លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឱ្យដឹងថា គម្រោងការស្ថាបនាផ្លូវកង់នៅក្នុងតំបន់អង្គរដែលមានចម្ងាយប្រមាណ២៣គីឡូម៉ែត្រនេះ សម្រាប់ប្រជាពលរដ្ឋ និងភ្ញៀវទេសចរណ៍ជាតិ អន្ដរជាតិប្រើប្រាស់ ហើយបានចាប់ផ្ដើមធ្វើការស្ថាបនាកាលពីខែធ្នូឆ្នាំ២០១៩ នឹងត្រូវបានសាងសង់រួចរាល់នៅខែមិថុនា ឆ្នាំ២០២០នេះ ខណៈមកដល់បច្ចុប្បន្ន ផ្លូវកង់នេះសម្រចបានប្រមាណ១៧គីឡូម៉ែត្រ គឺស្មើនឹង៦០ភាគរយហើយ ហើយការស្ថាបនាផ្លូវនេះឡើង ក្នុងគោលបំណងដើម្បីសម្រួលចរាចរណ៍ដល់ប្រជាពលរដ្ឋ សិស្សានុសិស្ស ក៏ដូចជាសម្រួលការចរាចរណ៍ដល់អ្នកទេសចរជិះកង់ រួមនឹងកាត់បន្ថយការកកស្ទះ និងគ្រោះថ្នាក់ចរាចរណ៍លើផ្លូវធំផងដែរ ។
លោក យិត ចាន់ដារដ្ឋ បានឱ្យដឹងបន្ថែមថា ផ្លូវកង់នេះមានទទឹងប្រវែង២ម៉ែត្រ ដែលចំណុចចាប់ផ្ដើមចេញពីកន្លែងត្រួតពិនិត្យសំបុត្រចូលទស្សនាអង្គរចាស់ កាត់ក្រោយអង្គរវត្ត បន្តទៅប្រាសាទក្រវ៉ាន់ កាត់ខាងត្បូងប្រាសាទបន្ទាយក្ដី បត់ទៅខាងជើងប្រាសាទតាព្រហ្ម ឆ្ពោះទៅស្ពានប្រាសាទតាកែវ រីឯចំណែកតំបន់ផ្លូវវង់ធំ គឺចេញដំណើរពីស្រះស្រង់ រហូតដល់ខ្លោងទ្វារដីឆ្នាំង ហើយផ្លូវនេះ បានកសាងក្នុងទិសដៅស្របនឹងផ្លូវកៅស៊ូដែលមានស្រាប់ និងឃ្លាតពីផ្លូវកៅស៊ូកន្លែងខ្លះមានចម្ងាយប្រមាណ២៥ម៉ែត្រ និង កន្លែងខ្លះមានចម្ងាយ១០ម៉ែត្រ ដោយអាស្រ័យទៅតាមទីតាំងនិងស្ថានភាពដី ។
លោកនាយករងអាជ្ញាធរជាតិអប្សរា បានឱ្យដឹងបន្ថែមទៀតថា មុននឹងសាងសង់ឡើង អាជ្ញាធរជាតិអប្សរាបានគិតគូរច្បាស់ពីការលើតម្លៃបរិស្ថាន តម្លៃវប្បធម៌ ក៏ដូចជាតម្លៃបេតិកភណ្ឌបែបជនបទ ដោយមានអ្នកជំនាញបុរាណវិទ្យាសិក្សាយ៉ាងច្បាស់លាស់មុនសាងសង់ឡើង អាជ្ញាធរជាតិអប្សរាបានគិតគូរច្បាស់ពីការលើតម្លៃបរិស្ថាន តម្លៃវប្បធម៌ ក៏ដូចជាតម្លៃបេតិកភណ្ឌបែបជនបទ ដោយមានអ្នកជំនាញបុរាណវិទ្យាសិក្សាយ៉ាងច្បាស់លាស់មុនកសាងផ្លូវកង់នេះ ហើយផ្លូវកង់នេះ កសាងជាប្រភេទផ្លូវស្រាលមិនប៉ះពាល់ដល់ស្រទាប់ដី និងមានភាពបត់បែនទៅតាមដើមឈើតូចធំជាច្រើន ពិសេស ត្រូវបានក្រុមអ្នកជំនាញការអាដហុក របស់គណៈកម្មាធិការអន្ដរជាតិអាយស៊ីស៊ី-អង្គរ បានកោតសរសើរជាខ្លាំងទៅលើការបង្កើតថ្មីរបស់អាជ្ញាធរអប្សរា និងបានសាទរចំពោះបច្ចេកទេសធ្វើផ្លូវកង់នេះ ៕
ព័ត៌មានជាតិ ថ្មីៗ
អត្ថបទ និង រូបថត : លោក ឈិត សាវី
កែសម្រួលអត្ថបទ : លោក លីវ សាន្ត
