ពុំមានករណីជំងឺណូវ៉ែលកូរ៉ូណា ក្នុងខេត្តសៀមរាប ឡើយ គិតត្រឹមរាត្រីថ្ងៃទី ២៤ ខែមករាឆ្នាំ ២០២០នេះ
ខណៈឯកឧត្តមអភិបាលខេត្ត អភិបាលរងខេត្ត និងមន្ត្រីជាន់ខ្ពស់សាលាខេត្តសៀមរាប ជាច្រើនរូប បានចុះពិនិត្យស្ថានភាពដោយផ្ទាល់ នៅអាកាសយានដ្ឋានអន្តរជាតិខេត្តសៀមរាប។
បើតាមព័ត៌មានផ្លូវការ របស់អ្នកនាំពាក្យក្រសួងសុខាភិបាល បានបញ្ជាក់នៅថ្ងៃទី 23 ខែមករាឆ្នាំ 2020ថា ពុំមានករណីជំងឺរលាកផ្លូវដង្ហើមប្រភេទថ្មី ឬហៅថា ជំងឺណូវ៉ែលកូរ៉ូណា នៅក្នុងប្រទេសកម្ពុជាឡើយ។
ក្នុងឱកាសចុះត្រួតពិនិត្យដើម្បីបង្ការ ជំងឺណូវ៉ែលកូរ៉ូណា នៅអាកាសយានដ្ឋានអន្តរជាតិខេត្តសៀមរាប ឯកឧត្តម ទៀ សីហា អភិបាលខេត្តសៀមរាប បានកោតសរសើរដល់មន្ត្រីសុខាភិបាលខេត្តសៀមរាប ដែលជាមន្ត្រីជួរមុខ បានខិតខំខ្ពស់ អស់ពីសមត្ថភាព ក្នុងការបំពេញការងាររបស់ខ្លួន។
ព័ត៌មានជាតិ ថ្មីៗ
ឯកឧត្តមអភិបាលខេត្ត ក៏បានបង្ហាញពីការព្រួយបារម្ភអំពីការរីករាលដាលជំងឺនេះ ជាបន្តបន្ទាប់ នៅក្នុងបណ្ដាប្រទេសមួយចំនួនលើពិភពលោក ជាពិសេសនៅក្នុងតំបន់អាស៊ី និងអំពាវនាវដល់មន្ត្រីសុខាភិបាល ក្នុងខេត្តសៀមរាបទាំងអស់ ចូលរួម ទប់ស្កាត់ជំងឺដ៏កាចសាហាវនេះ កុំឲ្យមានវត្តមាននៅកម្ពុជា ក៏ដូចជាក្នុងខេត្តសៀមរាបទាំងមូល។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានជម្រាបឯកឧត្តមអភិបាលខេត្តថា ដើម្បីទប់ស្កាត់ ការឆ្លងនៃ ជំងឺណូវ៉ែលកូរ៉ូណា មន្ទីរសុខាភិបាលខេត្តសៀមរាប បានចាត់មន្ត្រីចំនួន ១៦ រូបដោយផ្លាស់ប្ដូរវេនប្រចាំការពេញ ២៤ម៉ោង ឬហៅថា មន្ត្រីចត្តាឡីស័ក នៅច្រក អាកាសយានដ្ឋានអន្តរជាតិខេត្តសៀមរាប។
លោកប្រធានមន្ទីរសុខាភិបាលខេត្ត បានបញ្ជាក់ជូនឯកឧត្តមអភិបាលខេត្តបន្ថែមថា ក្នុងករណី អ្នកដំណើរឆ្លងកាត់ម៉ាស៊ីនត្រួតពិនិត្យតាមដានកម្តៅ រកឃើញពួកគេមានកម្តៅចាប់ពី៣៨អង្សាសេឡើងទៅ មន្រ្តីចត្តាឡីស័ក ដែលប្រចំាការនៅទីនោះ នឹងផ្តល់ប្រឹក្សាដល់អ្នកដំណើរ ឬបញ្ជូនទៅមន្ទីរពេទ្យ ដើម្បីត្រៀមលក្ខណៈឆ្លើយតបជាបន្ទាន់។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
