កាលពី វេលាម៉ោងប្រមាណ១យប់រំលងអាធ្រាត្រ ឈានចូលថ្ងៃទី០៤ ខែកុម្ភៈ ឆ្នាំ២០២០ កម្លាំងនគរបាលស្រុកប្រាសាទបាគង បានឃាត់ខ្លួនជនសង្ស័យចំនួន២នាក់ កំពុងធ្វើសកម្មភាពនេសាទខុសច្បាប់ ក្នុងតំបន់អភិរក្សធនធានជលផល ឡូតិ៍លេខ៦ នៅចំណុចរាំងឆ័ត្រ ព្រំប្រទល់ឃុំកំពង់ភ្លុក ស្រុកប្រាសាទបាគង និងឃុំកំពង់ឃ្លាំង ស្រុកសូទ្រនិគម ខេត្តសៀមរាប។
លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ក្នុងប្រតិបត្តិការចុះបង្រ្កាបបទល្មើសនេសាទនេះ កម្លាំងនគរបាល នៃអធិការដ្ឋាននគរបាលស្រុកប្រាសាទបាគង បានដកហូត ទូកស្មាច់ ០១គ្រឿង របស់ជនសង្ស័យទាំង២នាក់ ដែលមានបំពាក់ដងរុញស៊ីប ដែលជាឧបករណ៍នេសាទខុសច្បាប់ មួយឈុត រួមនឹង សាច់មងទំហំ១.៥ ហ៊ុន ប្រវែង ៥១០ម៉ែត្រ។
ជនសង្ស័យ ដែលសមត្ថកិច្ចឃាត់ខ្លួនបាន ទី១ ឈ្មោះ រ៉ាយ សេត ភេទ ប្រុស អាយុ ៣២ ឆ្នាំ រស់នៅភូមិ តាជំនាង ឃុំកំពង់ឃ្លាំង ស្រុកសូទ្រនិគម ខេត្តសៀមរាប និងទី២ ឈ្មោះ វ៉ន ខួច ភេទប្រុស អាយុ៣០ឆ្នាំ រស់នៅភូមិ ចំការយួន ឃុំកំពង់ឃ្លាំង ស្រុកសូទ្រនិគម ខេត្តសៀមរាប។ ជាមួយនោះ ជនសង្ស័យទាំង២នាក់នេះ ត្រូវបានកម្លាំងនគរបាលស្រុកប្រាសាទបាគង ប្រគល់ជូនរដ្ឋបាលជលផលកំពង់ភ្លុក ដើម្បីចាត់ការតាមនីតិវិធី។
ព័ត៌មានជាតិ ថ្មីៗ
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
