ខែធ្នូ ឆ្នាំ២០១៨ខាងមុខនេះ ហើយរយៈចម្ងាយនៃការជិះកង់នេះមាន៣ប្រភេទ គឺ៖ ១. កាជិះកង់រយៈចម្ងាយ ១៧គីឡូម៉ែត្រ ជាលក្ខណៈកម្សាន្ត , ២. ការជិះកង់រយៈចម្ងាយ ៣៧គីឡូម៉ែត្រ ជាការជិះកង់មានលក្ខណៈប្រកួតប្រជែងដោយប្រើប្រាស់កង់ភ្នំ និង ៣. ការជិះកង់រយៈចម្ងាយ ១១៧គីឡូម៉ែត្រ ជាការជិះកង់មានលក្ខណៈប្រកួតប្រជែងដោយប្រើប្រាស់កង់គួក ។
លោកស្រី ម៉ននី រង្សី បានបញ្ជាក់ទៀតថា គិតមកដល់ថ្ងៃទី១៨ ខែវិច្ឆិកា ឆ្នាំ២០១៨នេះ គឺទទួលអ្នកចុះឈ្មោះ បានចំនួន ២៦៨នាក់ហើយ ក្នុងនោះមានបរទេស ៩១នាក់ ដូច្នេះតាមរយៈនេះ សូមអំពាវនាវដល់បងប្អូនប្រជាពលរដ្ឋទាំងអស់ ជាពិសេសប្អូនៗយុវជន សូមអញ្ជើញចូលរួមឲ្យបានច្រើនកុះករ ក្នុងន័យគាំទ្រវិស័យកីឡាកម្ពុជា និងការងារសប្បុរស់ធម៌ ដែលបងប្អូនអាចចុះឈ្មោះចូលរួមបានតាមប្រព័ន្ធ Online ឬចុះឈ្មោះនៅទីតាំងផ្ទាល់ ហើយសហភាពសហព័ន្ធយុវជនកម្ពុជាខេត្តសៀមរាប នឹងព្យាយាមសហការជាមួយអង្គភាពជំនាញទាំងអស់ ក្នុងការរៀបចំកម្មវិធីជិះកង់ដើម្បីកុមារ នាពេលខាងមុខនេះនឹងប្រព្រឹត្តទៅដោយរលូន និងជោគជ័យ ។
លោកស្រី ម៉ននី រង្សី បានបញ្ជាក់បន្ថែមទៀតថា កាលពីឆ្នាំ២០១៧កន្លងទៅ គឺមានអ្នកចូលរួមសរុប ៥៥៤នាក់ ក្នុងនោះមានបរទេស ចំនួន ២៣១នាក់ ហើយថវិកាដែលនៅសល់ពីការរៀបចំកម្មវិធីក្នុងឆ្នាំ២០១៧ បានទិញកង់ជួយឧត្ថម្ភ ចំនួន ៥០កង់ ដល់សិស្សានុសិស្សក្រីក្រនៅសាលាបឋមសិក្សាព្រៃទទឹង ក្នុងខេត្តសៀមរាប និងកង់មួយចំនួនទៀតដល់សិស្សានុសិស្ស នៅក្នុងខេត្តព្រៃវែង ក្នុងនោះឧត្ថម្ភថវិកាទៅដល់អង្គការ IL NODO ដែលជាអង្គការក្នុងស្រុកមួយដែលធ្វើការជួយទៅដល់កុមារ ដែលរស់នៅក្នុងពន្ធនាគាជាមួយម្ដាយ និងស្ត្រីដែលរស់នៅក្នុងពន្ធនាគារជាមួយម្ដាយ និងស្ដ្រីដែលរស់នៅក្នុងពន្ធនាគារ ក្នុងព្រះរាជាណាចក្រកម្ពុជា ។
គួររំលឹកផងដែរថា កម្មវិធីនេះនឹងបើកឱកាសឲ្យបងប្អូនប្រជាពលរដ្ឋ ជាពិសេសប្អូនៗយុវជន ក្នុងខេត្តសៀមរាប បានចូលរួមចំណែកលើកស្ទួយវិស័យកីឡាកម្ពុជា តាមរយៈការជិះកង់ជាលក្ខណៈមិត្តភាព និងដើម្បីប្រមូលថវិកា ដែលនៅសល់ពីការចំណាយក្នុងកម្មវិធី ទៅជួយកុមារ និងស្ដ្រីដែលរស់នៅក្នុងពន្ធនាគារ និងចែកកង់ សម្ភារៈសិក្សា ជូនប្អូនៗសិស្សានុសិស្ស ដែលមានបំណងចង់បន្តការសិក្សា តែខ្វះមធ្យោបាយ ដែលនេះជាផ្នែកមួយក្នុងការជួយលើកកម្ពស់ និងជម្រុញការសិក្សារបស់កុមារ ដែលមានជីវភាពខ្វះខាត់ មានឱកាសសិក្សា ដូចកុមារទូទៅ ៕
អត្ថបទ និង រូបថត ៖ លោក អ៊ិន សីហរិទ្ធ និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#សហភាពសហព័ន្ធយុវជនកម្ពុជាខេត្តសៀមរាប
