អាហារូបករណ៍ទៅបន្តការសិក្សានៅប្រទេសអូស្ត្រាលី ហៅថា Australia Awards បានចាប់ផ្ដើមទទួលទទួលការដាក់ពាក្យហើយ ចាប់ពីថ្ងៃទី១ ខែកុម្ភៈ ដល់ ថ្ងៃទី៣០ ខែមេសា ឆ្នាំ២០២០ នេះបើយោងតាមសិក្ខាសាលាផ្សព្វផ្សាយ នៅសាលាខេត្តសៀមរាប នាព្រឹកថ្ងៃទី០៦ ខែកុម្ភៈ ឆ្នាំ២០២០នេះ។
Australia Awards ជាអាហារូបករណ៍របស់រដ្ឋាភិបាលអូស្ត្រាលី ឧបត្ថម្ភដោយស្ថានទូតអូស្ត្រាលី ដែលនឹងផ្ដល់ឱកាសដល់ ប្រជាពលរដ្ឋកម្ពុជាទូទៅ ដែលមានអាយុចាប់ពី២០ឆ្នាំឡើងទៅ បានបញ្ចប់ថ្នាក់បរិញ្ញាបត្រ មានសញ្ជាតិខ្មែរ តាំងពីកំណើត និងរស់នៅយ៉ាងតិច រយៈពេល២ឆ្នាំក្នុងប្រទេសកម្ពុជា។
ជារៀងរាល់ឆ្នាំ និស្សិតកម្ពុជាចាប់៤៥ ដល់ ៥០នាក់ បានទទួលអាហារូបករណ៍នេះ ដើម្បីបន្តការសិក្សានៅ សាកលវិទ្យាដែលពួកគេបានជ្រើសរើស ក្នុងប្រទេសអូស្រ្តាលី។
លោក John Walsh ប្រធានក្រុមអាហារូបករណ៍ លើកឡើងថា សិក្ខាសាលាផ្សព្វផ្សាយនេះ មានបំណងចែករំលែកព័ត៌មានទូទៅ ពាក់ព័ន្ធនឹងអាហារូបករណ៍ សិស្សនិស្សិត ក៏ដូចជាបុគ្គលិកមន្ត្រីរាជការ ដើម្បីអាចទទួលបានឱកាសទៅសិក្សាបន្តនៅប្រទេសអូស្ត្រាលី។
ក្នុងនាមក្រុមប្រឹក្សាខេត្ត នៃគណៈអភិបាលខេត្តសៀមរាប លោក ស្មៀន ប៊ុនធឿន នាយករងរដ្ឋបាលខេត្តសៀមរាប បានជំរុញដល់មន្ត្រីរាជការ សិស្សនិស្សិត និងសាធារណជនទូទៅ ដែលមានសមត្ថភាព ចូលរួមដាក់ពាក្យឲ្យបានអតិបរមា ដោយលោកវាយតម្លៃថា នេះជាឱកាសដ៏មានសារៈសំខាន់ សម្រាប់យុវជនក្នុងខេត្តសៀមរាប និងជាធនធានសម្រាប់ប្រទេសជាតិ នៅពេលពួកគេបានបញ្ចប់ការសិក្សាពីប្រទេសអូស្ត្រាលីវិញ។
សូមជម្រាបថា ដើម្បីទទួលបានព័ត៌មានអំពីរយៈពេលដាក់ពាក្យ និងលក្ខខណ្ឌរបស់អាហារូបករណ៍នេះ សូមចូលទៅកាន់គេហទំព័រ www.australiaawardscambodia.org/contact/
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
