កាលពីថ្ងៃទី២៣ ខែមករា ឆ្នាំ២០២០នេះ នៅមន្ទីរពេទ្យបង្អែកខេត្តសៀមរាប មានពិធីចុះហត្ថលេខាលើកិច្ចព្រមព្រៀងសហប្រតិបត្តិការ រវាងមន្ទីរសុខាភិបាលខេត្តសៀមរាប ជាមួយ មន្ទីរពេទ្យ រ៉ាចាវីតធី (Rajavithi Hospital) នៃប្រទេសថៃ ដើម្បីផ្ដល់ឱកាសដល់មន្ទីរពេទ្យបង្អែកខេត្តសៀមរាប បញ្ជូនមន្រ្តីពេទ្យជំនាញរបស់ខ្លួន ទៅទទួល ការបណ្តុះបណ្តាល ជំនាញបច្ចេកទេសទំនើប ផ្នែកវះកាត់ ដោយប៉ារ៉ូស្កុប អង់ដូស្កុប។
ក្នុងនាមភាគីហត្ថលេខីនៃប្រទេសថៃ និងជា នាយកមជ្ឈមណ្ឌល អង់ដូស្កុប នៃមន្ទីរពេទ្យ រ៉ាចាវីតធី លោកវេជ្ជបណ្ឌិត សាអាត ទ្រីពង្សករុណា មានប្រសាសន៍ថា មន្ទីរពេទ្យ រ៉ាចាវីតធី គឺជាមន្ទីរពេទ្យមួយរបស់នាយកដ្ឋានសេវាកម្មវេជ្ជសាស្ត្រ នៃក្រសួងសុខភាពសាធារណៈនៃប្រទេសថៃ មានទីតាំងនៅទីក្រុងបាងកក ។ មន្ទីរពេទ្យនេះ មានបេសកកម្មសហការព្យាបាល និងមានភារកិច្ចទទួលខុសត្រូវដ៏សំខាន់ ក្នុងការពង្រីក-ពង្រឹងសមត្ថភាព និងស្រាវជ្រាវវិទ្យាសាស្ត្របច្ចេកទេសវេជ្ជសាស្ត្រ សម្រាប់គ្រូពេទ្យប្រទេសថៃ និងកម្ពុជា ។ សង្ឃឹមនិងជឿជាក់ថា ប្រជាពលរដ្ឋនៃប្រទេសទាំងពីរ នឹងមានសុខភាពល្អប្រសើរ ប្រកបដោយគុណភាព ។
លោកវេជ្ជបណ្ឌិត បញ្ជាក់ថា ៖ មន្ទីរពេទ្យនេះ មានការលើកកម្ពស់ ការឧត្ថម្ភគាំទ្រ និងមានយន្តការច្បាស់លាស់ក្នុងការបង្កើតនូវរូបមន្តនៃការសិក្សា ស្រាវជ្រាវ ការធ្វើនាវានុវត្តន៍ខាងវេជ្ជសាស្ត្រ ការបង្កើតនូវបរិយាកាសសម្រាប់ការសិក្សា ដើម្បីផ្លាស់ប្ដូរ ចែករំលែកចំណេះដឹង និងបទពិសោធន៍លើផ្នែកវេជ្ជសាស្ត្រ ។ មន្ទីរពេទ្យនេះ ក៏មានយុទ្ធសាស្ត្រច្បាស់លាស់ ក្នុងការឆ្លើយតបទៅនិងគោលនយោបាយឆ្ពោះទៅមុខ ដើម្បីសហគមន៍អាស៊ាន និងដើម្បីសម្រេចបាននូវគោលបំណងក្នុងការពង្រឹងប្រព័ន្ធសេវាកម្មនៃវិទ្យាសាស្រ្តសុខាភិបាល និងយុទ្ធសាស្ត្រសុខភាពសាធារណៈ ។
ជាមួយនោះ ភាគីហត្ថលេខី ខាងកម្ពុជា លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងថា ៖ ផ្អែកលើការចុះកិច្ចព្រមព្រៀងនេះ មន្ទីរពេទ្យបង្អែកខេត្តសៀមរាប អាចបញ្ជូនគ្រូពេទ្យរបស់ខ្លួន សម្រាប់ការបណ្តុះបណ្តាល និងបំប៉នបន្ថែមលើសមត្ថភាពជំនាញផ្នែកវះកាត់ ។ នេះជាលើកដំបូងហើយ ដែលមន្ទីរសុខាភិបាលខេត្តសៀមរាប បានចុះកិច្ចព្រមព្រៀងជាមួយមន្ទីរពេទ្យ រ៉ាចាវីតធី ដែលជាមន្ទីរពេទ្យរដ្ឋដ៏ធំនៃប្រទេសថៃ ។
លោកប្រធានមន្ទីរសុខាភិបាលខេត្ត បន្តថា ការវះកាត់ដោយឡាប៉ារ៉ូស្កុប និង អង់ដូស្កុប គឺជាការវះកាត់តាមបែបបច្ចេកទេសទំនើប ដែលមានស្នាមវះកាត់តូច រហ័ស និងមានប្រសិទ្ធភាព ។ ការវះកាត់ដោយប្រើឧបករណ៍វេជ្ជសាស្រ្តទំនើបនេះ នៅប្រទេសថៃគឺជាកម្មវិធីមួយ ដែលអ្នកជំងឺត្រូវបានវះកាត់ព្យាបាល នឹងអាចវិលត្រឡប់ទៅកាន់គេហដ្ឋានវិញតែក្នុងរយៈពេល១ថ្ងៃប៉ុណ្ណោះ។ ទាំងនេះ វាមិនត្រឹមតែបានបង្ហាញអំពីប្រសិទ្ធភាពនៃការព្យាបាលដោយវះកាត់ប៉ុណ្ណោះទេ តែបញ្ហាគ្រែសម្រាកព្យាបាលរបស់មន្ទីរពេទ្យសម្រាប់អ្នកជម្ងឺ ក៏ពុំមានចំណោទនោះឡើយ ។
លោកប្រធានមន្ទីរសុខាភិបាលខេត្ត បញ្ជាក់បន្ថែមថា ជាក់ស្តែងនៅមន្ទីរពេទ្យបង្អែកខេត្តសៀមរាបបច្ចុប្បន្ន ការព្យាបាលអ្នកជម្ងឺដោយវះកាត់ អ្នកជំងឺនឹងអាចសម្រាកព្យាបាលនៅមន្ទីរពេទ្យប្រមាណជាពី ៤ ទៅ ៥ថ្ងៃ ដូច្នេះក្នុងករណីដែលមានអ្នកជម្ងឺត្រូវវះកាត់ច្រើន គ្រែអ្នកជម្ងឺនឹងត្រូវជួបបញ្ហា កង្វះខាត ។ សង្ឃឹមថា អនាគត មន្ទីរពេទ្យបង្អែកខេត្តសៀមរាប នឹងមានសមត្ថភាព និងលទ្ធភាព ប្រើប្រប្រាស់កម្មវិធី ១ថ្ងៃ សម្រាប់ការព្យាបាលវះកាត់ ដូចមន្ទីរពេទ្យ Rajavithi Hospital ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
