នៅព្រឹកថ្ងៃទី០៧ ខែកុម្ភៈ ឆ្នាំ២០២០ ប្រតិភូក្រុមការងាររបស់រាជរដ្ឋាភិបាល ចុះមូលដ្ឋានស្រុកស្រីស្នំខេត្តសៀមរាប បាននាំយកសម្ភារៈព័ត៌មានវិទ្យាមួយចំនួន ទៅប្រគល់ជូនសិស្សានុសិស្ស នៃវិទ្យាល័យ ២៨មករា ស្ថិតនៅ ឃុំជ្រោយនាងងួន ស្រុកស្រីស្នំ ខេត្តសៀមរាប។
វិទ្យាល័យ ២៨មករា ជាសាលាកម្រិតមធ្យមសិក្សាតែមួយគត់ក្នុងស្រុកស្រីស្នំ ដែលមានចាប់ពីថ្នាក់ទី៧ ដល់ថ្នាក់ទី១២ និងមានសិស្សសរុបចំនួន ១៤២៨នាក់ ក្នុងនោះស្រី៧៩៣នាក់។
បើតាម ការឲ្យដឹងពីលោកគ្រូ នៃវិទ្យាល័យ ២៨មករា ទីតាំងសាលានេះ ធ្លាប់ជាសមរភូមិសម័យសង្រ្គាម គ្រាប់មីនក្នុងដី និងបឹងបួ។ បច្ចុប្បន្នវិទ្យាល័យនេះ មានបរិស្ថាន បង្កឲ្យបរិយាកាសការសិក្សាមានភាពល្អប្រសើរ ក្នុងនោះសាលាមានបន្ទប់សិក្សាសរុប ៤០បន្ទប់ បន្ទប់កុំព្យូទ័រចំនួន ២បន្ទប់ បន្ទប់ពិសោធន៍ ៣បន្ទប់ អគារអន្តេរវិសិកដ្ឋាន ៤បន្ទប់ សម្រាប់ អ្នកគ្រូ និង សិស្សស្នាក់នៅ ទីលានកីឡា រួមនិងសមិទ្ធផលសាលាជាច្រើនទៀត។ ជាមួយនេះ សម្ភារៈព័ត៌មានវិទ្យារួមមាន កុំព្យូទ័រចំនួន ៥គ្រឿង រួមនិងអាគុយទប់ភ្លើងចំនួន ៥គ្រឿង និងជួយសម្រួល ពង្រឹកការសិក្សាស្រាវជ្រាវរបស់សិស្សានុសិស្ស បន្ថែមពីលើកុំព្យូទ័រដែលស្រាប់ តែមិនអាចបំពេញតម្រូវការសិស្ស ដែលមាននាពេលបច្ចុប្បន្នបាន។
មានមតិសំណេះសំណាលក្នុងឱកាសនោះ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំយុវជន និងកីឡា និងជាប្រធានក្រុមការងាររបស់រាជរដ្ឋាភិបាល ចុះមូលដ្ឋានស្រុកស្រីស្នំខេត្តសៀមរាប មានប្រសាសន៍ថា ដោយសារសន្តិភាព សិស្សានុសិស្ស មានពេលវេលាគ្រប់គ្រាន់មកសាលារៀន ដែលខុសពីសម័យខ្មែរក្រហម ក្មេងៗជំនាន់មុន ត្រូវចូលបម្រើកងទ័ព ព្រោះតែសង្គ្រាម។ ដោយឡែក បដិវត្តន៍វប្បធម៌ របស់ពួកខ្មែរក្រហម បានសម្លាប់អ្នកចេះដឹង បញ្ញវ័ន្ត ស្ទើរគ្មានសល់។ ទាំងអស់នេះ ក្មួយៗ សិស្សានុសិស្សត្រូវ សិក្សាឲ្យបានច្បាស់លាស់ ពីប្រវត្តិសាស្ត្រដ៏ជូរចត់នេះ។
ឯកឧត្តម បន្ថែមថា ជ័យជម្នះ ៧ មករា ១៩៧៩ គឺជាជោគជ័យមិនអាចកាត់ថ្លៃបាន ដែលសម្ដេចតេជោ ហ៊ុន សែន បានយកអាយុជីវិតទៅប្ដូរ និងនាំកម្ពុជាទៅរកមាគ៌ាសន្តិភាព តាមរយៈនយោបាយឈ្នះឈ្នះរបស់សម្ដេច។ ២១ឆ្នាំនៃសន្តិភាព ដ៏ពេញលេញ កម្ពុជាបានក្លាយជាប្រទេស ដែលមានភាពលេចធ្លោក្នុងការអភិវឌ្ឍសេដ្ឋកិច្ចក្នុងតំបន់ ប្រមាណក្នុងរង្វង់ ៧ភាគរយក្នុងមួយឆ្នាំ។
ឯកឧត្តម បានបញ្ជាក់ផងដែរ ជាមួយនឹងការអភិវឌ្ឍលើគ្រប់វិស័យនាពេលបច្ចុប្បន្ន នៅក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា វិស័យអប់រំ នៅតែជាវិស័យអាទិភាព ក្នុងចំណោមវិស័យអាទិភាពដទៃទៀត។ ឯកឧត្តម បានអំពាវនាវ ដល់សិស្សានុសិស្សត្រូវខិតខំសិក្សារៀនសូត្រ និងចូលរួមថែរក្សាបរិស្ថាន ចៀសឆ្ងាយពីគ្រឿងញៀន ដើម្បីធនធានរបស់ប្រទេសជាតិនាពេលអនាគត។
រូបភាព : លោក ខេង ឧត្តម
អត្ថបទ : លោក សេង ផល្លី
