លោក នាក់ ណេរ៉ុន អភិបាលរងខេត្ដសៀមរាប បានណែនាំ និងសំណូមពរដល់នាយកសាលា លោកគ្រូអ្នកគ្រូដែលបង្រៀននៅតាមបណ្ដាស្រុកនៃខេត្ដសៀមរាបទាំងអស់ អោយនាំគ្នាបង្កើតផេក ឬហ្វេសប៊ុកសម្រាប់សាលារៀន ដើម្បីទប់ស្កាត់ព័ត៌មានអសកម្ម ព័ត៌មានក្លែងក្លាយ ឬដើម្បីឆ្លើយតមការរិះគន់ពីប្រជាពលរដ្ឋនិងសាធារណៈជន ដែលបានចោទលើវិស័យអប់រំ នៅតាមបណ្ដាញសង្គមដ៍មានប្រជាប្រិយភាពមួយនេះ ។ លោកអភិបាលរងខេត្ដសៀមរាប បានលើកឡើងបែបនេះ នៅក្នុងពិធីបិទសន្និបាតបូកសរុប និងវាយតម្លៃការងារអប់រំយុវជន និងកីឡា ឆ្នាំសិក្សា២០១៨-២០១៩ និងលើកទិសដៅឆ្នាំ២០២០ នៅខេត្ដសៀមរាប កាលពីថ្ងៃទី៣១ខែមករាឆ្នាំ២០២០នេះ ។
លោក នាក់ ណេរ៉ុន បានមានប្រសាសន៍ទៀតថា កន្លងមកមានសាធារណៈជន និងជនឆ្លៀតឱកាសមួយចំនួនធ្វើការលើវិស័យអប់រំផ្នែកឯកជន នៅស្រុកជីក្រែង និងស្រុកវ៉ារិន បានបន្ដុះបង្អាប់សាលារៀនរបស់រដ្ឋគ្មានគុណភាព នៅតាមបណ្ដាញសង្គមហ្វេសប៊ុក ដើម្បីរកប្រយោជន៍ ពីមូលនិធិដៃគូរអភិវឌ្ឍន៍ដែលធ្វើអោយអ្នកនយោបាយមួយចំនួនវាយប្រហារថាមិនយកចិត្ដទុកដាក់ មកលើវិស័យអប់រំ ។ ជាមួយគ្នានោះក៍បានបង្កើតព័ត៌មានក្លែងក្លាយវាយប្រហារ និងរិះគន់គ្មានការពិត ដែលធ្វើអោយប៉ះពាល់ដល់ថ្នាក់ដឹកនាំផងដែរ ខណៈដែលយើងមិនបានឆ្លើយតបភ្លាមៗទៅលើការរិះគន់ទាំងអស់នោះ ។
លោកបានបន្ដថា នៅពេលមានជនឆ្លៀតឱកាសនិងមានបញ្ហាដែលកើតឡើងនៅតាមបណ្ដាញសង្គមនេះ លោកបានសំណូមពរអោយនាយកសាលាលោកគ្រូអ្នកគ្រូ និងអង្គភាពពាក់ព័ន្ធបង្កើតផេកឬហ្វេសប៊ុក ដើម្បីឆ្លើយតបជាមួយព័ត៌មានទាំងនោះដើម្បីកុំអោយជនឆ្លៀតឱកាសទាំងនោះពង្រីកព័ត៌មានក្លែងក្លាយកាន់តែធំ។លោកបានបន្ដថាព័ត៌មានក្លែងក្លាយនេះ ធ្វើអោយប៉ះពាល់ដល់មនុស្សនិងថ្នាក់ដឹកនាំ ជាក់ស្ដែងដូចជាការបង្ហោះព័ត៌មានក្លែងក្លាយ ពីជំងឺរលាកសួតកូរ៉ូណាវីរុសថ្មីនេះជាដើម ។
សូមជម្រាបថា ពិធីសន្និបាតបូកសរុបនិងវាយតម្លៃការងារអប់រំយុវជននិងកីឡាខេត្ដសៀមរាបនេះ ធ្វើឡើងរយៈពេល២ថ្ងៃចាប់ពីថ្ងៃទី៣០ដល់ថ្ងៃទី៣១ខែមករាឆ្នាំ២០២០នេះ ។ ពិធីសន្និបាតនេះ បានចែករំលែកបទពិសោធការរៀនសូត្រពីគ្នាទៅវិញទៅមក ក្នុងអង្គសន្និបាតបូកសរុប និងវាយតម្លៃការងារអប់រំ យុវជន និងកីឡាពីសមិទ្ធផល និងមេរៀនបទពិសោធន៍ការអប់រំក្នុងឆ្នាំចាស់ និងកំណត់បាននូវទិសដៅភារកិច្ច សម្រាប់អនុវត្តក្នុងឆ្នាំសិក្សាថ្មីនេះសំដៅដោះស្រាយនូវរាល់បញ្ហាបញ្ហាទាំងឡាយធានានូវការអភិវឌ្ឍបន្តទៅតាមស្តង់ដារមួយដែលកាន់តែមានកម្រិតខ្ពស់ដោះស្រាយនូវបណ្តាបញ្ហាទាំងឡាយ ដើម្បីកុមារ យុវជន មហាជន និងសំណូមពរតាមការរីកចម្រើនរបស់ជាតិយើង ៕
អត្ថបទ៖ បូ សាវី, រូបភាព៖ អ៊ុន ណារាជ្យ
