នៅព្រឹកថ្ងៃទី២៤ខែមករាឆ្នំា២០២០នេះ អង្គការក្រៅរដ្ឋាភិបាល អេដ អេ អាក់ស្យុងកម្ពុជា សហការជាមួយសាលាបឋមសិក្សាវត្ដបូព៌ ក្នុងក្រុងសៀមរាប រៀបចំទិវាអន្ដរជាតិនៃការអប់រំ លើកដំបូងនៅខេត្ដសៀមរាប ដើម្បីលើកទឹកចិត្ដដល់គ្រូបង្រៀន ដែលបានធ្វើឲ្យមនុស្សទទួលបានការអប់រំ ក្នុងការការពារភពផែនដី កសាងវិបុលភាព និងជួយកសាង រក្សាសន្ដិភាពនៅលើពិភពលោក។
លោក ពឹង គឹមឆេន នាយកសាលាបឋមសិក្សាវត្ដបូព៌ ខេត្ដសៀមរាប មានប្រសាសន៍ថា ក្រោមការដឹកនាំរបស់ប្រមុខរាជរដ្ឋាភិបាល វិស័យអប់រំនៅកម្ពុជាមានការរីកចម្រើនទៅមុខជាបន្ដបន្ទាប់ ទាំងនេះ ក៏ជាការចូលរូមគាំទ្រយ៉ាងសកម្មពីម្ចាស់ជំនួយ អង្គការក្រៅរដ្ឋាភិបាល សប្បុរសជន និងលោកគ្រូអ្នកគ្រួផងដែរ
លោកនាយកសាលា បានបន្ថែមថា វិស័យអប់រំ បានផ្ដល់អំណាចដល់មនុស្សជាតិគ្រប់រូប បើគ្មានការអប់រំនេះទេ គឺគ្មានសន្ដិភាព និងប្រទេសជាតិក៏មិនមានការរីកចម្រើនដែរ។
លោក វន សំភាស់ នាយកប្រចាំនៅកម្ពុជា របស់អង្គការ អេដអេអាក់ស្យុងកម្ពុជា លើកឡើងថា ទិវាអន្ដរជាតិនៃការអប់រំនេះ ជាការដាស់ស្មារតី ក៏ដូចចង់ឲ្យអ្នកពាក់ព័ន្ធ ជាពិសេសអាណាព្យាបាលសិស្សានុសិស្ស យកចិត្ដទុកដាក់លើការអប់រំ ឲ្យបានគ្រប់គ្នាៗនៅទូទាំងប្រទេសកម្ពុជា។
លោក កត់សម្គាល់ឃើញថា ក្នុងរយៈពេលជាង៣ទស្សវត្សរ៍កន្លងមកនេះ ពោលក្រោយពេលបញ្ចប់សង្គ្រាម វិស័យអប់រំនៅកម្ពុជាមានភាពរីកចម្រើន និងមានការអភិវឌ្ឍជឿនលឿនគួរឲ្យចាប់អារម្មណ៍ ជាក់ស្ដែងសាលារៀនបានរីកដុះដាលទាំងនៅក្នុងទីប្រជុំជន និងជនបទ។ ការរីកចម្រើនលើវិស័យអប់រំនេះ វាបានធ្វើឲ្យមានការប្រែប្រួលទៅមុខឥតឈប់ឈ ទាំងសង្គមសេដ្ឋកិច្ច សេដ្ឋកិច្ចក្នុងសង្គមគ្រួសារ និងការទទួលស្គាល់ពីបណ្ដាប្រទេសមហាអំណាចលើពិភពលោក។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
