បឹងពារាំងជាតំបន់អភិរក្ស ជីវៈចម្រុះយ៉ាងសម្បូរបែបមួយ ស្ថិតក្នុងសង្កាត់ជ្រាវ ក្រុងសៀមរាប ដែលនៅជាប់នឹងបឹងទន្លេសាប ភាគខាងត្បូងទីរួមខេត្តសៀមរាប និងមានចម្ងាយប្រហែល១២គីឡូម៉ែត្រ។ នៅលើផ្ទៃដីជាង៣ពាន់ហិកតា មានសត្វស្លាបប្រហែលជាង១២០ប្រភេទ។ សម្រាប់ឆ្នាំ២០១៩កន្លងទៅ អ្នកអភិរក្សក្នុងតំបន់នេះ សង្កេតឃើញថា ចំនួនសត្វមានការកើនឡើង។
បើតាមលោក សុខ សំណាង ប្រធានផ្នែកទេសចរណ៍ នៃសមាគមសហគមន៍ទេសចរណ៍វប្បធម៌ធម្មជាតិបឹងពារាំង បានឲ្យដឹងថា បឹងពារាំងមានទំហំ ២៧០ហិកតា លើផ្ទៃដីសរុបជាង៣ពាន់ហិកតា។ នៅរដូវទឹកសម្រក ចាប់ខែមករា ដល់ ខែឧសភា ជាពេលវេលា ដែលសត្វជាច្រើនប្រភេទ ប្រមូលផ្ដុំគ្នារកចំណីក្នុងតំបន់នេះ និងជាឱកាសល្អសម្រាប់ភ្ញៀវទេសចរជាតិ និងអន្តរជាតិ ធ្វើការថតរូប និងទស្សនាសត្វទាំងអស់នោះ។ នៅរដូវវស្សា ទឹកទន្លេមានកម្ពស់ ពិបាករកចំណី ពួកវាបានបំលាស់ទីតាមទម្លាប់ ទៅតំបន់ផ្សេង ដែលនាំឲ្យគេឃើញចំនួនសត្វមានការថយចុះ។
ប្រធានផ្នែកទេសចរណ៍ បានឲ្យដឹងបន្ថែមថា សមាជិករបស់ សមាគមសហគមន៍ទេសចរណ៍វប្បធម៌ធម្មជាតិបឹងពារាំង នាពេលកន្លងមកមានជាង១០០នាក់ ប៉ុន្តែដោយសារជីវភាពខ្វះខាត និងពុំមានថវិកាឧបត្ថម្ភគ្រប់គ្រាន់ ក៏បានចាកចេញ បច្ចុប្បន្ននៅសល់ត្រឹមតែ ៨០នាក់ប៉ុណ្ណោះដែលពឹងផ្អែកលើ ចំណូលពីការនាំភ្ញៀវ ជិះទូកទស្សនាក្នុងតំបន់នេះ។ ពួក មានតួនាទី រាយការណ៍ទៅសមត្ថកិច្ចមូលដ្ឋាន នៅពេលមានបទល្មើសចាប់សត្វក្នុងតំបន់នេះ ក្នុងមួយថ្ងៃពួកគេបែងចែកវេនយាមជា បីពេល។
លោក សឿម សម្បូរ ប្រធានផ្នែកអភិរក្ស នៃសមាគមសហគមន៍ទេសចរណ៍វប្បធម៌ធម្មជាតិបឹងពារាំង បានបញ្ជាក់ថា តំបន់បឹងពារាំងនេះ ជាតំបន់រណប សម្រាប់ជាជម្រកសត្វពងកូន ដែលអំណោយផលទៅដោយព្រៃលិចទឹក។ ក្នុងឆ្នាំ២០១៩ លោកស្រាវជ្រាវថាមានសត្វស្លាបជាង១២០ប្រភេទ មានវត្តមាននៅក្នុងតំបន់ ដូចជា៖ រនាល-ស ត្រដកតូច ទុងប្រផេះ ទាព្រៃ ត្រយ៉ងខ្លួន-ស ក្អែកទឹកតូច ក្រសា ត្រសេះ ជាដើម ក្រៅពីនោះ ក៏មានត្រី ល្មូន ព្រមទាំងសត្វទ្វេរបាត និងចតុបាតជាច្រើនទៀត។
លោក លឹម ឌីណា ចៅសង្កាត់រង នៃសង្កាត់សៀមរាប ក៏បានអំពាវនាវដល់ប្រជាពលរដ្ឋ ព្រមទាំងភ្ញៀវទេសចរណ៍ទាំងអស់ ចូលរួមថែរក្សាបរិស្ថាន និងប្រព័ន្ធជីវចម្រុះនៅតំបន់នេះទាំងអស់គ្នា ដើម្បីជាសក្ដានុពលទេសចរណ៍របស់ខេត្តយើងទាំងអស់គ្នា។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
