នៅថ្ងៃទី២៧ ខែមករា ឆ្នាំ២០២០ រដ្ឋបាលស្រុកប្រាសាទបាគង បានរៀបចំកម្មវិធីសំអាតអានាម័យតាមដងផ្លូវ ក្រោមប្រធានបទ «សមាគមន៍ល្អ បរិស្ថានស្អាត ផ្ដើមចេញពីយើងទាំងអស់គ្នា សូមជួយថែរក្សាបរិស្ថាន កុំចោលសំរាមក្នុងទឹក និងទីសាធារណៈ» ដោយមានការចូលរួមពីសំណាក់លោក សូរ ផ្លាតុង អភិបាលនៃគណ:អភិបាលស្រុក រួមជាមួយលោកលោកស្រីសមាជិកក្រុមប្រឹក្សាស្រុក កងកម្លាំងប្រដាប់អាវុធទាំង៣ប្រភេទ សមាជិកក្រុមប្រឹក្សាឃុំ មេភូមិ សមាជិកសហគមន៍ដឹកភ្ញៀវទេសចរណ៍ លោកគ្រូអ្នកគ្រូ សិស្សានុសិស្សនិងបងប្អូនប្រជាលរដ្ឋប្រមាណ ៥១០នាក់ ស្រី២៨០នាក់ ដោយបានរួមគ្នាធ្វើការសំអាតបរិស្ថាន និងប្រមូលសំរាមនៅតាមទីសាធារណះ នៅតាមមាត់ព្រែកនិងផ្លូវ សំអាតបរិស្ថាន នៅក្នុង ភូមិគោកក្ដុល ភូមិដីក្រហម ភូមិត្នោតកំបុត ក្នុងឃុំកំពង់ភ្លុក ។
លោក សូរ ផ្លាតុង បញ្ជាក់ថា តំបន់ទេសចរណ៍កំពង់ភ្លុក គឺជាគោលដៅទេសចរណ៍មួយដ៏ល្បីមួយក្នុងចំណោម គោលដៅទេសចរណ៍ ជាច្រើនក្នុងខេត្តសៀមរាប ដែលភ្ញៀវទេសចរជាតិ និងអន្តរជាតិ មានការចាប់អារម្មណ៍ ។ ក្នុងនោះដែរ ទេសភាពព្រៃកោងកាង ដ៏ត្រកាលក្រាលផ្ទៃជលសា ជាជម្រកសត្វព្រៃដ៏សម្បូរបែប និងកសិដ្ឋានចិញ្ចឹមក្រពើដ៏កម្រប្រទះផងដែរ។
លោកបញ្ជាក់បន្ថែមថា ភ្ញៀវទេសចរដែលបានមកទីនេះ ច្រើនចំណាយពេលអុំទូកកម្សាន្ត ទស្សនាកសិដ្ឋានចិញ្ចឹមក្រពើ ការបង់សំណាញ់របស់ប្រជានេសាទ និងជីវភាពរស់នៅក្នុងភូមិរួមមានសាលារៀន វត្តអារាម និងលំនៅឋានបណ្ដែតទឹកគួរជាទីគយគន់ ។ ក្នុងនោះដើម្បីឲ្យតំបន់នេះមានសោភ័ណ្ឌភាពល្អ លុះត្រាតែមានការចូលរួមចំណែកពីបងប្អូនប្រជាពលរដ្ឋ និងភ្ញៀវទាំងអស់ត្រូវចូលរួមក្នុងការលើកកម្ពស់សោភណ័ភាព តំបន់ទេសចរណ៍យើងឲ្យបានល្អបន្ថែមទៀត ជាពិសេសត្រូវសម្អាតបរិស្ថាន រក្សាអនាម័យនៅទីនេះល្អ ព្រោះបរិស្ឋាន គឺរឿងសំខាន់ដែលយើងត្រូវរួមគ្នាធ្វើ និងអនុវត្តជាប្រចាំថ្ងៃ ៕
ព័ត៌មានជាតិ ថ្មីៗ
អត្តបទ៖រដ្ឋបាលស្រុកប្រាសាទបាគង
