ការផ្សាយព័ត៌មានខុស វានឹងក្លាយជាព័ត៌មានមិនពិត ហើយបើទោះជាមានការចុះផ្សាយបកស្រាយបំភ្លឺយ៉ាងណាក៏ដោយ ក៏មិនអាចលាងជម្រះព័ត៌មានមិនពិតនោះព័ត៌មានខុសនោះ បាន១០០ភាគរយនោះឡើយ នេះបើតាមសម្ដីលោក លោក អ៊ុន ច័ន្ទថុល មេធាវីប្រចាំអង្គការជំនួយផ្នែកច្បាប់នៃកម្ពុជា។
មានវត្តមានចូលរួមក្នុងវគ្គបណ្តុះបណ្តាលការអនុវត្តច្បាប់ ស្តីពី របបសារព័ត៌មាន នៅខេត្តសៀមរាប ធ្វើឡើងនៅថ្ងៃទី០៦ ខែកុម្ភៈ ឆ្នាំ២០២០ លោកមេធាវី អ៊ុន ច័ន្ទថុល លើកឡើងថា ការធ្វើទំនើបកម្មនៅក្នុងប្រព័ន្ធផ្សព្វផ្សាយ គឺស្របតាមការវិវត្តន៍នៃសង្គមជាតិ និងពិភពលោក និងត្រូវដើរទន្ទឹមនឹងការអភិវឌ្ឍធនធានមនុស្ស ក៏ប៉ុន្តែមិនអាចខ្វះបានទេ នូវការគ្រប់គ្រងមួយ ដែលមានប្រសិទ្ធភាព នោះគឺការអនុវត្តច្បាប់ និងសីលធម៌វិជ្ជាជីវៈរបស់អ្នកសារព័ត៌មាន។
លោកពន្យល់ថា អ្នកដែលទទួលបានព័ត៌មានខុសទាំងអស់ អាចពុំបានឃើញព័ត៌មានស្រាយបំភ្លឺ ទៅលើព័ត៌មានដែលបានផ្សាយខុសទាំងអស់គ្នានោះឡើយ នោះភាពអវិជ្ជមានវានឹងកើតឡើង និងបង្កភាពស្មុគស្មាញក្នុងសង្គមជាតិ។
ព័ត៌មានជាតិ ថ្មីៗ
លោកមេធាវី លើកឡើងបន្ថែមថា សារព័ត៌មានអនឡាញ ដូចជា ហ្វេសប៊ុក ឬវេបសាយ មិនគួរប្រញាប់ផ្សាយពេកទេ ត្រូវមានប្រភពយោង និងពិនិត្យឲ្យបានច្បាស់លាស់ ដើម្បីជឿជាក់ថាអាចទទួលយកបាន។
កាលពីថ្ងៃទី១៤ ខែមករានេះ ក្នុងពិធីជួបជុំលើកទី៤ រវាងសម្ដេចតេជោនាយករដ្ឋមន្ត្រី ហ៊ុន សែន ជាមួយអ្នកសារព័ត៌មាន នៅរាជធានីភ្នំពេញ សម្ដេចបានសម្រេចបង្កើតក្រុមមេធាវីរបស់សម្ដេច ដើម្បីជួយដល់អ្នកសារព័ត៌មាន តាមសំណើររបស់ក្រសួងព័ត៌មាន ទន្ទឹមសម្ដេចក៏បានផ្ដល់ពាក្យស្លោកមួយថា”អ្នកសារព័ត៌មាន កុំបំពានអ្នកដទៃ កុំបំភ្លៃការពិត” សម្រាប់អ្នកសារព័ត៌មានទូទាំងប្រទេសអនុវត្តន៍ផងដែរ។
រូបភាព : លោក ខេង ឧត្តម
អត្ថបទ : លោក សេង ផល្លី
