ប្រធានាធិបតីអាមេរិកលោក ដូណាល់ត្រាំ បាននិយាយថា លោកជឿជាក់លើព័ត៌មាន ដែលចេញមកពីប្រទេសចិន ទាក់ទងនឹងវីរុស កូរ៉ូណាវីរុស ដែលបានសម្លាប់មនុស្ស ៩ នាក់នៅទីនោះ និងធ្វើឲ្យ មនុស្សជិត ៥០០ នាក់ផ្សេងទៀតឈឺ ដែលករណីនេះ សហរដ្ឋអាមេរិក កំពុងគ្រប់គ្រងស្ថានការណ៍ នៅតាមព្រំដែនរបស់ខ្លួនបន្ទាប់ពីករណីដំបូងនៅអាមេរិកត្រូវបានបញ្ជាក់។
យោងតាមសារព័ត៌មាន Sputnik ចេញផ្សាយកាលពីថ្ងៃទី២៣ ខែមករា ឆ្នាំ២០២០ បានឱ្យដឹងថា មជ្ឈមណ្ឌលគ្រប់គ្រង និងការពារជំងឺ របស់អាមេរិក ឬ CDC កាលពីថ្ងៃអង្គារបាននិយាយថា អ្នកស្រុកនៃតំបន់ Snohomish នៅ Washington ដែលបានវិលត្រឡប់ មកពីប្រទេសចិនត្រូវបាន គេធ្វើរោគវិនិច្ឆ័យថាមានវីរុសនេះ។
CDC និងសន្តិសុខ មាតុភូមិបានចាប់ផ្តើមត្រួត ពិនិត្យប្រជាជនដែលធ្វើដំណើរទៅកាន់ ព្រលានយន្តហោះធំ ៗ នៅរដ្ឋកាលីហ្វ័រញ៉ា និងញូវយ៉ក ពីទីក្រុងវូហាន ប្រទេសចិន ដែលជាខេត្តដែល មានការរីករាលដាលនៃវីរុស ត្រូវបានគេជឿជាក់ថាបានចាប់ផ្តើម។
ក្នុងបទសម្ភាសមួយ ពីវេទិកា សេដ្ឋកិច្ចពិភពលោកនៅ ទីក្រុងដាវ៉ូសប្រទេសស្វីសលោក ដូណាល់ ត្រាំ និយាយថា «យើងអាចគ្រប់គ្រងវា បានទាំងស្រុង” លោកជឿជាក់ថា ប្រធានាធិបតីចិនលោក ស៊ីជីនពីង និងមន្ត្រីសុខាភិបាល នៅទីនោះនឹងអាចដោះស្រាយបាន ហើយនិងបន្តប្រាប់ អាជ្ញាធរនៅជុំវិញពិភពលោក នូវអ្វីគ្រប់យ៉ាងដែលពួកគេត្រូវដឹងអំពីវីរុសនេះ ៕
ប្រភព៖ ដើមអំពិល
ប្រែសម្រួលៈ ណៃ តុលា
