នារសៀលថ្ងៃទី០៩ ខែកុម្ភៈ ឆ្នាំ២០២០នេះ ថ្នាក់ដឹកនាំ និង មន្ត្រីរាជការទាំងអស់ នៃមន្ទីរព័ត៌មានខេត្តសៀមរាប រៀបចំពិធីអបអរសាទរខួប១០ឆ្នាំនៃការផ្សាយរបស់វិទ្យុFMជាតិនគរភ្នំ និង ខួប០៣ឆ្នាំ នៃការផ្សាយរបស់ទូរទស្សន៍ជាតិខេត្ត ដើម្បីបង្ហាញនូវបេសកកម្ម និង សមិទ្ធផលសំខាន់ៗតាមរយៈវីដេអូ ដែលមន្ត្រីការិយាល័យវិទ្យុនិងទូរទស្សន៍ បានសហការសាមគ្គីគ្នាយ៉ាងជិតស្និទ បំពេញភារកិច្ចតាមតួនាទីរបស់ខ្លួនដោយស្មារតីទទួលខុសត្រូវ ធ្វើឲ្យសម្រេចបាននូវលទ្ធផលគួរជាទីមោទនៈ ។
មានប្រសាសន៍ក្នុងឱកាសនោះ លោក លីវ សុខុន ប្រធានមន្ទីរព័ត៌មានខេត្តសៀមរាប បានសម្ដែងនូវការកោតសរសើរ ចំពោះកិច្ចខិតខំប្រឹងប្រែងរបស់មន្ត្រី នៃការិយាល័យវិទ្យុនិងទូរទស្សន៍ ដែលបានខិតខំបំពេញការងារអស់ពីកម្លាំងកាយចិត្ត ប្រាជ្ញានិងស្មារតី សហការគ្នាយ៉ាងស្អិតរមួត ផលិតនូវកម្មវិធីសំខាន់ៗជាច្រើន ក្នុងគោលដៅបង្កើនការយល់ដឹង ដល់សារធារណជនទូទៅ អំពីការអភិវឌ្ឍលើគ្រប់វិស័យរបស់ខេត្តសៀមរាប ក៏ដូចជាការអភិវឌ្ឍនៅក្នុងប្រទេសកម្ពុជា , ព្រឹត្តិការណ៍សំខាន់ៗ ថ្មីៗ ដែលកើតមានឡើងទាំងនៅក្នុងខេត្ត ក្នុងប្រទេស និង នៅលើសកលលោក , ការងារអប់រំចំណេះដឹងទូទៅ ដូចជា ៖ វប្បធម៌ ប្រពៃណី និង ទំនៀបទម្លាប់ខ្មែរ , ចំណេះដឹងពីបច្ចេកទេស , ចំណេះដឹងពីសុខភាព , ចំណេះដឹងពីច្បាប់ លិខិតបទដ្ឋានគតិយុត្តនានា , គោលនយោបាយរបស់រាជរដ្ឋាភិបាលកម្ពុជា និង ការងារអភិបាលកិច្ចល្អ ។ល។ ដែលទទួលបានការគាំទ្រពីសំណាក់ប្រិយមិត្តអ្នកស្ដាប់វិទ្យុ និង ទស្សនិកជន ដែលបានទស្សនាការផ្សាយរបស់ទូរទស្សន៍ជាតិខេត្ត ទាំងនៅក្នុងខេត្ត និង ក្រៅខេត្ត ជាពិសេសទទួលបានការគាំទ្រ និង កោតសរសើរពីសំណាក់ថ្នាក់ដឹកនាំក្រសួងព័ត៌មាន និង អាជ្ញាធរខេត្តសៀមរាប ។
លោកប្រធានមន្ទីរព័ត៌មានខេត្ត មានប្រសាសន៍ទៀតថា តាមរយៈវីដេអូ ដែលមានរយៈពេលជាង២០នាទី ស្ដីអំពីសមិទ្ធផលការងាររបស់មន្ទីរព័ត៌មាន សរបញ្ជាក់ឲ្យឃើញថា ក្នុងរយៈពេល១០ឆ្នាំ នៃការផ្សាយរបស់ វិទ្យុFMជាតិនគរភ្នំ និង ០៣ឆ្នាំ នៃការផ្សាយរបស់ទូរទស្សន៍ជាតិខេត្តសៀមរាប យើងបានធ្វើការផ្សព្វផ្សាយយ៉ាងទូលំទូលាយ ក្នុងគោលដៅបង្កើនការយល់ដឹងដល់សារធារណជនទូទៅ អំពីការអភិវឌ្ឍលើគ្រប់វិស័យរបស់ខេត្តសៀមរាប ក៏ដូចជាការអភិវឌ្ឍនៅក្នុងប្រទេសកម្ពុជា , ព្រឹត្តិការណ៍សំខាន់ៗ ថ្មីៗ ដែលកើតមានឡើងទាំងនៅក្នុងខេត្ត ក្នុងប្រទេស និង នៅលើសកលលោក , ការងារអប់រំចំណេះដឹងទូទៅ ដូចជា ៖ វប្បធម៌ ប្រពៃណី និង ទំនៀបទម្លាប់ខ្មែរ , ចំណេះដឹងពីបច្ចេកទេស , ចំណេះដឹងពីសុខភាព , ចំណេះដឹងពីច្បាប់ លិខិតបទដ្ឋាន គតិយុត្តនានា , គោលនយោបាយរបស់រាជរដ្ឋាភិបាលកម្ពុជា និង ការងារអភិបាលកិច្ចល្អ ។
លោក លីវ សុខុន ប្រធានមន្ទីរព័ត៌មានខេត្តសៀមរាប មានប្រសាសន៍បន្ថែមទៀតថា ទោះបីជាយើងសម្រេចបាននូវសមិទ្ធផលយ៉ាងធំធេង ដោយទទួលបានលទ្ធផលដ៏ល្អប្រសើរយ៉ាងនេះក្ដី ក៏យើងមិនត្រូវស្កប់ស្កល់ចំពោះស្នាដៃទាំងអស់នេះដែរ។ ដូច្នេះក្នុងឱកាសនេះ ក្នុងនាមថ្នាក់ដឹកនាំមន្ទីរព័ត៌មានខេត្ត សូមលើកទឹកចិត្តដល់មន្ត្រីទាំងអស់នៃការិយាល័យទាំងពីរ ត្រូវខិតខំប្រឹងប្រែងបន្តទៀត រួមទាំងការបង្កើននូវចំណេះដឹងជំនាញវិជ្ជាជីវៈ ដើម្បីធ្វើឲ្យសម្រេចបាននូវសមិទ្ធផលថ្មីៗបន្ថែមទៀត។ ដោយអនុលោមតាមប្រកាសរបស់ក្រសួងព័ត៌មាន មន្ទីរព័ត៌មានរាជធានី-ខេត្ត មានតួនាទីជាសេនាធិការទទួលបន្ទុកអនុវត្ត និង សម្របសម្រួលរបស់ក្រសួងព័ត៌មាន ក្នុងវិស័យព័ត៌មាន និងសោតទស្សន៍ក្នុងក្របខ័ណ្ឌរាជធានី-ខេត្ត ស្របពេលដែលស្ថានការណ៍នៅក្នុងពិភពលោកបច្ចុប្បន្នកំពុងមានការរីកចម្រើនយ៉ាងខ្លាំង តាមរយៈប្រព័ន្ធផ្សព្វផ្សាយរួមមាន វិទ្យុ ទូរទស្សន៍ កាសែត ទស្សនាវដ្ដី គេហទំព័រ ប្រព័ន្ធបណ្ដាញសង្គមដូចជា ហ្វេសប៊ុក យូធូប ធ្វីតធើ ជាដើម ក្នុងនោះប្រទេសកម្ពុជា ក៏បាននឹងកំពុងយកចិត្តទុកដាក់ និង ចាប់អារម្មណ៍យ៉ាងខ្លាំងទៅលើប្រព័ន្ធផ្សព្វផ្សាយទាំងអស់នោះផងដែរ ៕
អត្ថបទ ៖ លោក លីវ សាន្ត
រូបថត ៖ មន្ត្រីមន្ទីរព័ត៌មាន
