នៅព្រឹកថ្ងៃទី១៦ ខែវិច្ឆិកា ឆ្នាំ២០១៨នេះ នៅសណ្ឋាគារអង្គរអេរ៉ា ក្រុងសៀមរាប សមាគមសហគ្រិនវ័យក្មេងកម្ពុជា បានសហការជាមួយបណ្តាញសហគ្រិនភាពសកលកម្ពុជា រៀបចំទិវាសប្តាហ៍សហគ្រិនភាពពិភពលោក ក្រោមប្រធានបទ ស្ត្រី និងយុវជន ក្នុងសហគ្រិនភាព និងសេដ្ឋកិច្ចឌីជីថល ក្នុងគោលបំណងលើកទឹកចិត្ត និងផ្តល់ចំណេះដឹងដល់ស្ត្រី និងយុវជនដែលមានបំណងបើកអាជីវកម្ម ឬកំពុងធ្វើអាជីវកម្ម។
ប្រធានសមាគមសហគ្រិនវ័យក្មេងកម្ពុជា លោកឧកញ៉ាគួច ផេង បានមានប្រសាសន៍ថា ដោយសង្កេតឃើញថា នៅក្នុងប្រទេសកម្ពុជា មានការកើនឡើងចំនួនយុវជន និងស្ត្រីនៅក្នុងសហគ្រាសតូចៗ ដែលជាប្រភេទមីក្រូ តូចនិងមធ្យម ព្រមទាំងពិភពលោកមានការអភិវឌ្ឍក្នុងវិស័យឌីជីថលផងនោះ នៅក្នុងវេទិការនេះសមាគមសហគ្រិនវ័យក្មេងកម្ពុជា បានសម្រេចជ្រើសរើសប្រធានបទមួយចំនួន ដូចជា៖ ប្រព័ន្ធអេកូសម្រាប់ស្ត្រី និងយុវជនក្នុងសហគ្រិនភាព, អាជីវកម្មបែបឌីជីថល និងសេដ្ឋកិច្ចបែបឌីជីថល ជាដើម មកធ្វើការជជែកពិភាគ្សាគ្នា។
លោកឧកញ៉ាបន្តថា វិទិការនេះក៏នឹងនាំស្ត្រី និងយុវជនកម្ពុជា ឲ្យពួកគាត់បានយល់កាន់តែច្បាស់ ពីសហគ្រិនភាព ហើយពួកគាត់ក៏នឹងមានឧិកាសបានជួបជជែក សិក្សាស្វែងយល់បន្ថែមពីវាគ្មិន ដែលជាសហគ្រិនដែលទទួលបានជោគជ័យក្នុងអាជីវកម្ម និងមានបទពិសោធន៍ច្រើនឆ្នាំផ្នែកធុរៈកិច្ច ក៏ដូចជាក្រសួងស្ថាប័ននានាផងដែរ។
ឯកឧត្តមកាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា សហគ្រិនភាពបានដើរតួនាទីយ៉ាងសំខាន់នៅក្នុងការធ្វើអាជីវកម្ម ។ នៅពេលដែលយើងមានជំនាញច្បាស់លាស់ មានលុយ មានកម្លាំង ប៉ុន្តែយើងខ្វះសហគ្រិនភាព អាជីវកម្មរបស់យើងមិនទទួលបានជោគជ័យទេ។ ឯកឧត្តមបន្តថា នៅក្នុងអណត្តិទី៦នេះ រាជរដ្ឋាភិបាលកម្ពុជា បានផ្តោតការយកចិត្តទុកដាក់យ៉ាងសំខាន់ទៅភាពជាសហគ្រិនរបស់ស្ត្រី និងយុវជនកម្ពុជា ដោយបានរៀបចំជាយុទ្ធសាស្ត្រគៀងគរ ផ្តល់កម្លាំងចិត្តដល់ពួកគាត់ ឲ្យពួកគាត់ទទួលបាននូវគំនិត ការតភ្ជាប់ ការណែនាំ ដែលនាំឲ្យពួកគាត់ទទួលបានជោគជ័យនៅក្នុងវិស័យធុរៈកិច្ច។
ទិវាសប្តាហ៍សហគ្រិនភាពពិភពលោក បានកើតឡើងកាលពីឆ្នាំ២០០៨ ក្រោមការផ្តួចផ្តើមរបស់លោក Carl Schramm អគ្គនាយកក្រុមហ៊ុនKauffman Foundation និងលោកGordon Brown អតីតនាយករដ្ឋមន្ត្រីអង់គ្លេស។ ទិវានេះ តែងតែប្រារព្ធធ្វើឡើងនៅក្នុងសប្តាហ៍ទី៣នៃខែវិច្ឆិការៀងរាល់ឆ្នាំ នៅក្នុងប្រទេស១៧០៕
អត្ថបទ និង រូបថត ៖ លោក ជា ស្រស់
