កិច្ចប្រជុំលើកទី២៨ របស់សហព័ន្ធសមាគមភ្នាក់ងារបញ្ជូនទំនិញអាស៊ាន ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន បញ្ជាក់ថា សមាគមភ្នាក់ងារបញ្ជូនទំនិញកម្ពុជា បានពង្រីកខ្លួនបន្ថែមនៅក្នុងតំបន់ និងទៅកាន់ពិភពលោក ហើយក៏ត្រៀមខ្លួនចូលទៅក្នុងសមាគមភ្នាក់ងារដឹកជញ្ជូនតាមផ្លូវអាកាសរបស់ពិភពលោកផងដែរ។
កិច្ចប្រជុំនេះ បានប្រារព្ធឡើងនាព្រឹកថ្ងៃទី១៦ ខែវិច្ឆិកា ឆ្នាំ២០១៨ នៅក្រុងសៀមរាប ហើយនេះគឺជាលើកទី២ហើយ ដែលសមាគមភ្នាក់ងារបញ្ជូនទំនិញកម្ពុជា បានធ្វើជាម្ចាស់ផ្ទះនៃកិច្ចប្រជុំ សហព័ន្ធសមាគមភ្នាក់ងារបញ្ជូនទំនិញអាស៊ាន បន្ទាប់ពីបានបង្កើតឡើង និងបានចូលជាសមាជិករបស់ AFFA កាលក្នុងអំឡុងឆ្នាំ២០០៤ កន្លងទៅ។
ឯកឧត្តម តូច ចាន់កុសល បានបញ្ជាក់ថា សមាគមភ្នាក់ងារបញ្ជូនទំនិញកម្ពុជា មិនមែនបង្កើតឡើងដោយវិស័យឯកជនសុទ្ធសាធនោះទេ តែបង្កើតឡើងដោយតម្រូវការរបស់អាស៊ាន សម្រាប់អនុតំបន់ទន្លេមេគង្គ និងសម្រាប់ជាតិផងដែរ ។ ទន្ទឹមនឹងនោះ ក្រសួងសាធារណការ និងដឹកជញ្ជូន ជាផ្នែកមួយនៃវិស័យនេះ ក្រសួងមានការគាំទ្រយ៉ាងសកម្មដល់កិច្ចដំណើរការរបស់សមាគមភ្នាក់ងារបញ្ជូនទំនិញកម្ពុជា និងមានកាតព្វកិច្ចកសាងហេដ្ឋារចនាសម្ព័ន្ធ ដូចជាកំពង់ផែ ផ្លូវជាតិ ផ្លូវដែក មជ្ឈមណ្ឌលចែកចាយទំនិញ ជាដើម ក្នុងនោះ ក្រសួងបានរៀបចំ ផែនការដឹកជញ្ជូនវៃឆ្លាត ក្នុងយុទ្ធសាស្ត្រ៥ និង កម្មវិធី២៥ និងផែនការមេ ក្រោមកិច្ចសហការជាមួយ ចាយកា (JICA)។
ឯកឧត្តម លើកឡើងថា ៖ វិស័យដឹកជញ្ជូន មានវិសាលភាពយ៉ាងធំធេងដល់ការកសាងសេដ្ឋកិច្ចជាតិ ។ រាជរដ្ឋាភិបាល បានបង្កើតក្រុមប្រឹក្សាជាតិដឹកជញ្ជូន និង នាយកដ្ឋានដឹកជញ្ជូននៅក្នុងក្រសួងសាធារណការ និងដឹកជញ្ជូន ដើម្បីជម្រុញឲ្យវិស័យដឹកជញ្ជូនកម្ពុជា កាន់តែមានគុណភាពប្រសើរឡើង ។ ក៏ប៉ុន្តែអ្វីដែល ប្រធានបទនៃកិច្ចប្រជុំត្រូវបានយកចិត្តទុកដាក់ដែរនោះគឺ ធនធានមនុស្ស ។
លើកឡើងអំពីបញ្ហាប្រឈម កង្វះធនធានមនុស្ស លោក ស៊ីន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានបង្ហាញនៅក្នុងបទសម្ភាសន៍ យ៉ាងដូច្នេះថា៖
សម្ភាសន៍ លោក ស៊ីន ចន្ធី (មាននៅក្នុងវីដេអូ)
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
