ថ្លែងក្នុងសិក្ខាសាលា ស្ដីពីអត្ថប្រយោជន៍នៃការប្រើប្រាស់ប្រព័ន្ធ CAMEMIS នៅសាលាខេត្តសៀមរាប នារសៀលថ្ងៃទី ១៤ ខែ វិច្ឆិកា ឆ្នាំ២០១៨នេះ លោក គាំ វិបុលរិទ្ធ ជាអនិកជនខ្មែរ រស់នៅប្រទេសអាល្លឺម៉ង់ ជាស្ថាបនិកប្រព័ន្ឋCAMEMISអះអាងថា ប្រព័ន្ធកត់ត្រាទិន្នន័យសម្រាប់ជួយសម្រួលដល់គ្រឹះស្ថានសិក្សា ក្នុងការតាមដាននិងកត់ត្រាឯកសារផ្សេងៗរបស់សាសាហៅថា ប្រព័ន្ធ CAMEMIS នេះ មានលក្ខណៈស្រដៀងគ្នាទៅនឹងប្រព័ន្ធហ្វេសប៊ុក និងប្រព័ន្ធទំនាក់ទំនងសង្គមនានាជាច្រើន ដែលក្នុងពិភពលោកបាននឹងកំពុងតែនិយមប្រើប្រាស់ ។
តាមរយៈការបង្កើតលើស្មាតហ្វូន និងពឹងផ្អែកលើប្រព័ន្ធអិនធឺណែត ខុសប្លែកត្រង់តែបង្កើតគណនេយ្យចងជាក្រុម និងកំណត់ឱ្យប្រើប្រាស់បាន សម្រាប់តែស្ថាប័នរបស់រដ្ឋ និងគ្រឹះស្ថានសិក្សានានា ដែលស្ថាប័នបង្កើតគណនេយ្យនោះ មានសិទ្ឋិក្នុងការបញ្ចូលសមាជិករបស់ខ្លួនដូចជាលោកគ្រូអ្នកគ្រូ សិស្សានុសិស្ស មាតាបិតា អាណាព្យាបាលសិស្ស ដើម្បីពួកគាត់ងាយស្រួលតាមដានការសិក្សា និងសកម្មភាពផ្សេងៗរបស់បុត្រធីតាពួកគាត់គ្រប់ពេលវេលា ដោយកាត់បន្ថយការចំណាយពេល និងចំណេញទាំងសងខាង ទាំងសាលា ទាំងគ្រួសារមាតាបិតាសិស្ស ។
លោក គាំ វិបុលរិទ្ឋ បានបញ្ជាក់ទៀតថា ក្រោយពីបានស្រាវជ្រាវ និងចងក្រងរៀបចំបានជាឯកសារនៃប្រព័ន្ឋនេះហើយ យើងបានចុះកម្មសិទ្ឋិបញ្ញានៅប្រទេសអាល្លឺម៉ង់ ដែលអាចឱ្យយើងប្រើជាលក្ខណៈអន្តរជាតិ ដូច្នេះប្រព័ន្ឋនេះ បានផ្តល់អត្ថប្រយោជន៍កត់ត្រាទិន្នន័យរវាងសាលានិងអាណាព្យាបាល ជាមួយសិស្សានុសិស្ស ដើម្បីតាមដាន និងធ្វើបច្ចុប្បន្នភាព ស្រង់ទិន្នន័យពិន្ទុ និងសកម្មភាពរបស់សិស្ស ហើយក្រោយពីបង្កើតបានប្រព័ន្ធនេះ ក្រុមហ៊ុនបានយកទៅសាកល្បងនៅប្រទេសវៀតណាម ដែលបច្ចុប្បន្ន វៀតណាមកំពុងចាប់អារម្មណ៍និងសិក្សាបន្ថែមពីប្រព័ន្ធនេះយ៉ាងផុលផុស។
លោក ចិក គឹមជុន នាយករងរដ្ឋបាលសាលាខេត្តសៀមរាប បានមានប្រសាសន៍ថា អាជ្ញាធរខេត្តសូមគាំទ្រ និងរង់ចាំសហការគ្រប់ពេលវេលា នូវអ្វីដែលមានប្រយោជន៍ដល់ការបណ្តុះបណ្តាលធនធានមនុស្ស ព្រោះថាការបណ្តុះបណ្តាលនូវធនធានមនុស្ស គឺជាកាតព្វកិច្ចរបស់យើងទាំងអស់គ្នា ទាំងគ្រូ មាតាបិតា អាណាព្យាបាល និង សិស្ស រួមសហការ គ្នា ទើបយើងទទួលបានលទ្ធផលនៃធនធានមនុស្សពិត ដែលជាមូលដ្ឋានគ្រឹះដ៏រឹងមាំក្នុងការអភិវឌ្ឍន៍ប្រទេស ដូច្នេះតាមរយៈអត្ថប្រយោជន៍ នៃការប្រើប្រាស់ប្រព័ន្ធ CAMEMIS នេះ គឺបានធ្វើឲ្យយើង មិនប្រើប្រាស់ខ្ជះខ្ជាយនូវពេលវេលាដ៏មានតម្លៃ ក្នុងការតាមដានពីទិន្នន័យផ្នែកសិក្សាអប់រំតាមបែបបច្ចេកទេសវិទ្យា ព័ត៌មាន សំខាន់ សូមអ្នកទាំងអស់គ្នា រួមសហការគ្នា ក្នុងការជ្រោងទង់មួយ ក្រោមប្រធានបទ ការអប់រំដើម្បីទាំងអស់គ្នា គឺដើម្បីធានាបានទាំងគុណភាពនៃការសិក្សា ហើយការអប់រំ ក៏ដើម្បីអនាគតកូនចៅយើងទាំងអស់គ្នា ។
សូមបញ្ជាក់ថា ប្រព័ន្ធ CAMEMIS នេះ ត្រូវបានបង្កើតឡើងដោយវិស្វករខ្មែរ ដែលបានទៅសិក្សានៅប្រទេសអាល្លឺម៉ង់ជាច្រើនឆ្នាំ ក្នុងគោលដៅជួយសម្រួលដល់ការងារផ្នែកវិស័យសិក្សាអប់រំគ្រប់កម្រិត មានសមត្ថភាពអាចជួយសម្រួលដល់ការគ្រប់គ្រងទិន្នន័យទូទៅរបស់សាលា ទាំងផ្នែករដ្ឋ និងឯកជន ដូចជាសាលារៀន , មជ្ឈមណ្ឌលបណ្តុះបណ្តាលនានារបស់អង្កការ ឬសមាគមន៍ និងសាលាចំណេះទូទៅគ្រប់កម្រិត ៕
អត្ថបទ និង រូបថត ៖ លោក យូ វង្ស និង លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#CAMEMIS
